धनगढी– राष्ट्रिय प्रजातन्त्र पार्टीका अध्यक्ष राजेन्द्र लिङ्देनले आफ्नो पार्टी अब देशको वैकल्पिक शक्तिका रुपमा स्थापित हुने दाबी गरेको छन्।
धनगढीमा आयोजित पार्टी प्रवेश कार्यक्रमलाई सम्बोधन गर्दै उनले पार्टी वैकल्पिक शक्तिका रुपमा स्थापित हुन अघि बढेको बताएका हुन्।
'अब राप्रपा देशको वैकल्पिक राजनीतिक शक्तिका रुपमा अघि बढिसकेको छ, कसैले चाहेर पनि रोक्न सक्दैन’, उनले भने। अध्यक्ष लिङ्देनले वैशाखमा सम्पन्न स्थानीय तहको निर्वाचनमा राप्रपाले परिणाम देखाउन नसके पनि वैकल्पिक शक्तिको रूपमा अघि बढेको सन्देश दिएको बताए।
उनले भने, ‘स्थानीय तहको निर्वाचनमा भाग लिँदा राप्रपाको संरचना भताभुंग थियो, अब संगठन विस्तार गरी आगामी निर्वाचनमा परिणाम देखाउनुपर्छ।’
उनले राप्रपा देश बचाउने, धर्म बचाउने पार्टी भएकाले यसप्रति युवादेखि जेष्ठ नागरिकसम्मको आकर्षण बढेको बताए। उनले राप्रपा बलियो भए मात्र देश बलियो हुने दाबी गरे।
उनले भने, ‘हामी संघीयता। धर्म निरपेक्षता र गणतन्त्र खारेज गर्ने गरी अघि बढेका छौं, यसमा सबैको साथ–सहयोग आवश्यक छ।’
पार्टी प्रवेश कार्यक्रममा कांग्रेस, एमाले, माओवादी, समाजवादीलगायतबाट ६ सय जना राप्रपामा प्रवेश गरेको राष्ट्रिय प्रजातन्त्र पार्टी जिल्ला कार्यसमिति कैलालीले जनाएको छ।
तत्कालीन नेकपा प्रदेश कमिटी सदस्य एवं उद्योग विभाग प्रमुख राजेश भण्डारीको नेतृत्वमा ठूलो संख्यामा नेता तथा कार्यकर्ता राप्रपामा प्रवेश गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
