पोखरा–राष्ट्रिय खेलकुद परिषद् (राखेप)का सदस्य–सचिव टंकलाल घिसिङले आगामी असोजमा तय गरिएको नवाैं राष्ट्रिय खेलकुद निर्धारित मितिमै हुने बताएका छन्। नवौं राष्ट्रिय खेलकुद आगामी असोज २८ देखि कात्तिक ३ गतेसम्म गण्डकी प्रदेशमा हुँदैछ।
पोखरा रंगशालामा सोमबार आयोजित पत्रकार सम्मेलनमा सदस्य–सचिव घिसिङले नवौं खेलकुदको मिति बारम्बार परिवर्तन भए पनि यसपालि भने तोकिएको मितिमै हुने बताए।
सरकारले प्रदेश तथा प्रतिनिधिसभा निर्वाचनको मिति घोषणा गरेसँगै नवौं खेलकुद निर्धारित मितिमा नहुने शंका बढेको थियो। उक्तल कुराको खण्डन गर्दै घिसिङले यो या त्यो बहानामा खेलकुद नसर्ने स्पष्ट पारे। ‘प्रतियोगिता २०७५ सालमा हुने भनिएको थियो, १० औं खेलकुद हुने बेलासम्म पनि नवौं खेलकुद भएको छैन। कोरोनाका कारण भनिएको छ। आरोप कसैलाई लगाउनु हुँदैन,’ उनले भने, ‘अब यो या त्यो बहानामा पछाडी सार्नुहुँदैन।’
निर्वाचनले प्रतियोगितालाई प्रभाव नपार्ने गरी कार्यसूची निकाल्न निर्वाचन आयोगलाई राखेपबाट परिपत्र गरिएको घिसिङले बताए। ‘सरकारले मंसिर ४ गते निर्वाचनको घोषणा गरेको छ, नोमिनेसन दर्ता कार्यक्रम १ महिना अगाडिजसो हुन्छ, नोमिनेसनका कार्यक्रम नवौं खेलकुदसँग नजुध्ने गरी मिति तोक्न परिपत्र गरेका छौं,’ उनले भने।
प्रतियोगितामा ३६ खेलमा ४ सय ७ इभेन्ट समावेश गरिएका छन्। पुरुषतर्फ २ सय २० र महिलातर्फ १ सय ८७ इभेन्ट समावेश छन्। प्रत्येक इभेन्टमा ४ भन्दा कम प्रतिस्पर्धी भएमा उक्त इभेन्ट सञ्चालन नगरिने घिसिङले बताए।
हरेक खेलमा स्वर्ण पदक जित्ने खेलाडीलाई २५ हजार र टिम इभेन्टमा स्वर्ण पदक जित्ने खेलाडीले १५ हजार प्राप्त गर्ने छन्। खेलकुदमा राष्ट्रिय रेकर्ड भंग गरी नयाँ रेकर्ड बनाउने खेलाडीलाई जनही ५० हजार प्रदान गरिनेछ। प्रतियोगिताको विजेता टोलीलाई १० लाख रुपैयाँको आकर्षक ट्रफी प्रदान गर्ने सदस्य–सचिव घिसिङले बताए । उक्त ट्रफी ३ विभागीय टिम र सबै प्रदेश भ्रमण गराई अन्तिम प्रतियोगिताका लागि गण्डकी प्रदेश ल्याउने उनको भनाइ छ।
प्रदेश तथा विभागीय टिमले आगामी भदौ १५ गतेसम्म खेलाडीको संख्या र २५ गतेसम्म नाम दर्ता गराई सक्नुपर्ने हुन्छ। निर्धारित समयमा दर्ता नभएकालाई पुनः परिपत्र गरी कारण बुझ्ने घिसिङले बताए। प्रतियोगितामा २ खेलको प्रदर्शनसमेत हुनेछ। ७ प्रदेशसहित ३ विभागीय टिम र एनआरएनए गरी ११ टिमले प्रतियोगितामा सहभागिता जनाउनेछन्। प्रत्येक टिमबाट ३ सय ३९ महिला र ३ सय ६९ पुरुष खेलाडीको कोटा निर्धारण गरिएको छ।
नवौं खेलकुद प्रतियोगिता २०७७ मै आयोजना गर्नुपर्ने भए पनि कोभिड र अन्य कारणले पटक–पटक स्थगित हुँदै आएको थियो। नेपालगञ्जमा भएको आठौं राष्ट्रिय खेलकुदको समापनका दिन नवौं राष्ट्रिय खेलकुद २०७७ फागुन २१ देखि २७ सम्म गण्डकी प्रदेशमा हुने जानकारी दिइएको थियो।
प्रतियोगिताका खेल गण्डकी प्रदेशका सबै जिल्लामा हुने छन्। प्रदेश खेलकुद परिषद् गण्डकी प्रदेशले प्रत्येक जिल्लामा कम्तीमा १ खेल गर्ने गरी प्रस्ताव राष्ट्रिय खेलकुद परिषदलाई पठाएको छ। राखेपले खेलमैदानको निरीक्षण गरी कहाँ, कुन खेल गराउने निर्णय गर्नेछ।
३९ वर्षपछि गण्डकीमा राष्ट्रिय खेलकुद
गण्डकी प्रदेशमा ३९ वर्षपछि राष्ट्रिय खेलकुद हुन लागेको हो। यसअघि दोस्रो राष्ट्रिय खेलकुद प्रतियोगिता सञ्चालन भएको थियो। उक्त प्रतियोगिता ०४० चैत १२ गतेदेखि २० गतेसम्म पोखराको पोखरा रंगशालामा भएको थियो, जसको उद्घाटन तत्कालीन राजा वीरेन्द्रबाट भएको थियो। १४ अञ्चल समावेश रहेको उक्त प्रतियोगितामा कुल ५१ पदकसहित गण्डकी अञ्चल दोस्रो भएको थियो। ५० स्वर्णसहित १ सय ३७ पदक जित्दै बागमती अञ्चल प्रथम बनेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791041970.png)
