डडेल्धुरा–प्रधानअध्यापकको राजीनामा माग गर्दै स्थानीय प्रदर्शनमा उत्रिएपछि डडेल्धुराको अमरगढी नगरपालिका–७ पोखरास्थित उग्रतारा माध्यमिक विद्यालयमा उत्पन्न तनावपूर्ण अवस्था साम्य भएको छ। आइतबार बिहानैदेखि विद्यालय परिसरमा तनावपूर्ण अवस्था सिर्जना भएको थियो।
विद्यालयमा आइतबार बिहानैदेखि अभिभावकहरू एकाएक भेला भएका थिए। अभिभावकहरु नाराबाजी गर्दै विद्यालयका प्रधानाध्यापकको राजीनामा माग गरिरहेकै बेलामा स्थिति नियन्त्रण बाहिर गएपछि प्रहरीले लाठीचार्ज गरेको थियो।
स्थानीयले विद्यालय घेराउ गर्दै प्रधानाध्यापकको राजीनामा माग्दै विद्यालय प्रशासनमा ढुंगामुढासमेत गरेका थिए। प्रधानाध्यापक चन्द्रबहादुर साहु र विद्यालयमै कार्यरत एक शिक्षिकाबीचको सम्बन्ध तथा लेखापालमाथि प्रअले गरेको कुटपिटको विषयले विद्यालयमा तनावपूर्ण अवस्था सिर्जना भएको हो।
शक्रबार साहुले विद्यालयमै लेखापाल टीका ऐरमाथि कुटपिट गरेका थिए। लेखापाल ऐरले मदिरा सेवन गरी बिहीवार साँझ आफूलाई समेत गालीगलोज गर्नुका साथै आफनो चरित्रहत्या गरेको आरोप प्रअ साहुले लगाएका थिए। त्यसपछि शनिबार स्थानीयले विद्यालयमा तालाबन्दीसमेत गरेका थिए।
स्थानीयले प्रधानाध्यापक र शिक्षिकाको सरुवालाई मुख्य माग राखेपछि विद्यालयमा बसको सर्वपक्षीय बैठकले सोही अनुरूप प्रधानाध्यापकको राजीनामाका साथै एक हप्ताभित्र अन्यत्र विद्यालयमा सरुवाको निर्णय गरिएको विद्यालय व्यवस्थापन समितिका अध्यक्ष छत्र जोशीले जानकारी दिए।
उनका अनुसार शिक्षा नियमावली अनुसार दुवै जनाको सुरुवा गरिनेछ। विद्यालयको अवस्था बिग्रिन नदिन अब उप्रान्त शैक्षिक गुणस्तर कायम गरी नियमित रूपमा विद्यालयमा संचालनमा सहयोग गर्न नवनियुक्त प्रधानाध्यापक रामदत्त जोशीले सबैमा आग्रहसमेत गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
