दाङ– दाङको घोराहीस्थित कारागारका कैदीबन्दीका लागि पाँचदिने सीपमुलक तालिम सुरु गरिएको छ। कारागारमा रहेका जम्मा ३ सय २४ कैदीबन्दी मध्ये १ सय ५४ जनालाई मैनबत्ति बनाउने तालिममा सहभागी गराइएको छ।
उक्त तालिममा विभिन्न अभियोग लागेका कैदीबन्दी सहभागी भएका छन्। तालिममा उनीहरुलाई मैनबत्ती, लुगा धुने सरफ, अगरबत्ती र झोला बनाउन सिकाइनेछ।
समाजमा पुनः स्थापित गर्नका लागि उनीहरुलाई सीप सिकाउन लागेको घोराही कारागारका प्रमुख बासुदेव खनालले बताए। अपराध गरेर कानुनी कठघरामा आएका मानिसलाई समाजमा गएर फेरि सामाजिक जीवन बिताउन गाह्रो हुने भएकोले कारागारबाट घर फर्केर आफ्नै काममा व्यस्त रहुन् भन्ने उद्देश्यका साथ तालिम दिइएको उनको भनाइ छ।
साथै यस्ता कैदी पुन: अपराधिक क्रियाकलापमा नलागुन् र स्वरोजगार बनि आर्थिक अवस्थामा सक्षम बनुन् भन्ने उद्देश्य तालिमको रहेको छ। घोराही कारागार कार्यालयको आयोजना, समाज कल्याण केन्द्रको सह आयोजना र घोराही उपमहानगरपालिका वडा नम्वर १५ को सहयोगमा सीपमुलक तालिमको सुरुआत गरिएको हो।
घोराही कारागारका प्रमुख जेलर बासुदेव खनालले कैदीबन्दी र प्रशासनबीचको दूरीलाई कम गर्ने प्रयास भइरहेको बताए। त्यसका लागि कैदीबन्दीसँग रहेर प्रत्यक्ष कैदी र जेलरबीचमा रहेका समस्याबारे छलफल गर्ने जस्ता नयाँ कामको थालनी भएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
