काठमाडौं– मंसिर ४ गते भएको प्रदेश र प्रतिनिधि सभा निर्वाचनको प्रत्यक्षतर्फको मतपरिणाम सम्पूर्ण रुपमा नआउँदै सत्ताको नेतृत्वकर्ता नेपाली कांग्रेसका नेताहरुको दौडधुप तीव्र बनेको छ। आन्तरिक रुपमा पार्टीको संसदीय दलको नेताको सम्भावित निर्वाचन र नयाँ बन्ने सरकारको गृहकार्यस्वरुप नेताहरु आफ्नै पार्टीका सहकर्मिदेखि अन्य पार्टीका नेताहरूसँग बाक्लो भेटघाट थालेका छन्।
पछिल्लो केही दिनयता कांग्रेस उपसभापति पूर्णबहादुर खड्का, प्रवक्ता प्रकाशशरण महत, महामन्त्री गगन थापा लगायतका नेताहरु बाक्लो राजनीतिक घेटघाटमा व्यस्त देखिन्छन्। अघिल्लो हप्ता नेता प्रकाशमान सिंहले एमाले अध्यक्ष केपी ओलीलाई पनि भेटेका थिए।
हुन त प्रधानमन्त्री तथा कांग्रेस सभापति शेरबहादुर देउवा आफैं पनि आफ्नो सरकारी निवास बालुवाटारमा आफ्नै पार्टी र अन्य पार्टीका नेताहरुलाई पछिल्लो समय लागतारजसो भेटघाट गरिरहेका छन्। देउवाले निर्वाचनपश्चात दुईपटक माओवादी अध्यक्ष पुष्पकमल दहाल ‘प्रचण्ड’सँग भेटिसकेका छन्।
यसैगरी, सत्ता गठबन्धनलाई अपूग भइरहेको केही सिट संख्या पुर्ति गर्नेगरि देउवाले जनमत पार्टीका अध्यक्ष सीके राउतलाई पनि बालुवाटारमा बोलाएर छलफल गरिसकेका छन्। त्यतिमात्र होइन देउवा आफ्नो पार्टीबाट निर्वाचित सांसद तथा पार्टीका पदाधिकारीसँग पनि छलफलमै छन्।
प्रवक्ता महतले पनि आइतबार बिहान मात्रै आफ्नै निवासमा जनमत पार्टीका अध्यक्ष सीके राउतसँग भेटेका छन्। महतले यसअघि माओवादी अध्यक्ष दाहालदेखि आफ्नै पार्टीका नेता डा शेखर कोइरालासँग भेट गरिसकेका छन्। पार्टीको आन्तरिक सवाल र नयाँ सरकार गठन बारेमा उनले छलफल गरेका छन्।
यस्तै, शनिबार साँझ कांग्रेस उपसभापति खड्काले नेकपा एकीकृत समाजवादीका अध्यक्ष माधवकुमार नेपाललाई भेटे। त्यसअघि खड्काले पनि माओवादी अध्यक्ष दाहालसँग भेटेका थिए। आइतबार साँझ खड्काले जनमत पार्टीका अध्यक्ष सीके राउतसँग भेट।
खड्कालाई भेट्न राउत खड्कानिवास गल्फुटार पुगेका थिए। भेटमा हालै सम्पन्न प्रतिनिधि सभा र प्रदेश सभा निर्वाचनको समीक्षा तथा नयाँ सरकार निर्माण र सत्ता गठबन्धनमा सहकार्य गर्ने विषयमा छलफल भएको खड्काको सचिवालयले जनाएको छ।
नेपाल लाइभसँग कुरा गर्दै खड्काले अहिले भइरहेको भेटको मुख्य आशय नै नयाँ गठन हुने सरकार भएको बताए। ‘निर्वाचनको परिणाम आइरहेको छ। एक–अर्कालाई बधाई दिनु एउटा समान्य राजनीतिक संस्कार पनि हो’, खड्काले भने, ‘दोस्रो कुरा चाडै अब अर्को नयाँ निर्वाचित सरकार गठन गर्नुछ। त्यही भएर अहिले सत्ता गठबन्धनका घटकका नेताहरुसँग कुरा अघि बढाइरहेको छु।’
