निर्वाचन विशेष

सुर्खेतका २० वटा मतदानस्थल अति संवेदनशील

रासस सोमबार, कात्तिक २१, २०७९ १०:१०

प्रतिकात्मक तस्बिर

सुर्खेत– सुर्खेतमा निर्वाचनका लागि कायम रहेका २० मतदानस्थललाई अति संवेदनशीलको सूचीमा राखिएको छ। जिल्लामा १३९ मतदान स्थल रहेका छन्।

जिल्ला सुरक्षा समितिका अनुसार ८६ संवेदनशील र ३३ कम संवेदनशील छन्। यसअनुसार निर्वाचन क्षेत्र नम्बर १ मा कायम रहेका ७२ मतदानस्थलमध्ये ९ अति संवेदनशील, ६० वटा संवेदनशील र तीन कम संवेदनशील छन्।

त्यस्तै, निर्वाचन क्षेत्र नम्बर २ मा ६७ मतदानस्थलमध्ये ११ अति संवेदनशील, २६ संवेदनशील र ३० कम संवेदनशील रहेको जिल्ला सुरक्षा समितिका संयोजकसमेत रहेका सुर्खेतका प्रमुख जिल्ला अधिकारी खगेन्द्रप्रसाद रिजालले जानकारी दिए। सुरक्षा समितिले निर्वाचन क्षेत्र नम्बर १ (१) मा सात वटा अति संवेदनशील, २४ संवेदनशील, (२) मा र दुई अति संवेदनशील, ३६संवेदनशील र तीन मतदानस्थललाई कम संवेदनशीलको सूचीमा राखेको छ।

त्यसैगरी निर्वाचन क्षेत्र नम्बर २ (१) मा ७ अति संवेदनशील र संवेदनशील मतदानस्थल छैनन् भने कम संवेदनशील २४ मतदानस्थल रहेका छन्। त्यस्तै (२) मा ११ अति संवेदनशील, २६ संवेदनशील र ६ मतदानस्थल कम संवेदनशील छन्। निर्वाचन सुरक्षा चुनौती कम गर्न मतदानस्थलको सुरक्षाका लागि आवश्यक काम भइसकेको र संवेदनशील, संवेदनशील र कम संवेदनशील मतदानस्थल वर्गीकरण गरेर तत्काल थप सुरक्षाकर्मी पुग्ने गरी रणनीति तयार गरिएको प्रजिअ रिजालले बताए।

प्रतिनिधि सभाका दुई र प्रदेश सभाका चार निर्वाचन क्षेत्र रहेको जिल्लामा संवेदनशीलरुपमा लिइएका मतदानस्थललाई नेपाल प्रहरीले अहिलेदेखि नै निगरानी गरिरहेको पनि प्रजिअ रिजालले जानकारी दिए। मंसिर ४ गते हुने प्रदेश तथा प्रतिनिधि सभा निर्वाचनका लागि सुर्खेत जिल्लामा प्रतिनिधि सभाका दुवै निर्वाचन क्षेत्रमा सशस्त्र प्रहरी बलका डिएसपीको कमाण्डमा सशस्त्र प्रहरी परिचालन भइसकेको पनि प्रजिअ रिजालले जानकारी दिए।

सुर्खेतको पूर्वसिम्ता गाउँपालिकादेखि पश्चिम चौकुने गाउँपालिकासम्मका सुरक्षा संवेदनशीलता मानिएका मतदानस्थलको सुरक्षाका लागि नेपाली सेना, नेपाल प्रहरी, सशस्त्र प्रहरीको संयुक्त टोली तयारी अवस्थामा राखिने जनाइएको छ।

निर्वाचनमा खटिँदै २ हजार ३४४ कर्मचारी
निर्वाचन प्रयोजनका लागि सुर्खेतमा २ हजार ३४४ जना कर्मचारी खटिने भएका छन्। कर्णाली प्रदेश निर्वाचन कार्यालय सुर्खेतका सूचना अधिकारी कुमार ज्ञवालीले आवश्यकताअनुसार थप कर्मचारी र स्वयमसेवक खटाउन सकिने पनि जानकारी दिए।

सूचना अधिकारी ज्ञवालीका अनुसार ५०० मतदाता भएको केन्द्रमा एक सहायक कर्मचारी र ५०० भन्दा बढी मतदाता भएको मतदान केन्द्रमा दुई सहायक कर्मचारी र प्रत्येक मदतान केन्द्रमा एक–एक कार्यालय सहयोगी खटिनेछन्।

उनले मतदानस्थल र मतदान केन्द्रमा खटिनेमा निजामती कर्मचारी, सरकारी स्वामित्वका संस्थानका कर्मचारी रहेको जानकारी दिए। प्रतिनिधि सभाका २ र प्रदेश सभाका ४ वटा निर्वाचन क्षेत्र रहेको सुर्खेतमा १३९ मतदानस्थल र २९३ मतदान केन्द्र कायम गरिएको छ।

प्रदेश निर्वाचन कार्यालयका अनुसार निर्वाचन क्षेत्र नम्बर १ मा ७२ मतदानस्थल र १४४ मतदान केन्द्र कायम गरिएको छ भने निर्वाचन क्षेत्र नम्बर २ मा ६७ मतदानस्थल र १४९ मतदान केन्द्र कायम गरिएको छ। प्रदेश निर्वाचन कार्यालयका अनुसार निर्वाचन क्षेत्र नम्बर १ (१) मा ३१ मतदानस्थल र ६४ मतदान केन्द्र तोकिएको छ भने (२) मा ४१ मतदानस्थल र ८० मतदान केन्द्र तोकिएको निर्वाचन कार्यालयले जनाएको छ।

कार्यालयका अनुसार निर्वाचन क्षेत्र नम्बर २ (१) मा २४ मतदानस्थल र ७३ मतदान केन्द्र तोकिएको छ भने (२) मा ४२ मतदानस्थल र ७६ मतदान केन्द्र कायम गरिएको कर्णाली प्रदेश निर्वाचन कार्यालयका सूचना अधिकारी ज्ञवालीले जानकारी दिए।