काठमाडौं– कमनवेल्थ गेम्स–२०२२ मा सहभागिता जनाउन इङ्ग्ल्यान्ड पुगेका १० श्रीलंकाली खेलाडी सम्पर्कविहीन बनेका छन्।
श्रीलंकाली समूहका एक पदाधिकारीका अनुसार ९ खेलाडी र एक म्यानेजर आ–आफ्नो खेल सकिएपछि सम्पर्कविहीन भएका हुन्। स्वदेश फर्किन नचाहेका कारण यी खेलाडी र म्यानेजर इङ्ग्ल्यान्डमै बस्ने मनसायले बेपत्ता भएको उनले बताए। यी सबै खेलाडी र म्यानेजरको खोजीका लागि प्रहरीमा उजुरी परेको छ। तर, अहिलेसम्म उनीहरू फेला पर्न सकेका छैनन्।
श्रीलंका महिनौंदेखि आर्थिक संकट र राजनीतिक अस्थिरताबाट गुज्रिरहेको छ। देशमा खाद्यान्न र इन्धनसहित अत्यावश्यक वस्तुको अभाव छ।
बास्केटबल टोलीका सदस्यहरू इन्धन अभावका कारण विगत तीन महिनादेखि प्रशिक्षण केन्द्रसम्म पुग्न २० किलोमिटर पैदल हिँड्न बाध्य भएका थिए।
ठूलो आर्थिक संकटको सामना गरिरहेको श्रीलंकाले २०२२ को कमनवेल्थ गेम्सका लागि ५१ पदाधिकारीसहित १६१ सदस्यीय टोली इङ्ग्ल्यान्ड पठाएको थियो। कमनवेल्थ गेम्स फेडेरेसन र श्रीलंका क्रिकेटले सहभागिताको लागि आर्थिक सहयोग गरेको थियो।
गत हप्ता जुडो खेलाडी चमिला डिलानी, उनका म्यानेजर एसेला डी सिल्भा र पहलवान शनिथ गए एकसाथ सम्पर्कविहीन भएका थिए। त्यसपछि श्रीलंकाली टोलीका पदाधिकारीहरूले उजुरी दर्ता गराएका थिए। त्यसपछि थप सात खेलाडी हराएका हुन्।
स्वदेश फिर्तामा कुनै समस्या नहोस् भनेर श्रीलंकाली टोली व्यवस्थापनले १६० सदस्यीयको राहदानी आफूसँग राखेको थियो। हराइरहेका खेलाडी र प्रशिक्षकको राहदानी भने स्थानीय प्रहरीले कब्जामा लिएको छ।
यसभन्दा अगाडि सन् २०१४ को दक्षिण कोरियाको इन्चोन सहरमा आयोजना भएको एसियाली खेलकुद प्रतियोगितामा पनि श्रीलंकाका दुई खेलाडी सम्पर्कविहीन भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
