काटमाडौं– क्याटलान क्लब बार्सिलोनका युवा फरवार्ड तथा स्पेनिस टिमका स्ट्राइकर फेरान टोरेस बुधबार कोस्टारिकाविरुद्धको खेलमा पहिलो रोजाइमै मैदानमा उत्रिए।
दायाँ साइटबाट खेल्दै आएका टोरेसलाई स्पेनका मुख्य प्रशिक्षक (कोच) लुइस इनरिकले बाँया साइडबाट मैदानमा उतारे।
यतिमात्रै होइन मिडफिल्डर रोड्रीलाई डिफेन्स लाइन खेलाएर अर्को सरप्राइज पनि दिए इनरिकेले। उनको यो निर्णय सही मात्रै भएन स्पेनले विश्वकप इतिहासमै अहिलेसम्मको ठूलो अन्तरको जित निकाल्दै रेकर्ड राख्यो।
स्पेनले सनसनी मच्चाउँदै कोस्टारिकालाई ७ गोल गर्दा २ गोल उनै फरवार्ड टोरेसको नाममा रह्यो। बार्सिलोनामा कमै खेल्न पाएका टोरेसलाई पहिलो रोजाइमा उतारेर सनसनी नतिजा निकाल्ने इनरिके र टोरेसको साइनो झनै रोचक छ।
प्रशिक्षक इनरिकेकी २२ वर्षीय छोरी छिन्, सिरा मार्टिनेज। मार्टिनेज उनै टोरेसको गर्लफ्रेन्ड हुन्। अर्थात स्पेनको टिमको कोच इनरिके र फरवार्ड टोरेसको सम्बन्ध ‘ससुरा–ज्वाइँ’ को छ। ‘ससुरा’ इनरिकेले स्पेनिस टिममा ‘ज्वाइँ’ टोरेसलाई डाकेपछि कतिपयले ट्रोल बनाएर इनरिकेलाई उडाएका पनि थिए।
कोस्टारिकाविरुद्ध टोरेस मैदानमा उत्रँदै गर्दा उनकी गर्लफ्रेन्ड तथा कोच इनरिकेकी छोरी मार्टिनेज पनि खेल हेर्न अल थुमामा रंगशाला पुगेकी थिइन्।
मार्टिनेज आफ्ना प्रेमी टोरेसको मनोबल बढाउन मात्रै दोहा पुगेकी थिइनन् प्रशिक्षक तथा बाबु इनरिकेको समर्थन गर्न पनि उनी पुगेकी थिइन्।
इनरिकले केही दिनअघि कतारमा भएको प्रेस कन्फ्रेन्समै छोरी मार्टिनेज र ज्वाइँ टोरेसको बारेमा जोकसमेत सुनाएका थिए। तपाईंको टिममा तपाईंसँग सम्बन्ध विस्तार गरेको कोही खेलाडी छ भनेर सोध्यो भने के हुन्छ? भनेर सोधिएको प्रश्नमा इनरिकेले हाँस्दै भनेका थिए, ‘यो भन्न धेरै सजिलो छ, त्यो व्यक्ति फेरान टोरेस हो। मैले यो भनिन भने छोरीले मेरो टाउको काट्नेछिन्।’
टोरेसले भने पत्रकार सम्मलेन सकिएपछि इनरिकेको ठट्टाको जवाफ दिँदै भनेका थिए, ‘म यसलाई थप दबाबको रुपमा लिन्नँ। हामीलाई थाहा छ लाइभमा कोचले मजाजको लागि त्यसो भनेका हुन्।’
‘कोच र मलाई थाहा छ कि पारिवारिक हुँदा र खेलाडी र कोच हुँदामा कस्तो भिन्नता हुन्छ भन्ने। मलाई लाग्छ हामीले यसलाई स्वभाविक रुपमा अगाडि बढाउनु पर्छ। अहिले हामी राम्रोसँग मिलिरहेका छौं’, टोरेसले भनेका थिए।
बुधबारको खेलमा ड्यानी ओल्मो र मार्को एसेन्सियोले गोल गरेपछि स्पेनले २–० को अग्रता लिएको थियो। त्यसपछि ३० औं मिनेटमा जोर्डी अल्बालाई ओस्कर डबोर्टले फउल गरेपछि पाएको पेनाल्टीमा टोरेसले गोल गरेका थिए।
उक्त गोल टोरेसले आफ्नी प्रेमिका सिरालाई समर्पित गरेका थिए। सिराको लागि आफ्नो औंलाहरु ‘एस’ आकार बनाएर उनीतर्फ देखाउँदै गोल सेलिब्रेसन गर्दै समर्पित गरेका थिए। दोस्रो हाफमा फेरि टोरेसले गोल गरे र प्रेमिकाप्रति समर्पित गर्दै सेलिब्रेसन गरे।
टोरेसकी प्रेमिका सिरा मार्टिनेज आफ्ना बाबु र प्रेमी टोरेस जस्तै चर्चित खेलाडी हुन्। उनी घोडसवारको रुपमा घोडचढी (हर्स राइडर) को प्रतिस्पर्धा गर्छिन्। टोरेस र मार्टिनेजको सम्बन्ध गत जनवरीमा मात्रै सार्वजनिक भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
