काठमाडौं- नेकपा माओवादी केन्द्रका नेता नारायणकाजी श्रेष्ठले शनिबारको एक कार्यक्रममा एमाले अध्यक्ष केपी शर्मा ओलीको अभिव्यक्ति सकारात्मक संकेत नभएको बताएका छन्।
आइतबार फेसबुकमा एक स्टाटस लेख्दै श्रेष्ठले भनेका छन्- 'ओलीले प्रधानमन्त्री हुँदा संविधानको प्रावधान विरुद्ध प्रतिनिधि सभा विघटन गरेको कारणबाट उहाँ नेतृत्वको एमालेको लोकतान्त्रिक विश्वशनीयतामाथि समेत प्रश्न उठ्ने गरेको विषयमा आत्मालोचक हुनुको सट्टा त्यस प्रकारको अभिव्यक्ति दिनु निश्चय पनि सकारात्मक संकेत होइन। यसले अहं त तुष्टि गर्ला, तर देश, जनता र वामपन्थी आन्दोलनलाई कुनै योगदान पुर्याउने छैन।'
शनिबार नेपाल-चीन हिमालय मैत्री समाजद्वारा आयोजित 'नेपालको भूराजनीतिक अवस्थाः चुनौती र अबको बाटो विषयक विचार गोष्ठी' कार्यक्रममा श्रेष्ठले देशको स्वाधिनता र राष्ट्रियताको रक्षा गर्ने मूल शक्ति वामपन्थीहरु मात्रै भएको भन्दै वामपन्थी शक्तिहरु एकताका लागि अघि बढ्नुपर्ने आशयको अभिव्यक्ति दिएका थिए। तर उनीपछि बोलेका ओलीले एमालेबाहेक अन्य पार्टी वामपन्थी नरहेको बताएका थिए। श्रेष्ठले फेसबुक स्टाटसमार्फत त्यसैको प्रतिवाद गरेका हुन्।
'त्यसक्रममा मैले आम नेता, कार्यकर्ता र बुद्धिजीवीहरुलाई 'आफ्नो पक्ष' को अन्धतापूर्वक समर्थन र वकालत्त गर्ने वकिल जस्तो मात्र नबनी आलोचनात्मक चेतयुक्त बनौं र ठीकलाई ठीक बेठीकलाई बेठीक भन्ने साहस तथा संस्कृति प्रदर्शन गरौं भन्ने अपिल पनि गरेको थिएँ। मैले आत्मालोचक भई वाम तालमेल र एकता गरौं भन्ने प्रस्ताव राख्दा र वकिल जस्तो मात्र नहुन उपरोक्त अपिल गर्दा समेत हलमा उपस्थित श्रोता सहभागीहरुले कर्तल ध्वनिका साथ ताली बजाएर समर्थन गर्नु भएको थियो। तिनै श्रोता सहभागीहरुले ओलीले अहंकारको प्रदर्शन गर्दै वाम एकतामा ठेस पुग्ने गरी बोल्दा पुन: अझ जोडले ताली बजाउनुभयो। यसले वाम तालमेल र एकतालाई सहयोग पुर्याँउछ त? पुर्याउँदैन। हामी कहिले सच्चिने होला? गम्भीरतापूर्वक सोचौं', श्रेष्ठले लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
