काठमाडौं– आगामी मंसिर ४ गते हुने प्रदेश तथा प्रतिनिधि सभा निर्वाचनका लागि नेपाली कांग्रेसले घोषणापत्र लेखनको कार्य अन्तिम चरणमा पुर्याएको छ।
घोषणापत्र लेखनका लागि गठित समितिले तयार पारेको ड्राफ्ट केन्द्रीय कार्यसम्पादन समितिमा पेस भएको थियो। समितिको शुक्रबारको बैठकले केन्द्रीय सदस्यहरुको सुझाव समेत समेट्दै ड्राफ्ट पारित गरेको थियो। समितिले शनिबार साँझसम्म केन्द्रीय सदस्यहरुलाई घोषणापत्रका लागि सुझाव दिने समय पनि तोकेको थियो।
यसअघि घोषणापत्र मस्यौदा समितिले अनलाईनसहित अन्य माध्यमहरुबाट पनि सुझाव संकलन गर्ने काम गरेको थियो।
कांग्रेसको घोषणापत्र समितिका प्रवक्ता तथा सहमहामन्त्री जीवन परियारले अबको १/२ दिनमा घोषणापत्र लेख्ने काम सकिने बताए। ‘हामीले ड्राफ्टहरुलाई अन्तिम रुपमा हेरर घोषणापत्र लेख्ने काम अगाडि बढाएका छौं,’ परियारले भने, ‘१ देखि २ दिन सम्ममा घोषणापत्र लेख्ने काम सकिएपछि हामी सार्वजनिक गर्ने मिति तय गर्छौं।’
नेपाली कांग्रेसले महामन्त्री विश्वप्रकाश शर्माको नेतृत्वमा गत भदौ २२ गते घोषणापत्र निर्माण समिति गठन गरेकाे थियाे। महामन्त्री शर्माको नेतृत्वमा रहेको घोषणापत्र निर्माण समितिअन्तर्गत विभिन्न उपसमितिहरु पनि गठन गरिएको थियो।घोषणापत्रको मस्यौदा लेख्नका लागी अर्थविद् डा स्वर्णिम वाग्लेको नेतृत्वमा उपसमिति छ। यही उपसमितिले ४ मंसिरको निर्वाचनका लागी घोषणापत्र लेख्ने काम गर्दै छ।
प्रवक्ता परियारले गत ५ वर्षको सम्पूर्ण समीक्षासहित ०४८ सालदेखि कांग्रेस नेतृत्वको सरकारले गरेका मुख्य काम र निर्वाचनपछि कांग्रेस नेतृत्वमा बन्ने सरकारको रोडम्याप सहितको घोषणापत्र तयार भइरहेको बताए। ‘निरन्तरतामा नवीनता’ दिने संकल्पअनुसार घोषणापत्र तयार हुने लागेको परियारको भनाइ छ।
‘मूलत: घोषणापत्रमा हामीले ०७४ को निर्वाचनपछि तत्कालीन केपी ओली नेतृत्वको सरकारले संसदीय शासन प्रणालीकै विरुद्धमा गरेका गतिविधि र सरकारले गरेका कामहरुका बारेमा पनि उल्लेख गर्न लागेका छौं,’ परियारले भने, ‘ओली सरकारले के गर्यो भन्ने कुरा जनतालाई बताउँदै काग्रेसले के गर्छ भन्ने जानकारी एक साथ दिन चाहेका छौं।’
घोषणापत्र मस्यौदा समितिका सदस्य प्रताप पौडेलले कांग्रेसको घोषणापत्र ३ खण्डमा तयार हुन लागेको जानकारी दिए। पौडेलले पहिलो खण्डमा समसामयिक राजनीति, अजेन्डा र दृष्टिकोण, दोस्रो खण्डमा समुन्नत नेपालको मार्गचित्र प्रस्तुत गर्नेगरी फराकिलो आर्थिक सामर्थ्यको विषय र तेस्रो खण्डमा क्षेत्रगत प्राथमिकताका विषय रहेने पौडेलले जानकारी दिए।
पौडेलका अनुसार घोषणापत्रको पहिलो खण्डमा समसमायिक राजनीति, दोस्रो खण्डमा कांग्रेसको आगामी ५ वर्षको कार्ययोजना र तेस्रो खण्डमा कांग्रेसले दूरगामी रुपमा लिएको आर्थिक सामाजिक नीतिका बारेमा उल्लेख हुनेछ।
पहिलो खण्डमा संविधान र सुशासनबारे कांग्रेस नेतृत्वको दृष्टिकोणसहित वर्तमान सरकार आइसकेपछि कोरोना नियन्त्रण र संसद् पुन:स्थापनापछि संसद् र सकारकामार्फत् भएका नागरिकता विधेयकलगायत महत्वपूर्ण विषयहरु समेटिने छ। दोस्रो खण्डमा नेपालको अगामी ५ वर्षको मार्गचित्रसहित ५ वर्षको रणनीति र सन् २०३० सम्म अन्तर्राष्ट्रिय रूपमा नेपाल आबद्ध भएकाे दिगो विकासकाे लक्ष्यका विषयले निरन्तरता पाउने गरी सैद्धान्तिक आधार प्रस्तुत हुनेछ ।
दोस्रो खण्डलाई ‘फराकिलो आर्थिक सामर्थ्य’ शीर्षक राखेर उल्लेख गरिनेछ । क्षेत्रगत प्राथमिकता तोकिने तेस्रो खण्डमा१० विषयमा वित्तीय व्यवस्थाको आकलनसहितका विकास योजना रहने छन्।
क्षेत्रगत प्राथमिकताका लागी घोषणापत्र निर्माण समितिले ७ वटै प्रदेशका कांग्रेसका समितिहरुसँग छलफल गरेको छ। यस्तै, सम्बन्धित क्षेत्रका विज्ञहरुसँग पनि समितिले छलफल गरेर सुझाव लिएकाे छ।
घोषणापत्रमा सुशासनलाई प्राथमिकतामा राखिएको पौडेलले बताए। ‘आर्थिक सुशासनलाई प्राथमिकतामा राखेर युवा, रोजगारी र उद्यमशीलताका आर्थिक एजेन्डाहरु समेटेका छौँ,’ पौडेलले भने।
शिक्षा तथा स्वास्थ्यका सन्दर्भमा कांग्रेसको योजना, ‘कोखदेखि शोकसम्म’ भन्ने एकीकृत सामाजिक सुरक्षा कार्यक्रम, कोरोनापछिको विकास र जलवायु परिवर्तन तथा तत्कालीन आर्थिक अजेन्डासहितको नयाँ सम्भावनाको क्षेत्रहरुका बारेमा पनि घोषणापत्रमा उल्लेख गर्न लागीएको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
