नवौँ राष्ट्रिय खेलकुद : महिला फुटबलमा सशस्त्र प्रहरी र गण्डकी प्रदेश विजयी

फुटबल

रासस शुक्रबार, असोज २८, २०७९ २०:०१

वालिङ- नवौँ राष्ट्रिय खेलकुद प्रतियोगिताअन्तर्गत महिला फुटबल प्रतियोगितामा सशस्त्र प्रहरी र गण्डकी प्रदेश विजयी भएका छन्।

सुदूरपश्चिम प्रदेश र मधेz प्रदेशबीच आज स्याङ्जाको वालिङ नगरपालिका-८ स्थित खेल मैदानमा भएको अन्तिम खेल भने गोलरहित बराबरीमा सकिएको छ।

सशस्त्र प्रहरीले प्रदेश नं १ लाई ७-१ गोल अन्तरले पराजित गरेको हो। सशस्त्रको जितका लागि सावित्रा भण्डारीले दोहोरो ह्याट्रिक गरिन्। उनले खेलको २२, ४०, ४५, ५१, ५८ र ६५ मिनेटमा गोल गरेकी हुन्।

६०औँ मिनेटमा अनिता केसीले सशस्त्रका लागि एक गोल गरिन्। साबित्राले पहिलो गोल गरेको दुई मिनेटमै प्रदेश १ की अञ्जना थुलुङ्गे राईले एक गोल गरेकी थिइन्।

दोस्रो खेलमा गण्डकी प्रदेशले कर्णाली प्रदेशलाई ३-० गोलले पराजित गरेको छ। गण्डकी प्रदेशका लागि प्रतियोगिताको ३३औँ मिनेटमा शान्ता नेपालीले पहिलो गोल गर्दै अग्रता दिलाएकी हुन्।

उदया थापाले दुई गोल गरिन्। उनले प्रतियोगिताको ५८औँ र ६६औँ मिनेटमा दोस्रो र तेस्रो गोल गरेर जित सुनिश्चित गरेकी हुन्।

अन्तिम प्रतियोगिता सुदूरपश्चिम प्रदेश र मधेश प्रदेशबीच निर्धारित समयमा दुवै टिमबाट कुनै पनि गोल हुन सकेन र खेल बराबरीमा टुङ्गियो। मधेश प्रदेश हिजो त्रिभुवन आर्मी क्लबसँग ६-० गोल अन्तरले पराजित भएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।