काठमाडौं– राष्ट्रिय खेलकुद परिषद्का सदस्य सचिव टंकलाल घिसिङले एसियाली खेलकुद स्थगित भएपनि भोलि नै प्रतियोगिता हुन्छ भन्ने लक्ष्यका साथ खेलाडीको प्रशिक्षणलाई निरन्तरता दिने बताएका छन्।
नेपाल स्ट्रेन्थलिफ्टिङ महासंघको आयोजनामा शनिबार काठमाडौंमा सुरु प्रथम राष्ट्रिय खुल्ला स्ट्रेन्थलिफ्टिङ तथा इन्क्लाइन बेन्चप्रेस प्रतियोगिताको उद्घाटन गर्दै सदस्य सचिव घिसिङले जुनसुकै मितिमा एसियाली खेलकुद भएपनि नेपाली खेलाडी तयारी अवस्थामा रहुन पर्छ भनेर विशेष प्रशिक्षणलाई निरन्तरता दिने बताएका हुन्।
सदस्य सचिव घिसिङले खेलाडीमा स्ट्रेन्थ निकै आवश्यक भएको र राखेपले पहिलो पटक फिजिकल परिक्षण गरेको बताए। प्रतियोगिता राखेपको कर्भड हलमा दुई दिनसम्म चल्नेछ।
घिसिङले अहिले पनि एसियाली खेलकुदका लागि २३ वटा खेलको विशेष बन्द प्रशिक्षणहरु भइरहेको जानकारी गराउँदै नेपालमा स्ट्रेन्थलिफ्टिङ तथा इन्क्लाइन बेन्चप्रेसलाई अघि बढाउनका लागि राखेपले आवश्यक सहयोग गर्ने समेत बताए।
प्रतियोगितामा देशभरका ७५ भन्दा बढी खेलाडीले सहभागिता जनाएका छन्। प्रतियोगितामा महिला र पुरुष खेलाडीले तीन स्पर्धामा प्रतिस्पर्धा गर्दैछन् र विभिन्न तौल समूहले प्रतिस्पर्धा हुँदै छ।
पहिलो दिनको खेलमा विभिन्न तौल समूहका खेल सम्पन्न भए। आयोजकले तौल उचालेको आधारमा आइतबार मात्र नतिजा घोषण गर्ने छ। तीनै स्पर्धाबाट समग्रको विजेताले किर्गिस्तानमा हुने विश्व च्याम्पियनसिपमा सहभागिता जनाउने आयोजकले जानकारी दिएको छ। सहभागी खेलाडीलाई संघको आफ्नै खर्चमा सहभागी हुन पठाउनेछ।
प्रतियोगितामा महिलातर्फ ५८ केजी, ६५ केजी र ६५ माथिको तौल समूहमा प्रतिस्पर्धा हुँदै छ भने पुरुषतर्फ ६ तौल समूहमा प्रतिस्पर्धा हुँदै छ। यस्तै, मास्टर्सतर्फ ६५ केजी र ८५ केजी माथिको स्पर्धापमा प्रतिस्पर्धा हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
