काठमाडौं– मंसिर ४ मा हुने प्रतिनिधि सभा निर्वाचनका लागि उमेरले २५ वर्षदेखि १०० पुग्नै लागेका उम्मेदवारसम्म मैदानमा छन्। २५ वर्ष उमेरका उम्मेदवार २० जना छन् भने ३० वर्ष मुनिका १ सय ९५ जना युवा उम्मेदवार चुनावी मैदानमा छन्।
यस्तै ६८ वर्ष माथिका मात्र १ सय २० जनाले उम्मेदवारी दिएका छन्।
गोरखा- २ बाट उम्मेदवारी दिएका नेकपा एमालेका अब्दुस मियाँ २९ वर्षका छन्। उनी ९९ वर्षीय टीकादत्त पोखरेलसँग प्रतिस्पर्धामा छन्। पोखरेल मंसिर ४ को चुनावका सबैभन्दा पाका उम्मेदवार हुन्। उनको उमेर अब्दुसको भन्दा तीन गुणा बढी छ।
इलाम- २ बाट ३० वर्षीय प्रकाश सापकोटाले स्वतन्त्र उम्मेदवारी दिएका छन्। उनले नेकपा एमालेका शीर्ष नेता तथा पूर्वसभामुख ६९ वर्षीय सुवासचन्द्र नेम्वाङसँग प्रतिस्पर्धा गर्दैछन्। नेम्वाङ र प्रकाशबीचको उमेर दोब्बर बढीले फरक छ।
झापा- १ बाट २५ वर्षीय विकाश राजवंशीले स्वतन्त्र उम्मेदवारी दिएका छन्। उनले आफ्नो उमेरभन्दा झण्डै तीन गुणा बढी उमेरका जनता समाजवादी पार्टीकी ७० वर्षीया राधा थापासँग प्रतिस्पर्धा गर्नु पर्नेछ।
झापा- ५ मा २५ वर्षीय तीर्थेश्वर चौधरी उम्मेदवार बनेका छन्। उनी पूर्व प्रधानमन्त्री तथा नेकपा एमालेका अध्यक्ष केपी शर्मा ओलीसँग प्रतिस्पर्धा गर्दैछन्। ७० वर्षका ओलीको उमेर चौधरीको भन्दा झन्डै तीन गुणा बढी छ।
सुनिलकुमार शाह मोरङ- २ का स्वतन्त्र उम्मेदवार हुन्। उनको प्रतिपस्पर्धा नेपाली कांग्रेसकी नेतृ सुजाता कोइरालासँग हुँदैछ। ६८ वर्षीया सुजाताको उमेर शाहको भन्दा दोब्बर छ।
मोरङ- ६ मा २७ वर्षीय स्वतन्त्र उम्मेदवार सुशील खड्का र ७२ वर्षीय कांग्रेस नेता डा. शेखर कोइरालासँग प्रतिस्पर्धा हुँदैछ।
यसैगरी सुनसरी- ३ मा पिछडावर्ग निषाद दलित जनजाति पार्टीबाट २५ वर्षीय कुन्दन बहरदार चुनावी मैदानमा छन्। उनको प्रतिस्पर्धा नेपाली कांग्रेसका विजयकुमार गच्छदारसँग हुँदैछ। गच्छदार ६८ वर्षका भए। गच्छदारको उमेर कुन्दनको भन्दा गच्छदार दुई गुणाभन्दा धेरै छ।
राष्ट्रिय स्वतन्त्र पार्टीका २५ वर्षीय निरञ्जनप्रसाद कुशहवाले सप्तरी- १ बाट उम्मेदवार हुन्। उनी आफूभन्दा तीन गुणा बढी उमेरका जनता समाजवादी पार्टीका नेता नवल किशोर साह सुडीसँग प्रतिस्पर्धामा छन्। सुडी ७३ वर्षका भए।
धनुषा- २ का स्वतन्त्र उम्मेदवार बद्रीप्रसाद यादव पनि २५ वर्षकै भए। उनी जनता समाजवादीका ७३ वर्षीय आनन्द यादवसँग प्रतिस्पर्धा गर्दैछन्।
महोत्तरी- ३ बाट स्वतन्त्र उम्मेदवार बनेका २९ वर्षीया सर्विन्द्र यादव र ३० वर्षीया इन्द्रजितकुमार यादव ८० वर्षीय महन्थ ठाकुरसँग प्रतिस्पर्धा गर्दैछन्। लोकतान्त्रिक समाजवादी पार्टीका शीर्ष नेता ठाकुर उनीहरुभन्दा झन्डै तीन गुणा जेठा हुन्।
सर्लाही- २ बा स्वतन्त्र उम्मेदवार बनेका श्रवण साह २७ वर्षका भए भने अर्का उम्मेदवार सतीशकुमार चौधरी २८ वर्षका। उनीहरुको प्रतिस्पर्धा ८५ वर्षीय महिन्द्र राय यादविसँग हुनेछ।
रौतहट- १ बाट राष्ट्रिय स्वतन्त्र पार्टी नेपालका मिस्टर सूर्यदेव कोइराला, स्वतन्त्र उम्मेदवार राहुलकुमार मिश्र, मोहम्मद जिउल हक र नेपाल सुशासन पार्टीका रंजितकुमार पटेल उम्मेदवार छन्। उनीहरु सबैको उमेर ३० वर्ष मुनि छ। उनीहरुले ६९ वर्षीया एकिकृत समाजवादीका शीर्ष नेता माधवकुमार नेपालसँग प्रतिस्पर्धा गर्नुपर्नेछ।
यस्तै, रौतहट- ३ मा स्वतन्त्र उम्मेदवार २५ वर्षका सुरेश कुमार यादव छन्। उनीसँग प्रतिपर्धामा निकै पाको उमेका स्वतन्त्रकै महेन्द्रप्रसाद चौधरी छन्। चौधरी अहिले ७० वर्ष पुगिसकेका छन्।
पर्सा- १ का स्वतन्त्र उम्मेदवार २७ वर्षीया नौसाद अन्सारी लोकतान्त्रिक समाजवादी पार्टीका ७५ वर्षीय लक्ष्मणलाल कर्णसँग प्रतिस्पर्धामा छन्। उनीहरुबीच तीन गुणाको उमेर अन्तर छ।
काठमाडौं- ५ बाट स्वतन्त्र उम्मेदवार २७ वर्षीया रन्जु न्यौपाने नेकपा एमालेका शीर्ष नेता ६८ वर्षीय ईश्वर पोखरेलेसँग प्रतिस्पर्धा गर्नेछन्। रन्जुभन्दा ईश्वरको उमेर दुईगुणा भन्दा बढी धेरै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
