रुपन्देही २ मा सत्ता गठबन्धन उम्मेदवारविहीन, राजु गुरुङको उम्मेदवारी बदर हुने निर्णय ‘सदर’

राजनीति

नेपाल लाइभ शुक्रबार, कात्तिक ४, २०७९ १७:५४

काठमाडौं– सत्तारुढ गठबन्धन रुपन्देही क्षेत्र नम्बर २ मा प्रतिनिधि सभाको उम्मेदवारविहीन बन्ने भएको छ। गठबन्धनमा जुटेको सहमतिअनुसार उक्त क्षेत्र नेकपा एकीकृत समाजवादीको ‘भाग’मा परेको थियो।

एकीकृत समाजवादीले राजु गुरुङलाई उम्मेदवार बनाउने निर्णय गरेको थियो। तर, मुख्य निर्वाचन अधिकृतको कार्यालय रुपन्देहीले चेक बाउन्स प्रकरणमा उच्च अदालत पाटनमा मुद्दा चलिरहेको भन्दै गुरुङको उम्मेदवारी बदर गरेको थियो।

आफ्नो उम्मेदवारी बदर गर्ने मुख्य निर्वाचन अधिकृत कार्यालयको निर्णयविरुद्ध गुरुङले सर्वोच्च अदालतमा रिट दायर गरेका थिए। रिटमाथि सुनुवाइ गर्दै सर्वोच्च अदालतले आइतबार उम्मेदवारी बदर गर्ने निर्णय कार्यान्वयन नगर्न भन्दै अल्पकालीन अन्तरिम आदेश जारी गरेको थियो।

अन्तरिम आदेश जारी हुने नहुने सन्दर्भमा दुवै पक्षसँगको छलफलपछि शुक्रबार सर्वोच्च अदालतले अन्तरिम आदेश निरन्तर नहुने आदेश गरेको छ। सर्वोच्चको पछिल्लो आदेशपछि गुरुङको उम्मेदवारी खारेज गर्ने मुख्य निर्वाचन अधिकृतको कार्यालयको निर्णय स्वत: कार्यान्वयन हुने भएको हो।

सर्वोच्च अदालतका न्यायाधीशद्वय ईश्वरप्रसाद खतिवडा र कुमार रेग्मीको शुक्रबारको इजलासले प्रतिनिधि सभा निर्वाचन निर्वाचन ऐन २०७४ को दफा १३ अनुसार गुरुङ निर्वाचनमा उम्मेदवार हुन नपाउने ठहर गरेको हो।

प्रतिनिधि सभा निर्वाचन निर्वाचन ऐन २०७४ को दफा १३ मा ‘प्रचलित कानुन बमोजिम’ कालो सूचीमा रहेका व्यक्ति निर्वाचनमा उम्मेदवार हुन नपाउने व्यवस्था छ।

नेपाल इन्फ्रा प्रालिका प्रमोटर डाइरेक्टर सेयर होल्डर तथा अध्यक्ष समेत रहेका गुरुङलाई चेक बाउन्सको मुद्दामा कालो सूचीमा राखिएको थियो।

‘...कानुनद्वारा तोकिएको कालोसूचीमा नाम समावेश रहेकोसम्वन्धी अयोग्यता निवेदक राजु गुरुङमा कायम रहेको देखिँदा निजले प्रतिनिधिसभा सदस्य पदको निर्वाचनमा उम्मेदवार हुन पाउने अवस्था देखिएन। कालो सूचीमा नाम कायम रहेका व्यक्तिले उल्लिखित निर्वाचनमा उम्मेदवार हुन नपाउने भएकाले निवेदन माग बमोजिम अन्तरिम आदेश जारी गर्न मिलेन...,’ न्यायाधीश खतिवडा र रेग्मीको इजलासले जारी गरेको आदेशमा भनिएको छ।

रुपन्देही–२ मा नेकपा एमालेबाट उपाध्यक्ष विष्णु पौडेल उम्मेदवार छन्। गठबन्धनका उम्मेदवार गुरुङको उम्मेदवार बदर भएपछि पौडेललाई सहज हुने भएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सिन्धुलीमा १८९ किलो गाँजासहित एक जना पक्राउ

अमेरिकाको भर्जिनियामा चार नेपाली सवार कार दुर्घटना हुँदा दुईजनाको मृत्यु

काठमाडौं महानगरका ४९७ पसल अनुगमन गर्दा २० वटामात्रै मापदण्ड अनुसारका