काठमाडौं– नेपाली राष्ट्रिय क्रिकेट टिमका नवनियुक्त कप्तान रोहित पौडेललाई प्रधानमन्त्री शेरबहादुर देउवाले बधाई दिएका छन्।
सामाजिक सञ्जाल टुइटरमार्फत् प्रधानमन्त्री देउवाले बधाई दिँदै नेपाली क्रिकेटले अझै सफलता हासिल गर्ने विश्वास व्यक्त गरेका छन्।
‘नेपाली क्रिकेट टोलीको कप्तानमा नियुक्त हुनु भएकोमा रोहित पौडेलजीलाई हार्दिक बधाई तथा सफल कार्यकालको शुभकामना,’ प्रधानमन्त्रीले लेखेका छन्, ‘तपाईंको नेतृत्वमा नेपाली क्रिकेटले अझै सफलता हासिल गर्नेछ।’
नेपाल क्रिकेट संघ (क्यान) ले शुक्रबार रोहितलाई कप्तान नियुक्त गरेको थियो। ब्याट्सम्यान रोहित यसअघि नेपालको उपकप्तान रहेका थिए।
नाबालिगलाई बलात्कारको आरोप लागेपछि क्यानले नियमित कप्तान सन्दीप लामिछानेलाई निलम्बन गरेको थियो।बलात्कारको आरोपमा लामिछाने जिल्ला अदालत काठमाडौंको आदेशले पुर्पक्षका लागि थुनामा रहेका छन्।
नेपालले रोहितको कप्तानीमा घरेलु मैदानमा युएईसँग तीन खेलको एकदिवसीय अन्तर्राष्ट्रिय सिरिज खेल्ने छ। पहिलो एकदिवसीय नोभेम्बर १४ मा हुँदै छ। यस्तै दोस्रो एकदिवसीय नोभेम्बर १६ र अन्तिम तथा तेस्रो एकदिवसीय नोभेम्बर १८ मा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
