काठमाडौं– भृकुटीमण्डपमा जारी आठौं संस्करणको फर्निचर तथा फर्निसिङ एक्स्पोमा शनिबार मात्र २२ हजार बढीले अवलोकन गरेको मेला व्यवस्थापन पक्षले जनाएको छ। सार्वजनिक विदाका कारण एक्स्पो अवलोकन गर्न आउनेको संख्या बढेको उसको दाबी छ।
बिहीबारदेखि सुरु भएको एक्स्पोमा शनिबारसम्म ५१ हजारले अवलोकन गरेको एक्स्पोको व्यवस्थापक इभेण्ट सोलुसन प्रालिले जनाएको हो। सोलुसनका अनुसार बिहीबार १३ हजार र शुक्रबार १६ हजारले अवलोकन गरेका थिए। आइतबार र सोमबार थप ३० हजारले एक्स्पो अवलोकन गर्ने अपेक्षा गरिएको छ।
‘अघिल्ला २ दिनमा २९ हजारले एक्स्पो अवलोकन गरेकोमा शनिबार २२ हजारले अवलोकन गरेका छन्’ सोलुसनका प्रबन्ध निर्देशक विजय सागर प्रधानले भने। एक्स्पो अवलोकनका लागि प्रवेश नि:शुल्क गरिएको छ।
प्रदर्शकहरुले चाडपर्वलाई लक्षित गरी एक्स्पो अवलोकनकर्तालाई विभिन्न अफरहरु सञ्चालन गरेका छन। यहाँ प्रत्येक दिन डोर प्राइजको पनि व्यवस्था गरिएको आयोजकले जनाएको छ।
अवलोकनकर्ताले निशुल्क प्रवेशका लागि आफ्नो विवरण रजिष्ट्रेशन डेक्समा उपलब्ध गराउनु पर्नेछ। साथै एक्स्पोको डिजिटल पेमेण्ट पार्टनर ‘डिजी पे’मार्फत प्रवेश पास पाउन सकिनेछ।
एक्स्पोकै अवसरमा शुक्रबार र शनिबार प्रदर्शनीस्थलमा नेपाल फर्निचर तथा फर्निसिङ व्यवसायी महासंघ तथा लायन्स क्लब अफ काठमाण्डौं सेन्ट्रलसँगको सहकार्यमा भएको रक्तदानबाट १०८ पिन्ट रगत संकलन भएको संघका प्रथम उपाध्यक्ष मनीष अग्रवालले जानकारी दिए।
एक्स्पोमा स्वदेशी तथा विदेशी गरी एक सयभन्दा बढी प्रदर्शकहरुको सहभागिता छ। किचन, बेडरूम, बाथरूमका साथै आउटडोर फर्निचर, इण्टेरियर डिजाइनर, कार्पेट, मार्बल लगायत सामग्री एक्स्पोको मुख्य आकर्षणको रुपमा रहेको छ। कार्पेट, पर्दा, म्याट्रेस, डेकोरेशन सामग्री, होम डेकोर, अफिस फर्निचर, होम अप्लाइन्सेज, मेशिनरी औजारका साथै वास्तुसँग सम्बन्धित सेवा पनि एक्स्पोमा महत्वपूर्ण आकर्षण बनेको छ।
फर्निसिङ व्यवसायमा आधुनिक प्रविधि भित्र्याउँदै फर्निचरजन्य उत्पादनमा मुलुकलाई आत्मनिर्भर बनाउन एक्स्पोले टेवा पुर्याउने अपेक्षा गरिएको छ। नेपालभित्रै उपलब्ध फर्निचर तथा फर्निसिङका उत्पादनको प्रवर्द्धन गर्ने उद्देश्यले एक्स्पोको आयोजना गरिएको आयोजक पक्षको भनाइ छ।
नेपाल फर्निचर तथा फर्निसिङ संघको आयोजना तथा इभेण्ट सोलुसनको व्यवस्थापनमा जारी एक्स्पोलाई प्रेस्टिज कार्पेटले शीर्ष प्रायोजन गरेको छ भने हलेसी डेकोर, भिबोन इकोनोमिक चेयर, जेन्सा कार्पेट, युनाईटेड फोम एण्ड म्याट्रेसले मुख्य प्रायोजन गरेका छन्।
स्पेस म्यागिजिन, नेपाल हस्तकला महासंघ र इन्टेरियर डिजाइनर एशोसियसन नेपालको सहयोग छ। एक्स्पोलाई नेपाल चेम्बर अफ कमर्श तथा नेपाल फर्निचर तथा फर्निसिङ्ग व्यवसायी महासंघले समर्थन गरेको छ।
1662814573.jpeg)
1662814574.jpeg)
1662814574.jpeg)
1662814573.jpeg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
