काठमाडौं– उपचार खर्चको अभावमा गम्भीर अवस्थामा पुगेका एक बालकलाई नर्भिक इन्टरनेशनल अस्पतालले उद्धार गरी नयाँ जीवन दिएको छ।
थापाथलीस्थित रहेको अस्पतालले आफ्नो संस्थागत सामाजिक उत्तरदायित्वअन्तर्गत जनकपुरको लक्ष्मीनारायण गाउँपालिकास्थित सपहीका स्थायीबासी आठ वर्षीय बालक विजय महतोलाई उपचारमा सहुलियतसँगै पूर्णरुपमा निको बनाई घर पठाएको हो।
आर्थिक अवस्था अत्यन्त कमजोर रहेका बालकको पेटको अगाडिको भागको मांसपेशीमा एक्कासी पिप जमेको थियो। उनका बुबा शिवशरण महतोका अनुसार जनकपुरका अस्पतालमा देखाउँदा त्यहाँका चिकित्सकले उपचार गर्न नसक्ने बताएपछि बालकलाई काठमाडौं ल्याइएको थियो। आर्थिक अवस्था कमजोर रहेका कारण राम्रो अस्पताल लैजान सक्ने अवस्था नरहेको तर आफू नर्भिकमा आएर कुरा गर्दा उपचारमा सहुलियतमा राम्रो उपचार सुविधा पाएको बताए।
‘नर्भिकले उपचार खर्चमा समेत निकै छुट दिएर मजस्तो गरीबलाई गुण लगाएको छ’, महतोले भने, ‘उपचारमा संलग्न डा. अभय यादवले समेत हामीलाई छुट दिनुभयो। उहाँहरुकै सहयोगले आज मेरो छोरा ठीक भएको छ।’
पेटको मांसपेशीमा जमेको पिप र त्यसको पीडाका कारण नर्भिक आउँदा बालक हिँड्न सक्ने अवस्थामा थिएनन्। उपचार गरेर निकै ठीक भएपछि घर फर्किनुअघि सोमबार उनी हिँड्नसक्ने भएका थिए। नर्भिकका प्रबन्ध निर्देशक मेघा चौधरीको निर्देशनमा बालकको उपचार व्यवस्था मिलाइएको थियो। डा. यादव नेतृत्वको टिमले महतोको उपचार गरेको थियो।
यादव नेतृत्वको टिममा सहभागी चिकित्सक डा सुशील कायस्थले गम्भीर अवस्थाका बालकले उपचारपछि नयाँ जीवन पाएको बताए। इन्फेक्सनका कारण बालकको अवस्था निकै गम्भीर बनेको स्मरण गर्दै उनले भने, ‘बेलैमा उपचारको वातावरण नबनेको भए अवस्था निकै गम्भीर बन्नसक्थ्यो। उपचारपछि अहिले बालकको अवस्था निकै राम्रो भएको छ। तर ती बालकले एन्टिबायोटिक चाहिँ निकै लामो समयसम्म खानुपर्ने हुन्छ।’
प्रबन्ध निर्देशक चौधरीले अस्पतालले संस्थागत सामाजिक उत्तरदायित्वअन्तर्गत बर्षेनि गरीब र निमुखा नागरिकहरुको उद्धार गरी निःशुल्क उपचार सेवा दिंदै आएको बताइन्। आगामी दिनमा पनि खर्चकै अभावमा उपचार गर्न नसक्नेहरुलाई अस्पतालले सहयोग गर्ने उनको प्रतिबद्धता छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
