काठमाडौं– नेकपा एमालेका अध्यक्ष केपी शर्मा ओलीले ५ दलीय गठबन्धनका नेताहरुको गन्तव्य केही नभएको बताए। उनले कांग्रेस सभापति तथा प्रधानमन्त्री शेरबहादुर देउवाको गन्तव्य साहिबा (आरजु राणा देउवा) र माओवादी केन्द्रका अध्यक्ष पुष्पकमल दाहाल प्रचण्डको गन्तव्य सुपुत्री (रेणु दाहाल) रहेको बताए।
उनले भने, ‘यिनीहरुको गन्तव्य केही छैन। देउवाकको गन्तव्य साहिबा र प्रचण्डको गन्तय सुपुत्री हो। माधव नेपालको नाम नलिउँ होला। उनको हालत ‘करबटे बदल्ते रहे सारे रात, निद नही आइ’ हो। गन्तव्य केही छैन। छटपटीमै बित्छ।’
अध्यक्ष ओलीले आरजु राणालाई प्रधानमन्त्री बनाउन खोजिएको भन्दै कांग्रेस कार्यकर्ता त्यसका लागि तयार हुन्? भनेर प्रश्न गरे। ‘कसैको म्याडमलाई प्रधानमन्त्री बनाउन उनीहरु कार्यकर्ता बनेका हुन्?’ कांग्रेस कार्यकर्ताप्रति लक्षित गर्दै ओलीले भने।
यद्यपि उनीहरु (देउवा र प्रचण्ड) त्यसका लागि जस्तासुकै कुकर्म देशका विरुद्ध गर्न तयार रहेको ओलीले आरोप लगाए।
ओलीले भने, ‘यस्ताहरुबाट देशको हालत के होला? गलत उद्देश्यका लागि लुटपाट मच्याउने। राज्य संयन्त्रको दुरुपयोग इतिहासमा अहिले जस्तो कहिल्यै भएको थिएन।’
उनले एमालेले अहिलेको चुनाव हार्न नमिल्ने बताए। एमाले हार्दा देश नै हार्ने ओलीले दाबी गरे।
उनले भने, ‘एमालेले हार्दा देश हार्छ। जित्नैपर्ने कारण के छ भने देश जिताउनुपर्ने छ। एमालेका लागि केही छैन। प्रतिपक्षमा बस्छ। राष्ट्रियता, जनता, सुशासन र विकासका पक्षमा प्रतिपक्षमै बसेर बोल्छ। कार्यक्षेत्र सिद्धिने होइन।’
एक वर्षमा परामादेशी गठबन्धने सरकारले दुर्गतिमा लगेको आरोप लगाउँदै ओलीले देशलाई भ्रष्टाचारमा डुबाएको बताए। अहिले नै राजनीतिक विकृति बढेकाले गठबन्धनलाई पाँच वर्ष दिँदा झन् ठूलो संकट सिर्जना हुने ओलीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
