काठमाडौं– केपी शर्मा ओलीले तेस्रो पटक प्रधानमन्त्री नियुक्त हुँदा राष्ट्रपति विद्यादेवी भण्डारीबाट लिएको शपथ विवादित भयो। शपथमा रहेको ‘प्रतिज्ञा गर्छु’ भन्ने शब्द ओलीले उच्चारण गर्न चाहनेन्। राष्ट्रपति भण्डारीले ‘प्रतिज्ञा गर्छु’ भन्ने शब्द दोहोर्याएपछि ओलीले भने, ‘त्यो पर्दैन।’
उनले शपथ ग्रहरण ऐनअनुसार अक्षरस: शपथ नलिएकाले फेरि शपथग्रहण गर्नुपर्ने भनिएपछि ओलीले ऐनबाटै ‘प्रतिज्ञा गर्छु’ भन्ने शब्द हटाइदिए। ओली सरकारले ‘सपथ सम्बन्धी अध्यादेश, २०७८’ जारी गरे सपथसम्बन्धी व्यवस्थाको अनुसूचीमा भएको ढाँचामा ‘प्रतिज्ञा गर्छु’ भन्ने वाक्यांश हटाएको थियो।
देउवा सरकारले फेरि 'प्रतिज्ञा गर्छु' भन्ने शब्दलाई परिमार्जन गर्दै 'प्रतिज्ञा गर्दै' बनाएर विधेयक ल्याएको छ। राष्ट्रिय सभाबाट सन्देशसहित आइपुगेको विधेकलाई मंगलबार प्रतिनिधि सभामा पेस गरिएको हो।
प्रधानमन्त्री शेरबहादुर देउवाका तर्फबाट सपथ विधेयक पेस गर्दै उद्योग वाणिज्य तथा आपूर्तिमन्त्री दिलेन्द्रप्रसाद बडूले अहिले अध्यादेश निष्क्रिय भएकाले कानुन शुन्य भएको बताए। त्यसैले यसलाई चाँडोभन्दा चाँडो पास गर्नुपरेको उनको भनाइ छ।
एमालेका सांसद भीम रावलले शपथका वाक्यांश पढ्दै अहिले त्यसको उल्लंघन भइरहेको बताए। उनले वर्तमान सरकारले गठबन्धन बनाएरै संविधानको उल्लंघन गरेकाले शपथअनुसार नचलेको बताए। उनले भने, ‘सपथ पालना नगरे कारबाही गर्ने प्रावधान राख्नुपर्यो।’
त्यसको जवाफमा मन्त्री बडूले कारबाहीका लागि अन्य कानुन रहेकाले सपथमा त्यसको जरुरी नहुने उल्लेख गरे। सपथ नेपाली भाषा वा मातृभाषामा लिन सकिनेछ। मातृभाषामा लिनेले भने पहिल्यै जानकारी गराउनुपर्ने व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
