काठमाडौं-सीसीटीभी फुटेजका विषयमा प्राविधिक तथा विज्ञसँग छलफल गरेर मात्रै पूर्व अर्थमन्त्री जनार्दन शर्मासँग सोधपुछ गरिने भएको छ। अर्थसचिव मधु मरासिनी र राजस्व सचिव कृष्णहरि पुष्करसँग सोधपुछ गरेपछि समिति सीसीटीभी फुटेजमा केन्द्रीत भएको छ।
सोमबारको बैठकमा अर्थ मन्त्रालयका आइटी विज्ञसँग सोधपुछ गरिएको समितिका सचिव सुरेन्द्र अर्यालले बताए। उनका अनुसार मंगलबारदेखि सीसीटीभीसँग सम्बन्धित अन्य विज्ञसँग छलफल गरिने भएको छ।
बजेट निर्माणमा अनधिकृत व्यक्ति प्रवेश गरेको विषयमा छानबिन गर्न गठित समितिले गत मंगलबारदेखि काम थालेको थियो। समितिले पहिलो चरणमा बजेट निर्माणताकाको सीसीटीभी फुटेज मगाएको थियो। जेठमा बजेट निर्माण भएको कुरालाई केन्द्रमा राखेर सीसीटीभी फुटेज मगाए पनि असारको रेकर्ड भएको हार्डडिस्क उपलब्ध गराइएको छ।
जेठको रेकर्ड नभएको तथा डिलिट भएको जस्ता बयान मन्त्रालयका कर्मचारीहरुले दिएका छन्। सोही हार्डडिस्कमा रहेकोमा डिलिट भएको अवस्थामा फिर्ता ल्याउने प्रविधिबारे समितिले छलफल गरिरहेको छ। तर उक्त हार्डडिस्कमा जेठ महिनाको सीसीटीभी फुटेज रेकर्ड भएर डिलिट भएकोमा समेत यकिन नरहेको बुझिएको छ।
समितिकाे कार्यविधिमा पूर्व अर्थमन्त्री शर्मासँग सोधपुछ पनि रहेकाे छ। तर, अहिले त्यसलाई स्थगित गरेर सीसीटीभी फुटेजमा केन्द्रीत भएको छ। यस विषयमा सोधपुछ गर्दा मन्त्रालयका कर्मचारीले उल्टो गुनासो पोखेको समितिका एक सदस्य सांसद डा सुरेन्द्र यादवले बताए। सचिवद्वयले आफूहरु नेतृत्वलाई सफल बनाउन निर्देशन अनुसार चल्नुपर्ने पोष्टमा रहेको बताए। उनीहरुले अनधिकृत व्यक्तिको प्रवेश इन्कार गर्दै आफूहरु 'राम्रो' गर्न खोजिरहेको बताए।
झन्डै ७ दिन लगातार सक्रिय भए पनि समितिले अनधिकृत व्यक्ति प्रवेश प्रमाणित हुने वा प्रवेश नगराएको प्रमाणित हुने कुनै आधार फेला पार्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1755350564.jpg)
-1764146706.png)
-1772170907.png)
