सहरी विकासमन्त्री मेटमणि चौधरी
काठमाडौं– सहरी विकास मन्त्रालयले अघिल्लो आर्थिक वर्ष २०७८/०७९को अन्तिम महिना असारमा मात्रै २६ प्रतिशत बजेट खर्च गरेको छ। सहरी विकासमन्त्री मेटमणि चौधरीले असार महिनाको बजेट खर्चलाई आफ्नो कार्यकालमा 'उच्च वित्तीय प्रगति हासिल' गरिएको रुपमा अर्थ्याएका छन्।
बुधबार आफूले कार्यभार सम्हालेको ३० दिनको विवरण सार्वजनिक गर्दै मन्त्री चौधरीले आफ्नो छोटो कार्यकालमै मन्त्रालयले उच्च वित्तीय प्रगति हासिल गरेको दाबी गरे।
अर्थमन्त्री चौधरीले यो आर्थिक वर्षमा मन्त्रालयले ७०.१४ प्रतिशत वित्तीय प्रगति हासिल गरेको बताए। मन्त्री चौधरीले अन्य मन्त्रालयको तुलनामा आफ्नो मन्त्रालयले उच्च काम गरेको दाबी गरे।
मन्त्रालयले कूल बजेट ३० अर्व ८१ करोडमध्ये चालुतर्फ १ अर्ब ७५ करोड रुपैयाँ विनियोजन गरिएको थियो। जसमध्ये १ अर्व २८ करोड रुपैयाँ खर्च भएको उनले जानकारी दिए। यस्तै, पुँजीगततर्फ २९ अर्व ५ करोड रुपैयाँ विनियोजन गरिएकोकामा २१ अर्व ६१ करोड खर्च गरेको मन्त्री चौधरीले जानकारी दिए।
चालु र पुँजीगत गरी मन्त्रालयको समग्रमा ७०.१४ प्रतिशत बजेट खर्च गरेको मन्त्री चौधरीले सार्वजनिक गरेका छन्। असार महिनामा मात्रै २६.२८ प्रतिशत वित्तीय प्रगति भएको उनले बताए।
आगामी आर्थिक वर्षमा योभन्दा धेरै प्रगति होस् भनेर अहिले नै कार्ययोजना बनाएर काम गर्ने मन्त्री चौधरीले दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
