काठमाडौं- मध्य बानेश्वरस्थित रत्नराज्य माध्यमिक विद्यालयमा रहेको मतदान केन्द्र अगाडि अशोक कार्की खसेको मत संख्या सुनाइरहेका थिए। उनी कुनै उम्मेदवारको बुथ प्रतिनिधि रहेको उनले झुण्ड्याएको परिचयपत्रबाटै प्रष्ट हुन्थ्यो।
कार्कीले सुनाइरहेको खसेको मत संख्या एउटा समूह चासो दिएर सुनिरहेको थियो। तर खसेको मत हेर्दा निर्वाचनप्रति आम नागरिकमा वितृणा देखिन्थ्यो।
सो बुथमा दिउँसो २ बजेसम्म ४० प्रतिशत पनि मत खसेको थिएन। मतदाताहरु टिप्पणी गर्दै थिए, ‘मत हाल्ने जमात विमानस्थलमा विदेश जाने लाइनमा छन्। अनि हामी मतदान केन्द्रमा किन मत खसाल्न मानिस आएनन् भनेर खोजिरहेका छौं।’
त्यही टिप्पणी सुनिरहेका मतदाता सुमन न्यौपाने नागरिकमा नेता र राजनीतिप्रति बढेको वितृष्णाका कारण यो पटक कम मत खसेको बताए। ‘मानिसहरु घरमै बसेर पनि मतदान गर्न आइरहेका छैनन्,’ उनले भने, ‘यी नेताहरुले केही गर्दैनन्। त्यही भएर ठूलो तप्का मत किन दिने भन्नेमा पुगेको छ। उनले आम नागरिकमा निर्वाचनप्रति यो पटक उत्साह नरहेको दावी गरे।
दिउँसो २ बजे काठमाडौंको मध्य बानेश्वरको सो मतदान केन्द्र खाली-खाली देखिन्थ्यो। त्यतिन्जेलसम्म त्यहाँ ६ सय मत मात्र खसेको कार्कीले बताएका थिए। फाट्टफुट्ट आउने मतदाताले विना भीडभाड खुरुखुरु मत खसाउन सक्ने अवस्था थियो।
मतदान केन्द्रभित्र मात्रै होइन, बाहिर पनि स्थानीयको जमघट कमै देखिन्थ्यो। एक जना उम्मेदवार त्यहाँ आइपुग्दा जमघट भएका मानिसले उनलाई नमस्कार फर्काउने बाहेक कुनै रिस्पोन्स गरेको देखिएन।
यसअघि उक्त मतदान केन्द्रबाटै तीन पटक मत दिएकी सीता पौडेल यो पटक जतिको उदासिनता विगतमा आफूले नदेखेको बताउँछिन्। पहिलो र दोस्रो संविधान सभा, २०७४ को निर्वाचन र यो निर्वाचन हेर्दा अहिले जत्तिको निरस कहिल्यै नदेखिएको उनले बताइन्।
‘राजनीतिक दल र तिनका उम्मेदवारप्रति नागरिकमा विश्वास नै छैन। मतदाता मतदानस्थल वरिपरि बसिरहन समेत अफ्ठ्यारो मान्छन्,’ उनले भनिन्, ‘पहिला नेताहरुका लागि प्रचारप्रसारदेखि मतदान केन्द्रसम्म सहयोग गर्नेहरु अहिले वास्तै गर्दैनन्।’
मतदान केन्द्र बाहिर रहेका पुष्कर दाहाल पुराना पार्टीबाट वाक्क भएर यस पटक मतदाताले नयाँ उम्मेदवार खोजिरहेको सुनाए। देशैभर ठूला पार्टीको गठबन्धन रहे पनि यहाँका मतदाता भने नयाँ तथा स्वतन्त्रको पक्षमा रहेको बताए।
‘दल र नेताप्रति नागरिकमा कुनै विश्वास नै छैन,’ उनले भने, ‘त्यही भएर नयाँले केही गर्छन् कि भनेर जनताले यो पटक उता मत दिएको देखियो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750933374.png)
-1749826086.png)
