बलेवा- बागलुङमा गत असोज २९ गते राति ४२ वर्षीया फुलमाया बोटे (माझी) मृतावस्थामा फेला परिन्। उनी बागलुङ-पोखरा राजमार्गअन्तर्गत बागलुङ नगरपालिका–१ मा पर्ने गणेश घुम्तीमाथि मृत फेला परेकी थिइन्।
परिवारले उनलाई भेट्दा घाँटीमा सल बेरिएको थियो। हतारहतार परिवारले अस्पताल पुर्यायो तर उनको मृत्यु भइसकेको थियो।
सधैँ समयमै घरमा आउने फूलमाया त्यो दिन समयमा घर नफर्किएपछि परिवारले खोजी थालेको थियो। मजदूरी गरेर खाने फूलमाया सधैँ साँझ साढे ५ बजे घर पुग्थिन्। ढिला भए फोन आउँथ्यो तर त्यो दिन घर पुग्ने समयमा उनको मोबाइल बन्द भयो।
त्यसपछि खोजी थालेको परिवारले उनी सधैँ हिँड्ने गरेको बाटोमा शव भेट्टायो। शव अस्पताल पुर्याएपछि परिवारले प्रहरीलाई खबर गरेको थियो। मृतकको शव अस्पतालमै भए पनि प्रहरीले तत्कालै घटनास्थल सिल गर्यो।
जिल्ला प्रहरी कार्यालय बागलुङबाट प्रहरी निरीक्षक राजाराम खड्का नेतृत्वको टोली घटनास्थल पुग्यो। अस्पतालमा शव हेरेर घटनास्थल पुगेको प्रहरीले हत्याको आशङ्का गर्यो र सुरु भयो अनुसन्धान। गत असोज २९ गते प्रहरी नायव उपरीक्षक गङ्गाबहादुर थापा नेतृत्वमा पोखराबाट विशेषज्ञ टोलीसहितले अनुसन्धान थाल्यो।
'उहाँहरूले अस्पताल पुर्याएपछि खबर गरेको भए पनि हामीले तत्कालै घटनास्थल सिल गर्यौं र खोजी सुरु भयो', थापा भन्छन्, 'मृतक भेटिएको ठाउँभन्दा एक सय मिटर टाढाको दूरीमा पाँच सयभन्दा बढी मान्छेको भीड थियो, हत्यामा संलग्नको खोजी चुनौतीपूर्ण थियो।'
बाङ्गेचौर खेलमैदान नजिकै नवौँ राष्ट्रिय खेलकुदअन्तर्गत ‘आइटिएफ तेक्वान्दो खेल भइरहेको थियो। तर बाङ्गेचौरदेखि बागलुङ पोखरा सडकसम्मको पदमार्गको बीचमा फूलमायाको हत्या भएको थियो।
प्रहरीका अनुसार हत्या र लुटपाट साँझ ५ देखि ५:५२ मा भएको हो। एक साता लामो अनुसन्धानपश्चात् प्रहरीले अभियुक्त पक्राउ गरेको छ। घटनास्थलको बाटो भएर हिँडेका केही बालबालिका, धौलागिरि बहिरा आवासीय माविको सिसिटिभी र अनुसन्धानका अन्य विधिहरूले प्रहरीलाई सघाए।
'फूलमायाको हत्या हुनुपूर्व सोही बाटोमा हिँडेका बालकहरूलाई पहिला पहिचान गर्यौं, सोधीखोजीमा उनीहरूले बाटोमा दाह्रीवाला हिँडेको बताएपछि हाम्रो अनुसन्धान दाह्रीमा केन्द्रित भयो', थापाले भने, 'अन्ततः दारी पालेकै प्रकाश योगी पक्राउ परे।' प्रहरीले बागलुङ नगरपालिका–१ माझीबस्तीकै मृतकका छिमेकी २६ वर्षीया प्रकाश योगीलाई हत्या आरोपमा पक्राउ गरेको छ।
'प्रविधिको प्रयोगले बाटो वरपरको परिवेश नियाल्यौँ, दाह्री पालेका केहीलाई निगरानीमा राख्यौँ, अभियुक्त घटनास्थलभन्दा केही माथि लामो समय बसेको, नमिल्दा हर्कत गरेको देखेपछि शङ्का गरेका थियौँ', प्रहरी उपरीक्षक दयानिधि ज्ञवाली भन्छन्, 'दाह्री पालेको र अरू हुलिया खोज्दा फेला परेका प्रकाश नै हत्यामा संलग्न भएको निष्कर्षमा प्रहरी पुगेको छ।'
अभियुक्तले प्रहरीलाई दिएको बयानअनुसार व्यक्तिगत रिसइवी, आर्थिक अभाव र मदिरापानले लठ्ठिएका कारण हत्या गरेको स्वीकार गरेका छन्। बागलुङ बजारमा मजदूरी गरेर फर्किएकी फूलमायाको बाङ्गेचौरमा गौँडो कुरेर पछाडि लागेर केही तल पुगेपछि हत्या गरेको उनले स्वीकार गरेको ज्ञवालीले बताए।
अभियुक्त पनि मजदूरी गरेर छाक टार्ने परिवारकै सदस्य हुन्। 'उसले पहिले फूलमायाकै सल घाँटीमा बेरेको छ, हत्यापछि गहना लुछ्ने, मोबाइल अफ गर्ने र करणी गर्ने काम गरेको स्वीकार गरेको छ', ज्ञवाली भन्छन्, 'आर्थिक अवस्थाकै कारण हत्यामा संलग्न भएको हुनुपर्छ, मदिरा र रिसइवीले त्यसमा सघायो।'
प्रहरीसँगको बयानमा अभियुक्तले ३० हजार ऋण तिर्न बाँकी रहेको र उपाय केही नभएकाले गहना लुट्न हत्या गरेको बताएका छन्। छिमेकी भएकाले एउटै धाराको पानी प्रयोग गर्ने, एक वर्षदेखि पानीको महसुल तिर्न नसकेको भन्दै फूलमायाले अभद्र व्यवहार गर्ने गरेको पनि उनले प्रहरीलाई बताएका छन्।
योगीले फूलमायाले कानमा लगाएका सुनका मुन्द्रा लुटेका थिए। ती मुन्द्रा भने प्रहरीले भेटाएको छैन। हत्यामा संलग्न भएको समयमा अभियुक्तले लगाएका कपडा, चप्पललगायतका प्रमाणहरू जुटेको ज्ञवालीले बताए।
मृतक फूलमायाका स-साना तीन छोराछोरी र श्रीमान् छन्। अभियुक्त प्रकाशको घरमा बाबुआमा मात्रै छन्। योगीका विरुद्धमा ज्यान मुद्दा दर्ता गरेर जिल्ला अदालत बागलुङबाट १० दिनको म्याद थप गरी अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
