काठमाडौं– संघीय सरकारले प्रहरी समायोजन गर्न आलटाल गरेको भन्दै भन्दै मधेस प्रदेश सरकारले चरणवद्ध संर्घष गर्ने निर्णय गरेको छ।
प्रदेश सरकारका गृह तथा सञ्चारमन्त्री भरतप्रसाद साहले पत्रकार सम्मेलन गरी मधेस प्रदेशले चरणवद्ध संर्घष गर्ने निर्णय गरेको बताए। प्रदेश सरकारले संघीय सरकारलाई यसबारेमा जानकारी गराउँदा समेत चित्तबुझ्दो जवाफ नआएको भन्दै चरणवद्ध आन्दोलन गर्ने निर्णयमा पुगेको बताए।
प्रदेश सरकारको तर्फबाट यसअघि प्रधानमन्त्री शेरबहादुर देउवा, गृहमन्त्री बालकृष्ण खाणसहित गठबन्धनका नेताहरुलाई ज्ञापनपत्र बुझाएको, तर संघीय सरकार समायोजन गर्नका लागि गम्भीर नदेखिएको मन्त्री साहको भनाइ छ।
प्रहरी बिना शान्ति सुरक्षा कायम गर्न सम्भव नरहेको बताउँदै मन्त्री साहले यसका लागि संघर्ष एकमात्र विकल्प रहेको बताए। साउन २२ गते प्रदेशमा रहेका सबै दलका प्रदेश सभा सदस्यसहित सबै मन्त्रीहरुको उपस्थितिमा प्रदेश प्रमुखलाई ज्ञापन पत्र बुझाउने कार्यक्रम तय भएको साहको भनाइ छ।
साहले ७ दिने अल्टिमेटमसहित दिइने ज्ञापनपछि पनि सरकार प्रहरी समायोजन नगरे संघर्षका थप कार्यक्रहरु सार्वजनिक गरिने बताए।
प्रदेशका सबै राजनितिक दलहरुको बैठकबाट नै यस्तो निर्णय गरिएको बताउँदै मन्त्री साहले आफूहरुको आन्दोलनमा प्रदेशका हरेक राजनीतिक दलको समर्थन र सहयोग रहने जिकिर गरे।
साहले अहिले पनि संघीयता विरोधीहरुलाई वल पुग्नेगरी सरकारले काम गरिरहेको बताउँदै मन्त्री साहले अधिकार नदिँदा संघीयताले जुन रुपमा काम गर्नुपर्ने, हो त्यसमा कमी आएको बताए।
मन्त्री साहले गृह मन्त्रालयमा प्रहरी समयोजना सम्बन्धी सबै कामहरु पुरा भएको र प्रधानमन्त्री र केही कर्मचारीहरुले नै यसलाई आलटाल गरिरहेको बताए। संघीयताको जननी नै मधेस प्रदेश रहेकाले आफूहरुले प्रहरी समायोजनाको संर्घषको नेतृत्व गरिरहेको साहको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763284556.png)
