निर्वाचन विशेष

भोट हाल्न गाउँ जानेको घुइँचो, गाडीको व्यवस्था गरेर मतदाता ओसार्दै उम्मेदवार

कल्पना घिमिरे शुक्रबार, मंसिर २, २०७९ १६:३७

काठमाडौं– निर्वाचनको मौन अवधि सुरु भएपछि दलहरुले गाडी नै रिजर्भ गरी मतदाता ओसार्न थालेका छन्। राजधानी बाहिर जानका लागि विभिन्न नाकामा मतदाताको घुइँचो देखिएको छ।

बुटवल घर भएकी कमला गौतम कलंकीमा बसको पर्खाइमा थिइन्। उनी एक महिनाअघि मात्र उपचारका लागि काठमाडौं आएकी रहिछन्। गाउँबाट मतदाता ओसार्ने बस पठाएको उनले बताइन्।

‘उपचार पनि सकिएको थियो। ठिक्क चुनाव पनि आएकोले मलाई घर जान सजिलो भयो। चुनाव नआएको भए अझै केही दिन यहिँ बस्थेँ,’ उनले भनिन्।

४ गतेको चुनावमा युवालाई भोट दिने सोचमा रहेको उनले बताइन्। ‘अब नयाँ युवालाई छानेर भोट हाल्छु। मान्छे हेरेर भोट हाल्नुपर्छ। पहिला फलानो पार्टीलाई हाल्ने भन्ने थियो। अहिले पार्टी होइन, नयाँ व्यक्तिलाई हाल्ने हो,’ उनले भनिन्।

आफ्नो क्षेत्रका नेताहरुले जितेर खासै विकासका काम नगरेको गौतम बताउँछिन्। ‘यो गर्छु, ऊ गर्छु भन्छन्, केही गर्ने होइन। अलिअलि त गरेका छन् नि। सँधै त्यसरी त हुँदैन नि। बरु नयाँले विकास ल्याउलान् कि?’ उनले भनिन्।

अस्थायी रुपमा काठमाडौं बस्ने स्याङ्जाका तिलक पौडेल पनि बसको पर्खाइमा कलङ्कीमै भेटिए। उनी मंसिर ४ को चुनावमा भोट हाल्नकै लागि गाउँ फर्किंदै थिए। उनको गाउँबाट पनि मतदाता ओसार्न गाडी पठाएका छन्। तर पौडेल भने आफ्नै खर्चमा गाउँ जाने बताउँछन्।

पौडेल यसपालिको चुनावमा राम्रा व्यक्तिले जितेहुन्थ्यो भन्ने चाहन्छन्। ‘हामीले भन्ने केही छैन। जुन नेताले विकासलाई प्रमुख रुपमा लिएर अघि बढ्न सक्छन्, ती नेताले चुनाव जिते राम्रो हुने थियो,' पौडेलले भने।

स्याङजाकै राधा पौडेल पनि भोट हाल्न गाउँ जाँदैछिन्। उनको गाउँमा पुग्न बस भाडा झण्डै तीन हजार रुपैयाँ लाग्छ। तर चुनावको बेला नेताहरुले पठाएको बसमा जान पाउँदा सहज भएको उनले बताइन्।

उनको पनि चाहना युवाले जितोस् भन्ने नै छ। ‘पहिलाका नेतालाई पटकपटक भोट हालेर हेरियो। कसैले केही लछारपाटो लाएनन्। काम नगर्ने, आफ्नो भुँडी भर्ने मात्र भए। अब नयाँलाई चुनाव जिताएर हेर्छु। केही गर्लान् की?’ उनले भनिन्।

गोरखा घर भएकी हिमा राना मगर पनि मंसिर ४ को चुनावमा भोट हाल्न गोरखा जाँदैछिन्।‘जुन गाडी आउँछ, उसैमा जान्छु,' उनले भनिन्, ' म आउँदैछु भन्ने घरमा थाहा नै छैन। मतदाता बोक्ने गाडी पाएको बेला गइहालौं न त भनेर हो,’ उनले भनिन्।

अहिलेसम्म कसलाई भोट हाल्ने भन्ने थाहा नभएको र घरमा सल्लाह गरेर मतदान गर्ने उनले बताइन्।

पोखराका ६५ वर्षीय बलमान गुरुङ पनि चुनावमा भोट हाल्न गाउँ जाँदैछन्। यो उमेर पार गर्दासम्म उनले पटकपटक भोट हाले। भोट हालेर विजयी भएका नेताहरुले देश विकासका लागि कामहरु नगरेको उनी बताउँछन्।

‘अब यो पाली युवा उम्मेदवारलाई भोट हाल्छु। पहिलाका कसैले केही गरेनन्। अलि राम्रो जो छ, उसलाई भोट हाल्छु,’ उनले भने।

गोरखाका प्रेमबहादुर राणा मगर गाउँ जानका लागि बसपार्कमा बस चढ्दै थिए। जुन बस चुनावका लागि मतदाता ओसार्न रिजर्भ गरिएको थियो। ‘रिजर्भ गरेर पठाएको गाडी हो। पैसा तिर्नु पर्दैन। भोट हाल्ने/नहाल्ने मेरो विचार हो। घर जान पाइयो खुसी लागेको छ,’ उनले भने।

यता, कोटेश्वरमा उदयपुर, गाईघाटका श्याम पाण्डे गाडी कुरिरहेका थिए। आफ्नै नातेदार उम्मेदवार भएका कारण भोट हाल्न गाउँ जान लागेको उनले बताए।

‘आफ्नै मान्छे उठेका छन्। भोट त हाल्नैपर्योा। चिनेजानेका राम्रै मान्छे हुन्। जितिहाले केही गर्लान् नि,’ उनले भने।

ओखलढुङ्गाकी निमा तामाङ पनि चुनावमा भोट हाल्न गाउँ जाँदैछिन्। सदरमुकामभन्दा ५ घण्टा टाढा उनको घर छ। गाडी भाडा तिरेर जाने हो भने २ हजारले पनि नपुग्ने उनी बताउँछिन्। नेताहरुले बस रिजर्भ गरिदिनाले गाउँ जान सहज भएको उनले बताइन्।

चुनावमा यस पटक पनि पहिले हालेकै पार्टीलाई भोट हाल्ने उनको विचार छ। ‘हाम्रो एउटै पार्टी हो सधैं। जति नयाँ आए पनि त्यसैलाई हाल्ने हो,’ उनले भनिन्।

कलङ्की टिकट काउन्टरका सञ्चालक सर्जन घिमिरे भन्छन्, ‘पूर्वदेखि पश्चिमसम्मकै केही बस नेताहरुले रिजर्भ गरेका छन्। कोही आफ्नै कामले घर जान्छन्। तिनीहरु आफैं टिकट काटेर जाने गरेका छन्।’

अहिले गाउँबाटै नेताहरुले चुनावको लागि बस रिजर्भ गरेर पठाएका छन्। ओखलढुङ्गा, सोलुखुम्बु, खोटाङ, उदयपुर लागायतका जिल्लामा जाने चुनाव लक्षित बस आजसम्म मात्र हो। कुनै जिल्लाबाट नाम लिस्टसहित फलानो व्यक्तिमात्र भनेर पनि रिजर्भ गरेका छन्। ती रिजर्भ गरेका आजसम्म थिए।

'कोही आँफै टिकट काटेर पनि गएका छन्। शनिबार चाहिँ रिजर्भ गाडी आउँदैनन्। जान परे आफैं टिकट लिएर लान मिल्छ,' कोटेश्वरको एक टिकट काउन्टरका टंक लम्सालले भने।