‘सिजन’मा पनि किन बढ्न सकेन सेयर बजार?

बैंक/बिमा/सेयर

सुमित्रा कार्की शनिबार, कात्तिक २६, २०७९ १८:२३

काठमाडौं– सेयर बजारमा लाभांशको ‘सिजन’ सुरु भएको छ। अहिले विभिन्न कम्पनीले गत आर्थिक वर्ष (२०७८–०७९) को नाफाबाट लगानीकर्तालाई धमाधम बोनस तथा नगद लाभांश वितरण गरिरहेका छन्। तर, पनि सेयर बजारमा उत्साहजनक माहोल देखिएको छैन।

यसैगरी, निर्वाचनको समयमा सेयर बजारमा उत्साह छाउने गरेको जानकारहरु बताउँछन्। आगामी मंसिर ४ गतेको निर्वाचनको चहल–पहल व्यापक रुपमा भइरहँदा यसले सेयर बजारमा खासै प्रभाव पार्न सकेको छैन।

सिजनको समयमा पनि सेयर बजारमा खासै उत्साह नदेखिनुमा अहिले बैंक तथा वित्तीय संस्थामा देखिएको तरलता अभाव, ब्याजदर वृद्धि उच्च हुँदै जानु लगायतका समस्या रहेको सेयर बजार जानकार विष्णुप्रसाद बस्याल बताउँछन्।

उनी भन्छन्, ‘तिहार अगाडिका केही साताहरुभन्दा तिहार पछाडिका केही हप्तामा सेयर बजारमा सुधार देखिएको छ। तर, अहिले हाम्रो आर्थिक क्षेत्रमा देखिएको समस्याको कारण बजार भनेजस्तो तरिकाले बढ्न सकेको छैन।’

सेयर बजार बढ्न बजारमा तरलता सहजरुपमा आउन थाल्नुपर्ने र निक्षेप तथा कर्जाको रेसियो अहिलेको तुलनामा घट्नुपर्ने उनको भनाइ छ।

उनी भन्छन्, ‘अहिले सेयर बजार अस्थिर भए पनि चुनावपछि भने बढ्नसक्ने केही आधार छन्। जस्तै, अहिले व्यापारीहरुले ब्याजदर घटाउनको लागि आन्दोलन गरिरहेका छन्, राष्ट्र बैंकले पनि चुनाव पछाडि तेस्रो त्रैमासिक मौद्रिक नीति समीक्षा सार्वजनिक गर्ने कुरा आइरहेको छ। यसमा ब्याजदर घटाउने विषयमा केही सकारात्मक कुराहरु आउन सक्छन्। जसकारण सेयर बजारलाई पनि केही राहत हुन्छ।’

साताको दोस्रो कारोबार दिनबाहेक चार कारोबार दिन घट्यो नेप्से?
नेप्से सूचक गत हप्ताको अन्तिम कारोबार दिन बिहीबार ११६.१४ अंकले घटेर १९२२.१६ बिन्दुमा आएको थियो। यस हप्ताको आइतबार भने गत बिहीबारको भन्दा सेयर बजार बढेको थियो।

यस हप्ताको पहिलो कारोबार दिन आइतबार नेप्से सूचक ४३.२० अंकले बढेर १९६५.३६ बिन्दुमा आएको थियो। आइतबार नेप्से सूचकमा देखिएको वृद्धि सोमबारसम्म कायम रहन सकेन। आइतबार बढेको नेप्से सूचकमा सोमबार फेरि गिरावट देखियो। सोमबार नेप्से सूचक ६.४३ अंकले घटेर १९५८.९४ बिन्दुमा आएको थियो।

सोमबार घटेको सेयर बजारले मंगलबार पनि निरन्तरता पायो। मंगलबार नेप्से सूचक २.५७ अंकले घटेर १९५६.३६ बिन्दुमा आयो। यसैगरी, बुधबार पनि सेयर बजार ओरालो यात्रामा नै रह्यो।

