काठमाडौं– हिमालयन पावर पार्टनर लिमिटेडले लमजुङमा निर्माण गरेको दोर्दी खोला जलविद्युत् आयोजनाबाट बिजुली उत्पादन परीक्षण सुरु गरेको छ । दोर्दी खोलामा निर्माण गरिएको २७ मेगावाट क्षमताको यस आयोजनाले सम्पूर्ण निर्माण कार्य सम्पन्न गर्दै बिजुली उत्पादन परीक्षण सुरु गरेको आयोजना प्रमुख मुन्ना शाक्यले जानकारी दिए।
‘हामीले केही महिना अघि नै निर्माण कार्य सम्पन्न गरे पनि उत्पादित बिजुली जोड्ने २२० केभीको राष्ट्रिय प्रसारण लाइन निर्माण भई नसकेकाले समय लागेको थियो,’ शाक्यले भने।
यहाँ प्राधिकरण अध्ययन टोली आएर जाँच गर्न थालेको र ४/५ दिनसम्म परीक्षण चल्ने उनको भनाइ छ। परीक्षण सफल भएमा व्यावसायिक रुपमा बिजुली उत्पादन गरिने आयोजना प्रमुख शाक्यले बताए। यसअघि आयोजनाले विभिन्न भागको परीक्षण गरेको थियो। आयोजनाका इन्चार्ज दीपक ज्ञवालीका अनुसार इलेक्ट्रो–मेकानिकल, पेनस्टकको इनटेक, फिल्डर पाइपलगायत काम सम्पन्न गर्दै ती सबैको सफल परीक्षणसमेत भइसकेको छ।
पेनस्टकको ७०० मिटर, ३ हजार २०० मिटरको सुरुङ खन्ने तथा पाइप विछ्याइएको छ भने अर्को २ हजार २७० मिटर सुरुङ रहेको छ। आयोजनाको बाँधस्थल २१२ मिटर ‘ग्रसहेड’ रहेको छ। बेँसीसहर नगरपालिका–११ रामचोकबेँसीमा पावरहाउस रहेको छ।
२०७२ फागुनदेखि निर्माण सुरु गरिएको यो आयोजनाले २०७५ भदौ १५ गते विद्युत् उत्पादन गर्ने लक्ष्य लिएको थियो। तर नाकाबन्दी, अघिल्लो वर्षायाममा विद्युत् गृहमा मर्स्याङ्दी नदीको पानी छिरेर मेशिनरी सामानमा पुर्याएको क्षति, कोरोनाका कारण जारी निषेधाज्ञा र सुरुङ निर्माण गर्ने क्रममा कमजोर चट्टान भेटिएकाले पनि निर्माणमा ढिलाइ हुँदै आएको र निर्धारित समयमा काम सम्पन्न हुन नसकेर पटक–पटक म्याद थप्दै निर्माण सम्पन्न गरिएको आयोजनाले जनाएको छ।
पटकपटक म्याद थप
पछि समय थपेर २०७६ चैत मसान्तसम्ममा निर्माण सक्ने सम्झौता गरे पनि सोही अवधिमा पनि निर्माण सम्पन्न नभएपछि असारसम्म सक्ने गरी म्याद बढाइएको थियो। सो समयमा पनि निर्माण सम्पन्न गर्न नसकेपछि पुस महिनामा बिजुली उत्पादन गर्ने लक्ष्यका साथ काम अघि बढाइएको थियो। बिजुली उत्पादन गर्न नसकेपछि २०७७ चैत महिनासम्मको निर्माण अवधि रहेको, तर सम्पन्न हुन नसकेको र पटकपटक समय थप गर्दै आएको आयोजनाले बल्ल बिजुली उत्पादन परीक्षण थालेको हो।
सुरुमा ४ अर्ब २३ करोड रुपैयाँ लाग्ने अनुमानका साथ आयोजनाले निर्माण थालनी गरे पनि निर्माण अवधि लम्बिँदै गएकाले ४ अर्ब ६४ करोडसम्म खर्च पुगेको हुनसक्ने आयोजनाको अनुमान छ। आयोजनामा गैरआवासीय नेपाली (एनआरएन) हरूको ३५ दशमलव ७ प्रतिशत, आईएमई ग्रुपको ३४ दशमलव ३ प्रतिशत र सर्वसाधारणको ३० प्रतिशत लगानी छ।
विद्युत् प्राधिकरण र सो कम्पनीबीच २०६९ असार १ गते पीपीए सम्झौता भएको थियो। आयोजनाका अनुसार सुक्खा याममा ८ रुपैयाँ ४० पैसा र वर्षायाममा ४ रुपैयाँ ८० पैसा प्रतियुनिटमा विद्युत् खरिद गर्ने सम्झौता भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
