बुटवल– नेपाली राष्ट्रिय क्रिकेट टोलीको बलियो खम्बाका रूपमा परिचित शक्ति गौचनले तीन वर्षअघि क्रिकेट खेलबाट सन्यास लिए।
जीवनको पहिलो ‘इनिङ’ काे १८ वर्ष क्रिकेट खेलेर बिताएका शक्तिले दोस्रो ‘इनिङ’ भने राष्ट्रका लागि खेलाडी उत्पादन गरेर बिताउने निर्णय लिएका छन्।
सन्यासपछि दुई युवा खेलाडी कुशल मल्ल र सुशान भारीलाई नेपाली क्रिकेट टोलीमा छनोट गराएर एक हदसम्म प्रमाणित गरेका शक्ति अहिले क्रिकेटका ‘भविष्य’ निर्माणमै व्यस्त छन्।
भैरहवामा रहेको शक्ति गौचनको स्टार क्रिकेट एकेडमी सन् २००९ मा स्थापना भएको हो। एकेडमीबाट हालसम्म विभिन्न उमेर समूहका पाँच जना खेलाडी राष्ट्रिय क्रिकेट टोलीमा समावेश भएर अन्तर्राष्ट्रिय खेल खेलिसकेका छन्।
शक्तिले एकेडेमीमा मुख्य रुपमा १६ वर्ष उमेर समूहका खेलाडीहरुलाई बढी प्रथामिकता दिने गरेका छन्। उनले उक्त उमेर समूहका खेलाडीलाई एकेडेमीमै रहेको छात्रावासमा राखेर सिकाउने गरेका छन्।
शक्ति भन्छन्, 'मेरो ध्यान क्रिकेट खेलाडी उत्पादनमै छ।' उनले राम्रा खेलाडी खोज्नका लागि विभिन्न जिल्लामा ट्यालेन्ट हन्ट गर्ने गरेको बताए।
नेपालले सन् २०२२ सम्मका लागि एकदिवसीय मान्यता पाएसँगै क्रिकेटप्रतिको क्रेज दिन प्रतिदिन बढ्दो छ। तर खेलाडी उत्पादनका लागि सरकारले खासै लगानी गरेको छैन।
एकातिर सरकारी लगानीको अभाव, अर्कातिर स्कुले विद्यार्थीको आकर्षण, त्यही कारण तीन वर्षअघि खेलाडी जीवनबाट सन्यास लिएका शक्ति खेलाडी उत्पादनमा लागेका हुन्।
एकेडेमीमा अहिले करिब ५० खेलाडीले शक्तिसँग प्रशिक्षण लिइरहेका छन्। शक्तिको एकेडमीमा अहिले रुपन्देही बाहेक अर्घाखाँची, दाङ र म्याग्दी लगायत जिल्लाका खेलाडी क्रिकेट सिक्दै आएका छन्। तिनैमध्येका हुन् दाङका शुभम खनाल।
शुभम भन्छन्, 'शक्ति दाइसँग क्रिकेट सिक्नकै लागि एकेडमीको छात्रावासमा बसिरहेको छु।'
शक्तिले राम्रो सिकाउने भएकोले घर छोडेर, आमाबुबाबाट टाढा बसेर क्रिकेट सिकिरहेको शुभमले बताए।
एकेडेमीमा अत्याधुनिक पूर्वाधार सहितको इन्डोर क्रिकेट हल छ। जबकी, अहिलेसम्म सरकारले राष्ट्रिय टोलीकै लागि इन्डोर क्रिकेट हल बनाएको छैन। शक्तिको एकेडेमीमा क्रिकेट सिक्न आउने खेलाडीको आकर्षण बढ्दो छ। छात्राबासमै राखेर क्रिकेट सिकाउन पाउँदा अभिभावक पनि हर्षित छन्।
शुभमका बुबा केशव खनाल भन्छन्, 'शक्ति गौचनसँग क्रिकेट सिकाउनका लागि छोरालाई घरभन्दा धेरै टाढा राखेका हौं।'
खनालका अनुसार गौचनकहाँ आएपछि शुभमको क्रिकेट खेल झन् राम्रो बन्दै गएको छ।
शक्तिले खेलाडी उत्पादनका लागि एकेडेमीमा चार करोड रुपैयाँभन्दा बढी लगानी गरेका छन्। खेलाडीको संख्या बढ्न थालेपछि नजिकको ओमसतिया गाउँपालिका- २ को कर्मडाँडा खेल मैदानमा समेत अभ्यास गराउँदै आएका छन्।
प्रतिभावान खेलाडी उत्पादन गरी नेपाललाई टेस्ट खेल्ने राष्ट्र बनाउनु मुख्य लक्ष्य भएको शक्तिको भनाइ छ। जसका लागि शक्तिले आफ्नै बुवाको स्मृतिमा विगत चार वर्षमा चारवटा राष्ट्रिय स्तरका खड्कप्रसाद गौचन मेमोरियल अण्डर-१६ राष्ट्रिय स्तरको क्रिकेट प्रतियोगिता सम्पन्न गरिसकेका छन्।
शक्तिका अनुसार निकट भविष्यमा राष्ट्रिय टोलीमा समावेश गराउने लक्ष्य सहित एकेडमीका २५ खेलाडी तयारी अवस्थामा रहेका छन्। आफ्नो खेल करिअरमा शक्ति बलिङ र ब्याटिङ दुवैमा चम्किएका थिए।
युवा क्रिकेटरका लागि उनी आफैं एक एकेडेमी हुन्। क्रिकेटमा भविष्य खोज्नेलाई उनले आफ्नो अनुभव र ज्ञान कति बाँड्न सक्छन् तथा लक्ष्यमा कति सफल हुन्छन् त्यो भने भविष्यमा देखिने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
