काठमाडौं– कतारको राजधानी दोहामा नेपाली समयअनुसार आइतबार राति ९:४५ बाट २२ औं संस्करणको विश्वकप फुटबल सुरु हुँदैछ । विभिन्न ३२ राष्ट्रका टोली कतार पुगिसकेका छन् । निकै तामझामका साथ सुरु हुन लागेको विश्वकपमा सहभागी खेलाडी केही यस्ता खेलाडी छन् जसको खेल हेर्न छुटाउन दर्शक निकै उत्साहित छन्।
तीमध्ये यसपटकको कतार विश्वकपमा हेर्न लायक खेलाडीमध्ये केही यस्ता गोलकिपर पनि छन्, जसले हरेक दर्शकको ध्यान आफूतिर तान्न सक्नेछन्। तीमध्ये यसपटकको विश्वकपमा हेर्न लायक ५ गोलकिपरबारे चर्चा गरौंः
१. एलिसन (ब्राजिल)
ब्राजिलका मुख्य प्रशिक्षक टिटेलाई सुरुवाती ११ लागि यो पटक यस्तो सुविधा छ कि उनले विश्वविख्यात दुई गोलकिपरमध्येबाट एकलाई छनोट गनुपर्ने हुन्छ। ब्राजिलको प्लेइङ ११ स्थानका लागि प्रतिस्पर्धा गर्ने दुई ‘सट स्टपर’ हुन् एलिसन र एडरसन । उनीहरूसँगै तेस्रो रोजाइमा वेभर्टन पनि विश्वकप टोलीमा छन् ।
एलिसन इंग्लिस प्रिमियर लिग क्लब लिभरपुलमा आबद्ध छन्। एलिसनले हरेक खेलमा आफूलाई अब्बल रहेको प्रमाणित गर्दै आएका छन्। एलिसन जारी सिजन उत्कृष्ट लयमा छन्। विपक्षीले प्रहार गरेका धेरै सर्टहरूलाई उनले बिफल बनाएका छन्।
एलिसन काउन्टर अट्याकमा पनि उत्तिकै माहिर देखिन्छन्। गत सिजन लिभरपुल प्रिमियर लिगको शीर्ष ४ भित्र परेर च्याम्पियन्स लिगमा छनोट हुन संघर्षरत रहेका बेला गोलकिपर एलिसनले नै गोल गरेर सनसनी मच्चाएका थिए। खेलको अतिरिक्त समयको अन्तिम मिनेटमा वेस्ट ब्रोमविच आल्बियनविरुद्ध एलिसनले गोल गर्दै लिभरपुललाई नाटकीय जित दिलाएका थिए। अन्तिम समयमा पाएको कर्नर किकलाई हेडमार्फत एलिसनले गोल गरेका थिए।
जारी सिजन पनि गोलकिपर एलिसनले दिएको काउन्टर पासमा मोहम्मद सलाहले गोल गर्दै लिभरपुलले म्यानचेस्टर सिटीमाथि महत्वपूर्ण जित निकालेको थियो। कतार विश्वकपमा मुख्य दाबेदार देखिएको ब्राजिललाई अघि बढाउन एलिसनले पनि मुख्य भूमिका निभाउने विश्वास गरिएको छ।
२. म्यानुअल नोयर (जर्मनी)
३६ वर्षीय गोलकिपर म्यानुअल नोयर सम्भवत आफ्नो अन्तिम विश्कपमा सहभागी हुँदैछन्। तर उनको क्षमतामा उमेर अहिलेसम्म गौण बनेको छ। उनको प्रदर्शनमा उमेरको कुनै झल्को देखिँदैन। जर्मन क्लब बार्यन म्युनिखमा आबद्ध नोयर विश्वविजेता गोलकिपरसमेत हुन् । उनको उत्कृष्ट प्रदर्शनमा सन् २०१४ मा जर्मनीले विश्वकप ट्रफी उचालिसकेको छ।
त्यतिबेला उत्कृष्ट प्रर्दशन गरेका नोयरले ‘गोल्डेन ग्लोब्स’को अवार्ड समेत पाएका थिए। उनले जर्मनीका लागि ११२ क्याप जितेका छन्। अहिले उनी जर्मनीको राष्ट्रिय टोलीका कप्तानसमेत हुन्। सन् २०१८ को विश्वकपमा भोगेको खराब नतिजाबाट पाठ सिक्दै पुनः एकपटक लयमा फर्कने दाउमा छ जर्मनी। यसका लागि कप्तानसमेत रहेका नोयरले आफ्नो अन्तराष्ट्रिय अनुभवलाई भरपुर प्रयोग गर्ने र संकट टार्ने आकलन गरिएको छ।
३. थिबउट कोर्टुवा (बेल्जियम)
बेल्जियन फुटबलको ‘गोल्डेन पुस्ता’ एक हतियार हुन् थिबउट कोर्टुवा। ३० वर्षीय गोलरक्षक कोर्टुवाका लागि सिजन २०२२–२३ अविस्मरणीय रह्यो। उहाँ उनले युईएफए सुपर कप, ला–लिगा र च्याम्पियन्स लिग जिते। त्यतिबेला उनी रियल मड्रिडका लागि बलियो पर्खाल नै थिए।
