काठमाडौं– मालपोत कार्यालयदेखि वडा कार्यालयसम्मका नक्कली कागजात बनाएर एक महिलाबाट एक करोड रुपैयाँ ठगी भएको पाइएको छ। प्रहरीको केन्द्रीय अनुसन्धान ब्यूरो सीआईबीको टोलीले जग्गा हत्याउन नक्कली कागजात बनाउने र बैनावापत एक करोड रुपैयाँ फरार भएको समूहलाई पक्राउ गरेपछि उक्त विषय सार्वजनिक भएको हो।
सीआईबीले विभिन्न मितिमा उक्त गिरोहका ६ जनालाई पक्राउ गरेको छ। पक्राउ पर्नेहरुमा काठमाडौंको नागार्जुन नगरपालिका–८ घर भइ गोकर्णेश्वर नगरपालिका–७ माकलबारी बस्ने ५५ वर्षीय प्रेम खत्री, तनहुँको अरुणोदय गाउँपालिका–९ घर भएका ४४ वर्षीय गुन्ज सिंह थापा, सिन्धुपाल्चोकको मानेधारा–१ घर भइ काठमाडौं बूढानीलकण्ठ बस्ने ६८ वर्षीय शिव भण्डारी, तनहुँको शुक्लागण्डकी नगरपालिका–९ बाह्रबिसेका ३५ वर्षीय हरि श्रेष्ठ, काठमाडौं चन्द्रागिरी नगरपालिका बलम्बु बस्ने ५५ वर्षीय कुमार मानन्धर र काठमाडौं महानगरपालिका–११ थापाथलीका ६० वर्षीय रामराज भण्डारी छन्।
यो गिरोहले हङकङमा बसेर काठमाडौं आएकी महिलाबाट एक करोड रुपैयाँ ठगेको पाइएको सीआईबीका प्रवक्ता तथा एसपी कमल थापाले जानकारी दिए।
गीता बुढाथोकी लामो समयदेखि वैदेशिक रोजगारीको क्रममा हङकङमा बसेर केही समय पहिला काठमाडौं फर्किएकी थिइन्। हङकङमा रहँदा कमाइएको रकमबाट काठमाडौंमा जग्गा किन्ने योजना बनाएकी बुढाथोकी प्रेम खत्री र गुञ्ज सिंह थापाको सम्पर्कमा पुगेकी थिइन्। उनीहरुले गीतालाई सस्तो र राम्रो जग्गा मिलाइदिने प्रलोभन देखाए।
काठमाडौंको साविक भीमढुंगा गाविस–७ (क) कित्ता नम्बरको १४२, १२८, १२९, १३२ र २९७ को १९ रोपनी १३ आना ९ दाम जग्गा बिक्रिमा रहेको कुरा गीतालाई बताए। १९ रोपनीमध्ये ९ रोपनी १४ आना १ दाम जग्गा हेलमेट भन्ने हालिमाली गुठीको नाममा भूमि सुधार तथा मालपोत कार्यालय कलंकीमा दर्ता कायम रहेको र उक्त जग्गा मोहीले पाउने भाग छुट्याई जग्गाहरु रैकरमा परिणत गरी जग्गा धनी प्रमाणपत्र प्राप्त गर्ने क्रममा रहेको विषय यो गिरोहले गीतालाई सुनायो।
त्यसका लागि विश्वासमा दिलाउन पत्रपत्रिकामा प्रकाशित सूचना देखाउनेदेखि जग्गा बेचबिखन गर्ने मोहीहरु भन्दै राजेन्द्र गिरी, ठूलिमाया खत्री, चमेली खत्री, देवीबहादुर खत्री, दीपकबहादुर खत्री र कृष्ण गिरीसँग समेत २०७८ साउन ८ गते करारनामा तथा बैना समेत गरेको छ भन्दै कागजात समेत यो गिरोहले गीतालाई देखाएको थियो।
१९ रोपनी १३ आना ९ दाम जग्गाबाट मोहीले प्राप्त गर्ने आधा जग्गा प्रतिआना ५ लाख रुपैयाँका दरले दिने भन्दै बैनावापत एक करोड रुपैयाँ गीताबाट यो गिरोहले लिएको एसपी थापाले बताए।
जग्गा किन्ने भन्दै एक करोड रुपैयाँ बुझेपछि बैनाको कागज समेत बनाइएको थियो। उक्त बैनाको कागज वडा कार्यालयबाट प्रमाणित गरिएको भन्दै गीतालाई उनीहरुले विश्वासमा पारेका थिए। नागार्जुन नगरपालिका–८ का तत्कालीन वडाध्यक्ष शुक्रबहादुर तामाङले बैनाको कागज प्रमाणित गरेको उल्लेख गरिएको थियो।
