काठमाडौं– नेकपा एमालेका अध्यक्ष केपी शर्मा ओलीले आगामी प्रतिनिधि सभा र प्रदेश सभाको निर्वाचन मंसिरमै हुनुपर्ने जिकिर गरेका छन्।
सत्ता गठबन्धनभित्र निर्वाचन केही समय सार्ने खेल भइरहेको हल्ला चलिरहेको समयमा ओलीले निर्वाचन सार्न गठबन्धनले प्रयास गर्नसक्ने भन्दै कार्यकर्तालाई त्यसको विरोधमा उत्रन आग्रह गरे।
‘आगामी मंसिरमा चुनाव गराउनुपर्छ। यो संवैधानिक प्रश्न हो,’ उनले भने, ‘यसलाई तलमाथि हुन दिनु हुँदैन।’ बागमती प्रदेशको भेलालाई सम्बोधन गर्दै उनले निर्वाचन सार्ने कुरा हुन नसक्ने दाबी गरे।
संविधानले तोकिएकै समयमा निर्वाचन हुने परिकल्पना गरेकाले सत्ता गठबन्धनले चाहँदैमा निर्वाचन सार्न नमिल्ने उनले बताए।
निर्वाचन आयोगले मंसिर २ गते एकै चरणमा प्रतिनिधि सभा र प्रदेश सभाको निर्वाचनको मिति प्रस्ताव गरेको छ। आयोगले सरकारलाई सुझाव दिएको अवस्थामा सत्ता गठवन्धनभित्र केही समय सार्ने कि अहिले नै घोषणा गर्ने भनि छलफल चलिरहेको छ।
दुवै तहको निर्वाचनका लागि आवश्यक तयारी गर्न १२० दिन आवश्यक हुने भएकाले तत्काल निर्वाचनको मिति घोषणा गर्नुपर्ने तर्क निर्वाचन आयोगले गर्दै आएको छ।
सरकारले पनि निर्वाचनको मिति घोषणाबारे छलफल थालेको छ। सत्ता गठबन्धनभित्रको सहमतिका आधारमा मन्त्रिपरिषद्को बैठकले निर्वाचनको मिति घोषणा गर्ने छ।
साउनको पहिलो साता नै निर्वाचनको मिति घोषणा हुने भनिए पनि सत्ता गठबन्धनभित्र घनिभूत छलफल नहुँदा सरकारले घोषणा गरेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
