काठमाडौं- मंसिर ४ गते हुने प्रतिनिधि तथा प्रदेश सभा निर्वाचनमा २०४८ सालमै सांसद बनिसकेका १८ जना नेता प्रत्यक्ष प्रणालीबाट मैदानमा उत्रिएका छन्।
यीमध्ये उमेरले सबैभन्दा पाका भने महन्थ ठाकुर र रामचन्द्र पौडेल छन्। उनीहरु २०४८ सालमा चुनाव लड्दा ४८ वर्षका थिए।
पौडेल तनहु- १ बाट नेपाली कांग्रेसका उम्मेदवार बनेका छन् भने ठाकुर महोत्तरी- ३ लोकतान्त्रिक समाजवादी पार्टीबाट।
उनीहरु पछि उमेरले पाका प्रधानमन्त्री तथा कांग्रेस सभापति शेरबहादुर देउवा हुन्। जसले डडेल्धुराबाट यसपल्ट पनि चुनाव जितेमा ७ पटक सांसद बन्नेछन्। देउवा डडेल्धुराबाट पहिलो पटक सांसद बन्दा ४४ वर्षका थिए।
एमाले अध्यक्ष केपी शर्मा ओलीले २०४८ सालमा झापा- ६ बाट चुनाव जित्दा ३८ वर्षका थिए। उनी अहिले झापा- ५ बाट उम्मेदवार बन्दैछन्।
त्यसैगरी इलामबाट फेरि सांसद बन्ने तयारीसहित एकीकृत समाजवादीका तर्फबाट उम्मेदवारी दिएका झलनाथ खनाल ४० वर्षमा पहिलो पटक सांसद बनेर प्रतिनिधि सभामा पुगेका थिए। त्यो बेला उनले नेकपा एमालेबाट चुनाव लडेका थिए।
गृहमन्त्री बालकृष्ण खाँण २०४८ सालमा रुपन्देही- ३ बाट निर्वाचित भएका थिए। त्यो समय ३० वर्षका उनी यस पल्ट पनि सोही क्षेत्रमा नेपाली कांग्रेसका उम्मेदवार छन्। त्यसैगरी नेकपा एमालेका नेता तथा पूर्वमन्त्री बसन्तकुमार नेम्वाङ त्यो बेला पाँचथर- १ बाट निर्वाचित भएका थिए। अहिले उनी पाँचथरबाटै एमालेबाट उम्मेदवार छन्।
एमालेबाटै २०४८ सालमा सांसद बनेका विरोध खतिवडा एकीकृत समाजवादीका तर्फबाट मकवानपुर- २ बाट फेरि उम्मेदवार बनेका छन्।
यसैगरी २०४८ सालकै सांसद विजय गच्छदार सुनसरी- ३ बाट फेरि सांसद लड्दैछन्। तेह्रथुमबाट २०४८ सालमा जितेका विजय सुब्बा फेरि सोही क्षेत्रमा सांसद बन्न एमालेबाटै उम्मेदवार बनेका छन्।
यसैगरी राजेन्द्र पाण्डे धादिङ- १ बाट एकीकृत समाजवादीबाट उम्मेदवार बनेका छन्। लालबाबु पण्डित एमालेकै तर्फबाट उम्मेदवार बनेका छन्।
दार्चुलाबाट दिलेन्द्रप्रसाद बडु फेरि कांग्रेसबाटै प्रत्यक्षमा उम्मेदवार छन्। कांग्रेस उपसभापति पूर्णबहादुर खड्का सुर्खेत- १ बाट कांग्रेसका उम्मेदवार छन्। २०४८ सालमा स्वतन्त्रबाट जितेका छक्कबहादुर लामा एमालेका तर्फबाट हुम्लाबाट प्रदेश सभा उम्मेदवार छन्।
हृदेयश त्रिपाठी नवलपरासी- ३ बाट २०४८ सालमा सांसद बनेका थिए। यस पल्ट जनता प्रगतिशील पार्टीबाट नवलपरासी- १ मा उम्मेदवारी दिएका छन्।
२०४८ सालमै राष्ट्रिय सभामा सांसद बनेका एकीकृत समाजवादीका अध्यक्ष तथा पूर्व प्रधानमन्त्री माधव नेपाल रौतहट- १ बाट उम्मेदवार बनेका छन्। राष्ट्रिय सभा सदस्यबाट संसदीय राजनीतिमा आएका इलाम सुवास नेम्वाङ इलाम- २ बाट उम्मेदवार छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
