नेपाल टेलिकमले शुक्रबारदेखि ई-सिम वितरण गर्दै

कर्पोरेट

नेपाल लाइभ शुक्रबार, भदौ ३१, २०७९ १०:१४

काठमाडौं– नेपाल टेलिकमले शुक्रबारदेखि आफ्ना ग्राहकहरूलाई ई-सिम वितरण गर्दैछ। टेलिकमले दूरसञ्चार कार्यालय, सुन्धारा काउन्टरबाट आफ्ना ग्राहकहरूलाई निःशुल्क ई-सिम वितरण सुरू गर्ने भएको हो।

ई-सिम चल्ने मोबाइल सेट भएका ग्राहकले यो नयाँ प्रविधिको सिम प्रयोग गर्न सक्नेछन्।

कम्पनीका अनुसार हाल भौतिक सिमकार्ड प्रयोग गरिरहेका पोस्टपेड र प्रिपेड नम्बरका सिमलाई निःशुल्क ई-सिममा परिवर्तन गर्न सकिने छ। त्यसैगरी नयाँ पोस्टपेड नम्बर लिन चाहने ग्राहकलाई हालको बिक्री मूल्यमै ई-सिम दिइने छ। नयाँ प्रिपेड नम्बर लिने ग्राहकलाई भने निकट भविश्यमा यो सुविधा उपलब्ध हुनेछ।

ई-सिम चल्ने मोबाइल सेट भएका पुराना ग्राहकले सिम लिन आवश्यक फारम भरेर बुझाउनु पर्नेछ।

ई-सिम प्रयोगमा आएपछि सिमकार्ड परिवर्तन गर्नुपर्ने आवश्यकता हुँदैन। मोबाइल सेटबाहेक ई-सिमलाई अन्य डिभाइस तथा स्मार्टवाच र यस्तैखाले उपकरणमा समेत प्रयोग गर्न सकिने कम्पनीले जनाएको छ।

ई-सिमको पूरा रूप इम्बेडेड सबस्क्राइबर आइडेन्टिटी मोड्युल हो। बोलिचालीको भाषामा यसलाई इलेक्ट्रिक सिम पनि भन्न सकिन्छ।

ई-सिमले मोबाइल सेटलाई दूरसञ्चार सेवा प्रदायक कम्पनीको नेटवर्कसँग कनेक्ट गर्छ। अहिले प्रयोगमा भएका सिमकार्ड मोबाइलमा राखेपछि नेटवर्कसँग कनेक्ट हुन्छ। ई-सिम भने यो सुविधा भएको मोबाइल सेटमा पहिल्यै राखिएको हुन्छ। त्यसमै सेवा प्रदायकको नेटवर्क कनेक्ट हुने हो।

यो सानो भए पनि यो हराउने, भाँचिने चिन्ता हुँदैन। त्यस्तै यसको प्रतिलिपि नम्बर पनि निकाल्न मिल्दैन।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एकता दिवसमा पूर्वराजा ज्ञानेन्द्रको शुभकामना- पूर्ण प्रजातन्त्र अहिले पनि पूरा हुन सकेको छैन

तीन दिनमा दुई हजार बढीले बढ्यो सुनको मूल्य, कतिमा हुँदैछ कारोबार?

यू-१९ महिला विश्वकप क्रिकेट खेल्ने नेपाली टोलीको बिदाई