सीआईबीको अनुसन्धानको क्रममा वडाध्यक्ष तामाङबाट उक्त कागज प्रमाणित भएको नभइ यो गिरोह आफैं कीर्ते गरी प्रमाणित भएको भन्ने ब्यहोराको कागज देखाएको खुलेको छ। सीआईबी स्रोतले भन्यो, ‘विश्वासमा पार्नका लागि वडाध्यक्षको कीर्ते हस्ताक्षरदेखि मालपोत कार्यालयसम्मको नक्कली कागजात बनाइएको खुलेको छ।’
विश्वासमा दिलाउन पत्रपत्रिकाका सूचनादेखि मालपोत र वडासम्मका नक्कली कागजात देखाएर बैना वापतको एक करोड रुपैयाँ लिएपछि यो गिरोह गीताबाट सम्पर्कविहीन भएको थियो। लामो समयसम्म सम्पर्कविहीन भएपछि आफू ठगिएको भन्दै उनले सीआईबीमा गत भदौ ७ गते जाहेरी दिएकी थिइन्। जाहेरीपछि अनुसन्धानमा खटिएको सीआईबीको टोलीले विभिन्न मितिमा काठमाडौं र काठमाडौं बाहिरका जिल्लाबाट ६ जनालाई पक्राउ गरेको हो।
कसको भूमिका के?
पक्राउ परेकामध्ये प्रेम खत्री र गुञ्ज सिंह थापा ठगीका मुख्य योजानकार हुन्। उनीहरु दुई जनाको मुख्य योजनामै ठगी भएको प्रहरी अनुसन्धानबाट खुलेको छ। यी दुवै जना करारनामा तथा बैनाको कागजात तयार पार्नेदेखि वडाध्यक्षको कीर्ते हस्ताक्षर गर्ने काममा संलग्न रहेको पाइएको छ। उनीहरुले यो जग्गा मोहीको नाममा रैकर हुन लागेको थाहा पाएर ठगीको योजना बनाइ गीताबाट एक करोड रुपैयाँ ठगी गरेको खुलेको छ।
बाँकी रहेका पाँच जनाले भने ठगी गर्ने सहयोगी भूमिका निभाउने गरेको खुलेको छ। त्यसवापत उनीहरुले खत्री र थापाबाट कमिसन समेत लिएको प्रहरी स्रोतले जनाएको छ।
अर्कोलाई समेत बैना गरेर ठगी
प्रेम खत्रीले यही जग्गा अर्का व्यक्तिलाई समेत देखाएर ठगी गरेको खुलेको छ। गुठीको रुपमा कायम रहेको, रैकरमा परिणत हुने प्रक्रियामा रहेको र मोहीहरुले बिक्री गर्ने भनि करारनामा तथा बैना कागज समेत गरेको भन्दै अर्कै व्यक्तिलाई जग्गा बैना गरेर ठगी गरेको खुलेको छ।
सस्तो दरमा राम्रो ठाउँमा जग्गा बिक्री छ, रैकरमा परिणत गरी जग्गा धनी पूर्जा चाँडै प्राप्त हुने भन्दै रामकुमार थपलिया र गोविन्द नगरकोटीलाई जग्गा बैना गरेर ठगी गरेको पाइएको छ। ५ लाख ७५ हजार रुपैयाँका दरले जग्गा दिने भन्दै उनीहरुबाट बैना वापत १५ लाख रुपैयाँ लिएर ठगी गरेको खुलेको हो।
योजनाकारको नागरिकता नै नक्कली
मुख्य योजनाकार भनिएका गुञ्ज सिंह थापाको नागरिकता नै नक्कली रहेको खुलेको छ। अनुसन्धानका क्रममा थापाले आफ्नो नागरिकताको विवरण नै सच्याएको खुलेको हो। नागरिकता सच्याएर थपघट गरेको खुलेपछि प्रहरीले उनीविरुद्ध नेपाल नागरिकता ऐनमा समेत अनुसन्धान गरेको थियो।
उक्त मुद्दाको अनुसन्धान भने सकेर सीआईबीले जिल्ला सरकारी वकिल कार्यालयमा रायसहितको प्रतिवेदन पेस गरिसकेको छ। सरकारी वकिल कार्यालयले पनि जिल्ला अदालतमा मुद्दा दायर गरिसकेको सीआईबीले जनाएको छ।
थापासहित अन्य ५ जनालाई अर्को मुद्दाको कसूरमा अनुसन्धान भइरहेको छ। उनीहरुविरुद्ध ठगी तथा लिखतसम्बन्धी कसूरमा अनुसन्धान भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
