डलर साटिदिने भन्दै जंगलमा लगेर लुटपाट, २ जना पक्राउ

सुरक्षा/अपराध

नेपाल लाइभ मंगलबार, भदौ ७, २०७९ १४:३२

काठमाडौं– अमेरिकी डलर साटिदिने भन्दै जंगलमा लगेर लाखौं रकम लुटपाट गरेको आरोपमा दुई जना पक्राउ परेका छन्।

पक्राउ पर्नेहरुमा सिन्धुपाल्चोकको बाह्रबिसे नगरपालिका–३ थला डाँडाका ३२ वर्षीय समीर भनिने सञ्जय तामाङ र सोही ठाउँको सम्शेर डाँडाका ३१ वर्षीय विष्णु तामाङ छन्।

उनीहरुलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो। बौद्ध, टोखा, साँखु, कपन लगायतका ठाउँहरुमा सस्तो दररेटमा अमेरिकी डलरसँग नेपाली रुपैयाँ साटिदिने भन्दै यो समूहले श्रंखलाबद्ध रुपमा ठगी गरेको पाइएको छ।

सोमबार दिउँसो १ बजे टोखाको युनिक कोलोनीबाट नेपाली रुपैयाँ १५ लाख बराबरको अमेरिकी डलर साट्ने भन्दै उनीहरुले ठगी गर्न लागेका थिए। बाहिर डलर राख्ने र भित्र भने ५, १०, २० का नेपाली नोट राखेर पोको पारेर उनीहरुले दिँदै ठगी गरेको खुलेको छ।

यो समूहले आफूहरु वैध रुपमा डलरको कारोबार गर्ने व्यक्ति रहेको भन्दै विश्वासमा पार्ने, सस्तो दररेटमा साटिदिन्छौं भन्ने र एकान्त ठाउँमा खगेर लुटपाटसमेत गर्ने गरेको पाइएको छ।

सस्तोमा डलर साटिदिने भन्दै जंगलमा समेत पुर्‍याएर रकम लुटपाट गरिएको अपराध अनुसन्धान कार्यालयले जनाएको छ। ठगी तथा लुटपाट गरिसकेपछि प्रयोग गर्दै आएका सीमकार्ड फाल्ने गरेको पाइएको छ।

पीडित बताएको हुलियाका आधारमा उनीहरुलाई पक्राउ गरिएको छ। हुलियाको आधारमा स्केच बनाएर अनुसन्धानमा खटिएको प्रहरीले उनीहरुलाई पक्राउ गरे पनि यो समूहका एक जना अझै फरार रहेका छन्। यो समूहले उपत्यकामा यस किसिमका पाँच वटा घटना गराइसकेको खुलेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

कञ्चनपुरमा डिउटीमा रहेका प्रहरीले आफैंलाई गोली हाने, अवस्था गम्भीर

अहिल्यै सरकार परिवर्तन हुने कुनै कारण छैन : कांग्रेस नेता कोइराला

सङ्खुवासभाबाट एक अर्ब बढीको अलैँची निर्यात