काठमाडौं– नेकपा माओवादी केन्द्रका नेतासमेत रहेका राष्ट्रिय सभाका सदस्य नारायणकाजी श्रेष्ठले वैवाहिक अंगिकृत नागरिकताको विषयमा ७ वर्ष बनाउने प्रावधान हटाइनुपर्ने कुनै कारण नभएको बताएका छन्।
सोमबार राष्ट्रिय सभा बैठकमा प्रतिनिधि सभाबाट सन्देशसहित प्राप्त नेपाल नागरिकता (पहिलो संशोधन) विधेयक, २०७९ माथि छलफलमा भाग लिँदै श्रेष्ठले भने, ‘सात वर्षमा वैवाहिक अंगिकृत नागरिकता महिलालाई दिने जो प्रावधान थियो, त्यो हटाउनुपर्ने कुनै कारण थिएन जो राज्य व्यवस्था समितिले पास गरेको छ त्यसमा पनि विचार पुर्याइएन।’
उनले नेपाली महिलाले कुनै विदेशी पुरुष बिहे गरेको अवस्थामा कुनै प्रावधान नै नराख्ने कुरा गलत भएको बताए। उनले यसबारेमा पनि प्रावधान राखेर क्राइट यरिया तोक्नुपर्ने बताए।
सांसद श्रेष्ठले ‘फास्ट ट्र्याक’ विधिबाट प्रतिनिधि सभाले विधेयक पारित गर्नु गलत भएको टिप्पणी गरे। प्रतिनिधि सभाले समितिमा विधेयक नपठाई नेपाल नागरिकता ऐन, २०६३ (पहिलो संशोधन), विधेयक पास गरेकोप्रति उनले आपत्ति जनाएका हुन्। यस्तो हर्कतले लोकतन्त्र कमजोर हुने उनको भनाइ थियो।
‘सरकारले राज्य व्यवस्था समितिको प्रतिवेदनअनुसार विधेयक फिर्ता गरेर अल्पमतको विचार लागु हुने गरी कानुन व्यवस्था गर्न विधेयक प्रस्तुत गर्ने यो चलन चलायौं भने लोकतन्त्र अत्यन्त कमजोर हुन्छ’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