बुधबार नेप्से सूचक ३९.१५ अंकले घटेर १९१७.२२ बिन्दुमा आयो। बुधबारको घटेको सेयर बजार बिहीबार पनि घट्यो। बिहीबार नेप्से सूचक २३.५२ अंकले घटेर १८९३.७० बिन्दुमा अडिएको छ।

दुई अर्ब रुपैयाँ सम्मको कारोबार
सेयर बजारमा कारोबार हुने रकम पनि पछिल्लो केही सातायता न्यूनतम १ अर्बदेखि अधिकतम २ अर्ब रुपैयाँमा सीमित भएको छ। यस साताको पहिलो कारोबार दिन आइतबार १ अर्ब ५४ करोड ८० लाख ३२ हजार रुपैयाँ बराबरको सेयर कारोबार भएकोमा साताको दोस्रो कारोबार दिन सोमबार कारोबार रकम ह्वात्तै बढेर २ अर्ब १० करोड ९१ लाख ६३ हजार रुपैयाँ बराबरको पुगेको थियो।

यस साता सबैभन्दा धेरै रकमको सेयर किनबेच भएको सोमबार हो। त्यसपछिका कारोबार दिनमा कारोबार रकम पनि घट्दो छ। साताको तेस्रो कारोबार दिन मंगलबार सेयर बजारमा १ अर्ब ५ करोड ३१ लाख ३७ हजार रुपैयाँ बराबरको कारोबार भयो। यस दिनको कारोबार रकमभन्दा साताको चौथो कारोबार दिन बुधबार केही बढेको देखिन्छ।

बुधबार सेयर बजारमा १ अर्ब ४० करोड ७३ लाख ९५ हजार रुपैयाँ बराबरको कारोबार भएको छ। साताको अन्तिम तथा पाचौं कारोबार दिन बिहीबार १ अर्ब ११ करोड १९ लाख ४६ हजार रुपैयाँको मात्र कारोबार भएको नेप्सेले जनाएको छ।

यस साता सबैभन्दा धेरै कमाउने पाँच कम्पनी
यस साता सबैभन्दा धेरै कमाउने पहिलो कम्पनी नेस्डो लघुवित्त वित्तीय संस्था रहेको छ। यो संस्थाको सेयरमूल्य यससाता ११.९६ प्रतिशतले बढेको छ।

यसैगरी, धेरै कमाउने दोस्रो कम्पनी हो–जाल्पा सामूदायिक लघुवित्त वित्तीय संस्था। यसको सेयरमूल्य यो साता ११.४२ प्रतिशतले बढेको छ।

यस्तै, लाइफ इन्स्योरेन्स कर्पोरेशन नेपाल कम्पनी पनि यस साता धेरै कमाउने कम्पनी मध्येको एक हो। यस कम्पनीको सेयरमूल्य यससाता ५.९३ प्रतिशतले बढेको छ।

चौथो कम्पनीमा छिमेकी लघुवित्त वित्तीय संस्था हो। यस कम्पनीको सेयरमूल्य यससाता ४.११ प्रतिशतले बढेको छ। सबैभन्दा धेरै कमाउने पाचौं कम्पनीमा नेपाल रिइन्स्योरेन्स कम्पनी हो। यसको सेयरमूल्य यस साता ३.९७ प्रतिशत बढेको छ।

सबैभन्दा धेरै गुमाउने पाँच कम्पनी
सबैभन्दा धेरै गुमाउने पहिलो कम्पनी किसान लघुवित्त वित्तीय संस्था हो। यसको सेयरमूल्य यो हप्ता १०.४० प्रतिशतले ओरालो लागेको छ। यस्तै दोर्दी खोला जलविद्युत् कम्पनीको सेयरमूल्य यस साता ८.५९ प्रतिशतले घटेको छ भने तेह्रथुम वावर कमपनीको सेयरमूल्य ८.५० प्रतिशतले घटेको छ।

सबैभन्दा धेरै गुमाउने चौथो कम्पनी कर्पोरेट विकास बैंक हो। यसको सेयरमूल्य यससाता ८.४६ प्रतिशतले घटेको छ। यसका साथै उस साता मल्पिर्पोज फाइनान्स कम्पनीको सेयरमूल्य पनि ७.९४ प्रतिशतले घटेको छ।