काठमाडौं– काठमाडौं निर्वाचन क्षेत्र नम्बर ९ मा नेकपा एमालेका कृष्णगोपाल श्रेष्ठ विजयी भएका छन्। प्रारम्भिक रुझान हेर्दा उनले काठमाडौंका १० क्षेत्रमा एमाले शून्य हुनबाट जोगाएका छन्।
श्रेष्ठले ११ हजार ९५६ मत ल्याएका छन् भने निकटतम् प्रतिस्पर्धी राष्ट्रिय स्वतन्त्र पार्टीका उम्मेदवार टेकबहादुर पोखरेलले १० हजार ९६९ मत ल्याए।
यो जितसँगै श्रेष्ठ चारपटक प्रतिनिधि सभामा पुग्ने सांसद बनेका छन्। उनी २०४९ मा पहिलोपटक सांसद् बनेका थिए। २०४८ सालको निर्वाचनमा एमालेका तत्कालीन महासचिव मदन भण्डारी काठमाडौं १ र ५ बाट निर्वाचित भएका थिए।
तत्कालीन प्रधानमन्त्री कृष्णप्रसाद भट्टराईलाई काठमाडौंमा १ मा हराएका थिए। काठमाडौं ५ मा कांग्रेसकै हरिबोल भट्टराईलाई पराजित गरेका थिए। एक निर्वाचन क्षेत्र छाड्ने प्रावधान अन्तर्गत काठमाडौं ५ छाड्दा कृष्णगोपालले अवसर पाएका थिए।
२०५१ सालकको मध्यावधि निर्वाचनमा उनी काठमाडौं ७ बाट उम्मेदवार बने र कांग्रेसका दामोदर गौतमलाई पराजित गरे।
लगातार दुईपटक जितेका उनलाई तेस्रोपटक सांसद बन्न भने २०७४ साल कुर्नुपर्यो। किनभने त्यो बीचमा भएका चारवटा निर्वाचन उनले हार बेहोरे। २०५६ को निर्वाचनमा कांग्रेसका तीर्थराम डंगोलसँग हारे।
२०६४ को निर्वाचनमा काठमाडौं - ९ बाट उम्मेदवार बने। कांग्रेसका ध्यानगोविन्द रञ्जितसँग उनी पराजित भए। २०६४ को संविधासभा निर्वाचनमा उक्त क्षेत्रमा रञ्जितले नै जिते। श्रेष्ठ तेस्रो भए। उनीभन्दा १०० मतले अघि नेकपा माओवादीका माइला लामा थिए।
२०७० सालको निर्वाचनमा पनि उनी काठमाडौं ९ बाटै उम्मेदवार थिए। तर कांग्रेसका रञ्जितसँग ह्याट्रिक हार बेहोर्न पुगे।
त्यो वर्ष उनको दुईपल्ट हार भयो। माधव नेपालले काठमाडौं २ र रौतहट १ जितेका थिए। नेपालले काठमाडौं २ छाड्दा श्रेष्ठले फेरि चुनाव लड्ने मौका पाए। तर, कांग्रेसका दीपक कुँइकेललाई जित्न सकेनन्।
उनलाई फेरि संसदमा फर्किन २०७४ कुर्नुपर्यो। माओवादी केन्द्रसँग गठबन्धन गरेर चुनाव लडेको अवस्थामा उनले काठमाडौं ९ मै उम्मेदवार बन्ने मौका पाए। आफूलाई तीनपटक हराएका कांग्रेसका रञ्जितसँग बदला लिए।
यसपल्ट उनीसँग सत्ता गठबन्धनले माओवादी केन्द्रकी कल्पना धमलालाई उम्मेदवार बनाएको थियो, तर उनका निकटतम् प्रतिस्पर्धी राष्ट्रिय स्वतन्त्र पार्टीका टेकबहादुर पोखरेल बने। सत्ता गठबन्धनकी धमलाले उनी भन्दा झन्डै आधा कम अर्थात् ६ हजार ४०२ मत ल्याइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914069.png)
-1764146706.png)
