निर्वाचन विशेष

सुदूरपश्चिमका दुई उम्मेदवारलाई आयोगले सोध्यो स्पष्टीकरण

शेरबहादुर ऐर शुक्रबार, कात्तिक ४, २०७९ २१:००

धनगढी । सुदूरपश्चिम प्रदेशका दुई उम्मेदवारलाई निर्वाचन आयोगले स्पष्टीकरण सोधेको छ। निर्वाचन आचारसंहिताविपरीत गतिविधि गरेको र आयोगमाथि लाञ्छना लगाएको भन्दै दुई जनालाई आयोगले स्पष्टीकरण सोधको हो।

आयोगले कैलाली क्षेत्र नम्बर ४ प्रदेश सभा २ बाट उम्मेदवार बनेका नेपाली कांग्रेसका वीरबहादुर बलायर र बझाङ क्षेत्र नम्बर १ का उम्मेदवार बनेका नेकपा –एमाले)का ऐनसिंह महरलाई स्पष्टीकरण सोधेको छ।

बलायरले बिहीबार आयोजित चुनावीसभालाई सम्बोधन गर्ने क्रममा आयोग र आयोगका पदाधिकारीमाथि लाञ्छनापूर्ण अभिव्यक्ति दिएको भन्दै आयोगले शुक्रबार उनलाई २४ घण्टे स्पष्टीकरण सोधेको हो।

‘तपाईँले आफ्नो निर्वाचन क्षेत्रमा गत बिहीबार आयोजित कार्यक्रममा निर्वाचन आयोग नेपाल र यसका पदाधिकारीहरू उपर लाञ्छनापूर्ण अभिव्यक्ति दिनुभएको सूचना र सोलाई पुष्टि गर्ने सामग्री आयोगमा प्राप्त भइसकेको सन्दर्भमा तपाईँले उक्त अभिव्यक्ति दिनुभएको होइन भन्ने आधार र प्रमाण के छ ?,’ आयोगले बलायरलाई सोधेको छ।

उनलाई आयोगले पत्र प्राप्त भएको २४ घण्टाभित्र निर्वाचन आयोग वा प्रदेश निर्वाचन कार्यालय कैलालीमा स्पष्टीकरण पेश गर्न भनेको छ।

‘नेकपा (एकीकृत समाजवादी)का अध्यक्ष माधवकुमार नेपालले रौतहटको चुनावीसभालाई सम्बोधन गर्दै बोलेको सामान्य शब्दलाई लिएर निर्वाचन आयोगले पत्र काट्यो । हामीले इमानदारीपूर्वक निर्वाचन आयोगको आचारसंहितामा हस्ताक्षर गरेका छौँ । उल्लंघन गर्दैनौँ र गर्न पनि दिँदैनौँ । तर, केपी ओलीको इशारामा प्रमुख निर्वाचन आयुक्त दिनेशकुमार थपलियाले उच्छृंखल गतिविधि गर्दैछन्,’ बलायरले बिहीबारको चुनावीसभामा भनेका थिए।

यस्तै, नेकपा (एमाले)का महरले बझाङमा भइरहेको जिल्ला स्तरीय खुला प्रतियोगितामा प्रथम पुरस्कार प्रदान गरेको जनाइएको छ।

आयोगको पत्रमा भनिएको छ, ‘तपाईँले जिल्ला स्तरीय खुला प्रतियोगिताका विजेतालाई प्रथम पुरस्कारको रुपमा नगद ४१ हजार प्रदान गरेको भनी सामाजिक सञ्जालमा सार्वजनिक भएको साथै सो विषयमा आयोगमा लिखित उजुरीसमेत परेको विषयमा आयोगको ध्यानाकर्षण भई यो पत्र लेख्ने कार्य भएको छ ।’

निर्वाचन आचारसंहिता ०७९ को दफा ४ को खण्ड (न)मा ‘कसैले पनि कुनै प्रकारले विर्नाचनको स्वच्छता वा निष्पक्षतालाई प्रभावित गर्ने गरी कुनै कार्य गर्न नहुने’ व्यवस्था छ भने (झ)मा विभिन्न क्लब, सामाजिक संस्था, धार्मिक संस्था, आम समूह, गैरसरकारी संस्था, आश्रमजस्ता संस्था वा कुनै व्यक्तिलाई नगद वा जिन्सी वितरण गर्न अनुदान, आर्थिक सहायता, चन्दा, पुरस्कार वा निर्वाचन खर्च वा बुथ खर्च दिन वा दिने घोषणा गर्न नहुने’व्यवस्था छ ।