भेट्रान स्टाइकरहरूका प्रहारलाई कोर्टुवाले उत्कृष्ट बचाउ गर्दै बिफल बनाएका थिए। यसको उदाहरणका लागि सन् २०२२ को च्याम्पियन्स लिगको फाइनलमा कोर्टुवाको प्रर्दशनलाई लिन सकिन्छ।
सन् २०१८ को विश्वकपमा पनि कोर्र्टुवाले उत्कृष्ट प्रदर्शन गरेका थिए। अन्तिम १६ मा बेल्जियम तुलनात्मक कमजोर जापानसँग २–० ले पछि परेको थियो। बेल्जियमले उत्कृष्ट कमब्याक गर्दै खेल २–२ को स्थितिमा ल्याएको थियो। त्यसपछि छिनोफानो पेनाल्टी सुटआउटबाट हुने लगभग पक्कापक्की जस्तै भएको थियो ।
खेलको अतिरिक्त समयमा जापानले प्रहार गरेको कर्नर किक सिधै कोर्टुवाले समातेपछि काउन्टरमा बल पास दिएका थिए। कोर्टुवाले दिएको उक्त बल केभिन डी ब्रयनेले अघि बढाउँदै पास दिएपछि गोल भएको थियो । त्यसपछि बेल्जियम अन्तिम ८ मा प्रवेश गरेको थियो।
४. जोर्डन पिकफोर्ड (इंग्ल्याण्ड)
/origin-imgresizer.eurosport.com/2019/06/11/2612432-54147355-2560-1440.jpg)
इंग्ल्याण्डको विश्वकप टोलीका लागि छनोट भएका तीन गोलकिपर जोर्डन पिकफोर्ड, निक पोप र आरोन राम्सडेल हुन् । यी मध्ये कतारमा थ्री लायन्सका लागि पिकफोर्ड सम्भवत पहिलो रोजाईमा हुनेछन् ।
पिकफोर्ड विश्वकपमा इंल्ग्याण्डका लागि पेनाल्टी रोक्ने दोस्रो गोलकिपर हुन्। सन् २०१८ मा रुसमा भएको विश्वकपमा इंग्ल्याण्डको भेट अन्तिम १६ मा कोलम्बियासँग भएको थियो। खेलको छिनोफानो पेनाल्टी सुटआउटबाट भयो। त्यतिबेला पिकफोर्ड उत्कृष्ट बचाउ गर्दै दुईवटा पेनाल्टी विफल बनाएपछि इंग्ल्याण्ड अन्तिम ८ मा प्रवेश गरेको थियो। त्यसपछि पिकफोर्ड इंल्ग्याण्डका लागि हिरो भए।
पिकफोर्डले इंग्ल्याण्डका लागि ४५ खेल खेलेका छन्। त्यसमध्ये २१ मा ‘क्लिन चिट’ राख्न सफल भएका छन्।
५. इमिलियानो मार्टिनेज (अर्जेन्टिना)
यतिबेला अर्जेन्टिनाको फुटबल टोली प्रतिभाले भरिपूर्ण छ। जहाँ सुपरस्टार फरवार्ड लियोनल मेसीदेखि उत्कृष्ट गोलरक्षक इमिलियानो मार्टिनेजसम्म अर्जेन्टिनाको टोलीमा छन्। उनीहरूको प्रेरणामा अर्जेन्टिना योपकट उपाधि दाबेदारको होडमा निकै अगाडि देखिन्छ।
अर्जेन्टिनाका लागि मार्टिनेजको कीर्तिमान निकै लोभलाग्दो छ। सन् २०२१ जुनमा अर्जेन्टिनाको राष्ट्रिय टोलीमा डेब्यू गरेका मार्टिनेजले अर्जेन्टिनाका लागि १८ खेल खेलिसकेका छन्। तीमध्ये १३ मा उनले ‘क्लिन सिट’ राखेका छन्। यो अवधिमा उनले जम्माजम्मी ५ गोलमात्रै खाएका छन्।
मार्टिनेजसँग पेनाल्टी बचाउन सक्ने उस्तै प्रतिभा पनि छ। उनी प्रिमियर लिग क्लब एस्टन भिल्लामा आबद्ध छन्। त्यहाँ उनी पहिलो रोजाइमा नियमित खेल्दै आएका छन्।
फाइनलमा घरेलु टोली ब्राजिललाई हराउँदै अर्जेन्टिनाले कोपा अमेरिका २०२१ को उपाधि जितेको थियो। त्यो बेला मार्टिनेज नायक बनेका थिए। सेमिफाइनमा कोलम्बियाँसग अर्जेन्टिनाले १–१ को बराबरी खेलेपछि खेल पेनाल्टी सुटआउटमा धकेलिएको थियो। मार्टिनेजले कोलम्बियाका तीनवटा पेनाल्टी रोके खेल जित्दै अर्जेन्टिना फाइनलमा पुगेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
