पोखरा– पोखरामा प्रथम राष्ट्रिय खुल्ला स्नुकर प्रतियोगिता आगामी भदौैमा हुने भएको छ।
देविज स्नुकर क्लबको आयोजना तथा युवा तथा खेलकूद मन्त्रालय, गण्डकी प्रदेश, पोखरा महानगरपालिका खेलकूद विकास समिति, नेपाल विलियार्डस् स्नुकर तथा पुल संघ र कास्की जिल्ला विलियार्ड स्नुकर तथा पुल संघको सहयोगमा आगामी भदौ १२ देखि १९ गतेसम्म प्रतियोगिता सञ्चालन हुनेछ।
आयोजक देविज स्नुकर क्लबले आइतबार पत्रकार सम्मेलन गर्दै भौगोलिक तथा आर्थिक रुपले सुहाउँदो विलियार्ड स्नुकर खेललाई नगर, क्षेत्र, जिल्ला र राष्ट्रसम्म पुर्याउने उद्देश्यले प्रतियोगिता आयोजना गरिएको जनाएको छ।
आन्तरिक तथा बाह्य पर्यटनलाई आकर्षित गर्न प्रतियोगिताले महत्वपूर्ण भूमिका खेल्ने क्लबका सञ्चालक तथा प्रतियोगिता संयोजक शंकर गुरुङले बताए।
‘राष्ट्रका लागि खेलकुद, स्वास्थ्यका लागि खेलकुद’ भन्ने नारासहित आयोजना गरिएका उक्त प्रतियोगिताको विजेतालाई नगद १ लाख ५१ हजार १११ रुपैयाँसहित शिल्ड, मेडल र प्रमाणपत्र प्रदान गरिनेछ।
उपविजेताले नगद ७१ हजार १११ रुपैयाँसहित शिल्ड, मेडल र प्रमाणपत्र प्राप्त गर्नेछन्। सेमिफाईनलिष्ट २ जनाले नगद ११ हजार १११ रुपैयाँसहित शिल्ड र प्रमाण पत्र पाउनेछन्।
‘हाईयस्ट ब्रेकर’लाई २१ हजार १११ रुपैयाँसहित शिल्ड, मेडल र प्रमाणपत्र प्रदान गरिने आयोजकले जनाएको छ। प्रतियोगिताका खेलहरु पोखरा महानगरपालिका ८ स्थित डेभिज् स्नुकर क्लबमा सञ्चालन हुनेछन्।
प्रतियोगिताबाट नयाँ प्रतिभाशाली खेलाडीहरु उत्पादन गरी जिल्ला र राष्ट्रमा विलियार्ड, स्नुकर खेलको रौनक बढाउने उद्देश्य राखिएको प्रतियोगिताका संयोजक गुरुङले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
