काठमाडौं– पूर्वप्रधानमन्त्रीहरू केपी शर्मा ओली, पुष्पकमल दाहाल ‘प्रचण्ड’, माधव कुमार नेपाल, झलनाथ खनाल र बाबुराम भट्टराईले आफनो नामावली भएको क्षेत्रमा मतदान गरेका छन्।
पूर्वप्रधानमन्त्री एवम् नेकपा एमालेका अध्यक्ष केपी शर्मा ओलीले भक्तपुरबाट मतदान गरेका छन्। उनले साढे १२ बजे भक्तपुर निर्वाचन क्षेत्र २ को सर्यविनायक नगरपालिकाको बालकोटस्थित महेन्द्र शान्ति माविबाट मतदान गरेका हुन्।
ओली झापा-५ का उम्मेदवारसमेत रहेका छन्। उनले आफूले आफैँलाई भने मतदान गर्न पाएका छैनन्। उनलाई राप्रपाको समर्थन छ। उनका मुख्य प्रतिस्पर्धी कांग्रेसका खगेन्द्र अधिकारी छन्।
ओली झापाबाटै ०४८, ०५१ र ०५६ भएको प्रतिनिधि सभा निर्वाचनमा उनी झापा-६ बाट निर्वाचित भएका थिए। ०६४ मा झापा-७ बाट पराजित भएका उनी ०७० मा झापा-७ बाटै निर्वाचित भए। ०७४ मा तत्कालीन वाम गठबन्धनका साझा उम्मेदवार बनेका उनी झापा-५ बाट निर्वाचित भएका थिए।
पूर्वप्रधानमन्त्री एवम् माओवादी केन्द्रका अध्यक्ष पुष्पकमल दाहाल प्रचण्डले आइतबार बिहान चितवन निर्वाचन क्षेत्र ३ शिवनगरस्थित भरतपुर-१४ शान्तिपुर नेपाल प्रहरी विद्यालयको (क) केन्द्रबाट मतदान गरेका थिए।
उनी गोरखा-२ बाट उम्मेदवार बनेका छन्। उनी एमालेका अब्दुश मियाँ लगायतका उम्मेदवारहरूसँग चुनावी प्रतिस्पर्धामा छन्। उनी सत्ता गठबन्धनका साझा उम्मेदवार हुन्।
चितवन-३ को उम्मेदवार भए पनि उनी गोरखाबाट उम्मेदवार बनेका छन्। पूर्वप्रधानमन्त्री बाबुराम भट्टराईले संसदीय यात्रामा ब्रेक लगाएपछि भने दाहाल गोरखा-२ पुगेको हुन्। प्रचण्ड गणतन्त्र नेपालको पहिलो प्रधानमन्त्री पनि हुन्।
उनी ०६५ र ०७३ गरी २ पटक प्रधानमन्त्री भइसकेका छन्। प्रचण्ड ०६४ मा सम्पन्न पहिलो संविधान सभाको निर्वाचनमा काठमाडौं-१० र रोल्पा-२ बाट विजयी भएका थिए। ०७० मा सम्पन्न दोस्रो संविधान सभा निर्वाचनमा सिरहा– ५ बाट विजयी भएका थिए भने काठमाडौं-१० बाट पराजित भएका थिए।
०७४ को प्रतिनिधि सभा निर्वाचनमा चितवन-३ बाट निर्वाचन भएका थिए। त्यतिबेला उनी एमाले र माओवादी केन्द्रले बनाएको वाम गठबन्धनको साझा उम्मेदवार थिए।
पूर्वप्रधानमन्त्री एवम् नेकपा एकीकृत समाजवादीका अध्यक्ष माधवकुमार नेपालले गृहजिल्ला रौतहट-१ स्थित रामजानकी कन्या आधारभूत माध्यमिक विद्यालयको मतदान केन्द्रमा पुगेर मतदान गरेका हुन्।
उनी यो क्षेत्रमा उम्मेदवार समेत छन्। उनी एमालेका अजय गुप्तासँग चुनावी प्रतिस्पर्धा गर्दैछन्। उनी सत्ता गठबन्धनका साझा उम्मेदवार हुन्। नेपाल ०७४ मा भने काठमाडौं-२ बाट निर्वाचित भएका थिए।
०७८ मा एमाले विभाजनपछि गठन भएको एकीकृत समाजवादीको नेतृत्व उनले गरेका हुन्। ०६६ मा उनी प्रधानमन्त्री पनि थिए।
पूर्वप्रधानमन्त्री एवम् नेकपा (एकीकृत समाजवादी) का वरिष्ठ नेता झलनाथ खनालले इलामको सूर्योदय नगरपालिका- ९ रम्फोकस्थित राष्ट्रिय आधारभूत विद्यालयको मतदान केन्द्रबाट मतदान गरे। खनाल प्रतिनिधिसभा सदस्यका लागि इलाम-१ बाट पाँच दलीय गठबन्धनका उम्मेदवार हुन्।
एमालेका महेश बस्नेतसँग उनी प्रतिस्पर्धा गर्दैछन्। ०६७ मा उनी प्रधानमन्त्री भएका थिए।
पूूर्वप्रधानमन्त्री एवम् नेपाल समाजवादी पार्टीका अध्यक्ष डा बाबुराम भट्टराईले गोरखाबाट मतदान गरेका छन्।
भट्टराईले पालुङटार नगरपालिका-१ अन्नपूर्ण मावि निर्वाचन केन्द्रबाट मतदान गरेका छन्। उनले यो पाली संसदीय निर्वाचनमा ब्रेक लगाएका छन्। उनी ०६८/६९ मा प्रधानमन्त्री भएका थिए।
यसैबीच प्रधानमन्त्री शेरबहादुर देउवाले पनि आफ्नो गृहजिल्ला डडेलधुरास्थित निर्वाचन क्षेत्रको मतदान केन्द्रबाट मतदान गरेका छन्। प्रधानमन्त्री देउवाले आइतबार गृहजिल्ला डडेलधुराको गन्यापधुरा गाउँपालिका-१ रूवाखोलास्थित असिग्राम मावि मतदान केन्द्रबाट गरे मतदान गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788243684.jpg)
_hy6IYH2vIF-1751945573.jpg)
-1786602170.png)
-1786513116.png)
