काठमाडौं– प्रतिनिधि सभाअन्तर्गतको अन्तर्राष्ट्रिय सम्बन्ध समितिले सरकारले स्टेट पार्टनरसिप प्रोग्राम (एसपीपी) मा सहभागी नहुने पत्र अमेरिकालाई नपठाउनुको कारण माग गरेको छ। बुधवार बसेको समितिको बैठकले एसपीपीमा नेपाल सहभागी नहुने भनेर मन्त्रिपरिषद्को बैठकले निर्णय गरे पनि हालसम्म अमेरिकालाई पत्र नलेखेको भन्दै पत्र नलेख्नुको कारण माग गर्ने निर्णय गरेको समिति सभापति पवित्रा निरौला खरेलले बताएकी छन्।
निरौलाले भनिन्, ‘एसपीपीमा नेपाल सहभागी नहुने भनेर अमेरिकालाई लेख्नुपर्ने पत्र आजसम्म किन गइराखेको छैन? नजानुको कारण के हुन्?
यस्तै, समितिले ३ पटकसम्म सरकारका सम्बद्ध निकायहरुलाई पत्राचार गरी एसपीपी सम्झौतासँग सम्बन्धित कागजात माग गरे पनि नपाएकोले सो कागजात प्राप्त गर्न नसक्नुको कारण पनि माग गरेको समिति सभापति निरौला खरेलले जानकारी दिइन्।
उनले भनिन्, ‘हामीले मागेका डकुमेन्टहरु हामीले प्राप्न गर्न नसक्नुका कारणहरु के–के हुन्, र यो हामीले प्राप्त गर्नसक्छौं या सक्दैनौं प्रस्ट किसिमको जानकारी होस् भनेर हामीले सरकारलाई पत्राचार गरेका छौं।’
त्यस्तै, प्रधान सेनापति प्रभुराम शर्माको अस्ट्रेलिया भ्रमणको सम्बन्धमा पनि विभिन्न प्रकारका हल्लाहरु आएकाले भ्रमणको सम्बन्धमा आधिकारिक कुरा आगामी बैठकमा सम्बन्धित निकायलाई बोलाएर लिइने सभापति निरौलाले जानकारी दिइन्।
‘प्रधान सेनापति अस्ट्रेलिया गएको कुरा हामीले जानकारी पायौं। केको लागि जानुभएको हो? हामीलाई जानकारी छैन। त्यसले गर्दा आधिकारिक रुपमा आधिकारिक ठाउँबाट यो जानकारी हामीलाई चाहिन्छ। आइपीएस (अमेरिकाको हिन्द प्रशान्त रणनीति)को सन्दर्भमै छलफलमा जानुभएको हो भन्ने खालको कुरा छ,’ निरौलाले भनिन्,‘एसपीपीलाई पास गर्नका लागि हो भन्ने खालको कुरा पनि आएको छ। तर, हामी हल्लाको पछि लागेका छैनौँ। हामी आधिकारिक तथ्य, प्रमाण लिन चाहन्छौँ। अहिलेको सन्दर्भमा रक्षा मन्त्रालयलाई पत्राचार गरेका छौँ।’
नेपाली सेनाले साउन ६ गते जारी गरेको एक विज्ञप्तिमा प्रधान सेनापति प्रभुराम शर्माको अस्ट्रेलिया भ्रमण र त्यहाँ हुने कार्यक्रमको बारेमा उल्लेख गरेको छ। सेनाको विज्ञप्तिमा असार ३१को मन्त्रिपरिषद्को निर्णयबाट स्वीकृत भएअनुसार प्रधान सेनापति शर्मा अस्ट्रेलियाको सिड्नीमा साउन ९ गते देखि ११ गतेसम्म ‘एनयुल चिफ अफ डिफेन्स कन्फेरेन्स २०२२’ कार्यक्रममा सहभागी हुन त्यसतर्फ जाने बताएको छ। त्यसका लागि शर्मा साउन ७ गते नै अस्ट्रेलिया प्रस्थान गरिसकेका छन्।
अस्ट्रेलियन डिफेन्स फोर्सको संयोजकत्वमा युएस इन्डो पेसिफीक कमान्डद्वारा उक्त कार्यक्रम आयोजना भएको सेनाको विज्ञप्तिमा उल्लेख गरिएको छ।
सेनाका अनुसार यो कन्फेरेन्समा नेपाली सेना २०५६ सालदेखि निरन्तर सहभागी हुँदै आएको छ। उक्त कार्यक्रममा एसिया प्रशान्त क्षेत्रमा अवस्थित राष्ट्रको सेना प्रमुखहरूको उपस्थितिमा विद्यमान अन्तर्राष्ट्रिय सुरक्षा एवं आपसी सहयोगका पक्षहरूलाई समेटी विविध सुरक्षाका विषयहरूमा छलफल, अन्तर्क्रिया तथा विचार आदनप्रदान हुने सेनाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