खड्काले सत्ता गठबन्धनका बीचमा नयाँ सरकार गठनका लागि सकारात्मक रुपमा संवाद अघि बढेको बताए। शनिबार मात्रै माओवादीको पदाधिकारी बैठकले नयाँ सरकार गठनका विषयमा वर्तमान गठबन्धनका साथै अन्य विकल्पहरु पनि खुल्ला राख्ने सन्देश प्रवाह गरेको थियो। त्यसलगत्तै कांग्रेस उपसभापति खड्काले माओवादी अध्यक्ष दाहाल र वरिष्ठ उपाध्यक्ष नारायणकाजी श्रेष्ठसँग टेलिफोनमा संवाद गरेका थिए। खड्काले बाहिर आएको हल्लामा कुनै सत्यता नरहेको पनि दाबी गरे।
‘म अहिले धेरै कुरा भन्दिनँ। तर, सत्ता सतागठबन्धनभित्र नयाँ सरकार बनाउनका लागि सकारात्मक संवादहरु अघि बढेको छ’ खड्काले भने।
आइतबार नै माओवादी महासचिव देव गुरुङले केन्द्रीय पदाधिकारी बैठकले गठबन्धन दलको विकल्प नखोजेको प्रष्ट पारे। बैठकमा निर्वाचन सम्बन्धी सबै पक्षबारे समीक्षा भएको उनको भनाइ छ। तर, गठबन्धनको विकल्पबारे पार्टीमा कुनै समीक्षा नगरेको गुरुङको दाबी छ।
शेखर–गगन छलफल
निर्वाचनपछि नयाँ सरकार गठनको कसरतसँगै काग्रेसभित्र संसदीय दलको नेताको चयनका लागि पनि भेटघाट र छलफल तीव्र बनेको छ। महामन्त्री गगन थापाले पार्टी सभापति तथा प्रधानमन्त्री देउवाविरुद्ध संसदीय दलमा उभिने उद्घोष गरेपछि कांग्रेसको आन्तरिक राजनीति पनि तातिएको छ।
यसै, सन्दर्भमा कांग्रेस महामन्त्री थापाले शुक्रबार नेता शेखर कोइरालासँग भेट गरे। पार्टीको १४औं महाधिवेशनमा थापा कोइरालाकै टिमबाट महामन्त्रीमा उम्मेदवारी दिएर निर्वाचित भएका थिए।
कोइराला समेत संसदीय दलको नेताको उम्मेदवार बन्ने चर्चा रहेका बेला यी दुई नेताहरुको छलफल कसरी अगाडि बढ्छ भन्ने विषय कांग्रेसभित्र चासोपूर्वक हेरिएको छ। शुक्रबार कोइरालासँग भेटेपछि महामन्त्री थापाले शनिबार प्रधानमन्त्री देउवासँग छलफल गरे।
यता, देउवानिकट रहेका प्रवक्ता महतले शनिबार नेता शेखर कोइरालासँग भेटे। उनीबीच के कुरा भयो भन्ने खुलाइएको छैन। कोइरालाले पनि महामन्त्री थापा र प्रवक्ता महतसँगको भेटपछि कुनै सार्वजनिक प्रतिक्रिया जनाएका छैनन्। बरु उनको सचिवालयका सदस्यहरू कोइराला संसदीय दलको नेतामा उठ्ने तयारी गरिरहेको बताइरहेका छन्।
प्रतिनिधिसभको प्रत्यक्षतर्फ कांग्रेसले १६५ मध्ये ५७ सिट जितेका छ भने समानुपातिकमा ३२ सिट पाउने आकलन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
