काठमाडौं– बेलायती राजा चार्ल्स तृतीयले पहिलो पटक संसद्लाई सम्बोधन गरेका छन्। बेलायती महारानी एलिजाबेथ द्वितीयको गत साता निधन भएपछि बेलायती राजा चार्ल्स तृतीयलाई बेलायतको नयाँ राजाको रूपमा घोषणा गरिएको हो।
सोमबार ब्रिटिश संसद्को संयुक्त बैठकलाई सम्बोधन गर्दै उनले आफ्नी स्वर्गीय आमा महारानी एलिजाबेथ द्वितीयप्रति श्रद्धाञ्जलि व्यक्त गरे। उनले महारानीको उत्तराधिकारीका रूपमा पाएको ‘महान विरासत, सार्वभौमिकताको कर्तव्य र भारी जिम्मेवारी’ हरू आफूमा हस्तान्तरण गरिएको जानकारी सम्बोधनका क्रममा संसदलाई दिए।
भेला भएका सांसदहरूलाई सम्बोधन गर्दै राजा चार्ल्सले आफ्नी आमाप्रति श्रद्धाञ्जलि व्यक्त गर्दै भने, “मेरी प्यारी आमा महारानीको मृत्युको घोषणा गर्नु मेराे कर्तव्य हो। बेलायतकी महारानी एलिजाबेथको ९६ वर्षको उमेरमा बिहीबार अपराह्न बालमोरल क्यासलमा शान्तिपूर्वक निधन भएको थियो।”
उनले भने, “मेरी आमाको शासनकाल यसको अवधि, समर्पण र भक्तिमा अतुलनीय थियो। दुःखी हुँदा पनि हामी यस अत्यन्तै विश्वासी जीवनको लागि धन्यवाद दिन्छौं। म यस महान् विरासत र सार्वभौमिकताको कर्तव्य र भारी जिम्मेवारीहरूको बारेमा गहिरो रूपमा सचेत छु। जिम्मेवारी अहिले मलाई हस्तान्तरण गरिएको छ। यी जिम्मेवारीहरू सम्हाल्दै, म संवैधानिक सरकार कायम गर्न र यी टापुहरू र कमनवेल्थ क्षेत्रहरूको विश्वभरिका मानिसहरूको शान्ति, सद्भाव र समृद्धि खोज्नको लागि मेरी आमाले स्थापित गरेको प्रेरणादायी उदाहरण पछ्याउने प्रयास गर्नेछु।” उनले क्राउन इस्टेटलगायत वंशाणुगत राजस्व समर्पण गर्ने परम्परालाई निरन्तरता दिने आफ्नो इच्छा दोहोर्याए।
गत हप्ता भएको ९६ वर्षीया महारानीको निधनले सात दशक लामो शासनको अन्त्य गरेको छ। उनलाई उथलपुथलपूर्ण संसारमा स्थिरताको प्रतीक बनाएको थियो। बेलायत औपचारिक शोकको चरणमा प्रवेश गरेको छ र विश्वभरबाट श्रद्धाञ्जलिको ओइरो लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
