फाइल तस्बिर।
काठमाडौं- नेकपा माओवादी केन्द्रका नेता नारायणकाजी श्रेष्ठले वामपन्थी एकता गर्नुपर्नेमा जोड दिएका छन्।
शनिबार नेपाल–चीन हिमालयमैत्री समाजद्वारा आयोजित 'नेपालको भूराजनीतिक अवस्थाः चुनौती र अबको बाटो विषयक विचार गोष्ठी' कार्यक्रममा सम्बोधन गर्ने क्रममा श्रेष्ठले विगतका घटनाक्रममा गम्भीर आत्मसमीक्षा गरेर एकताको बाटोमा अगाडि बढ्न आग्रह गरेका हुन्। कार्यक्रममा नेकपा एमालेका अध्यक्ष केपी शर्मा ओली पनि सहभागी थिए।
'नेपालमा वामपन्थी आन्दोलन सिद्धिएपछि के हुन्छ त? नेपालको राष्ट्रियता कमजोर हुन्छ र यो देशको अस्तित्व संकटमा पर्छ। त्यसैले देश सिध्याउने काम नगरौँ। त्यसका निम्ति वामपन्थीहरुको एकता आवश्यक छ। कमसेकम तालमेल मोर्चा र त्यसपछि अर्को दिशातिर जानु आवश्यक छ। तर, त्यसका निम्ति केपी शर्मा ओली यहाँ हुनुहुन्छ। अरु नेताहरु बाहिर हुनुहुन्छ। म सबैसँग विनम्रतापूर्वक आग्रह गर्न चाहन्छु, 'तुम शेर तो हम सवा शेर' छाडिदिऔँ', श्रेष्ठको प्रस्ताव थियो।
श्रेष्ठले नेपालमा देशभक्तिपूर्ण आन्दोलनको अगुवा शक्ति वामपन्थी शक्तिहरु भएको बताए। उनले अहिलेको विभाजन र चिराचिराको स्थितिलाई छाडिदिने हो र एकताबद्ध गर्ने हो भने देशमा वामपन्थी शक्तिहरु दुई तिहाइभन्दा बढी भएको बताए।
उनले भने, 'अनि, राष्ट्रियताको रक्षा र देशभक्तिपूर्ण आन्दोलनको अगुवाइ गर्ने शक्तिहरुले एकताबद्ध भएर सम्पूर्ण अरु देशभक्ति शक्तिहरुलाई मिलाएर राष्ट्रिय सहमति गरेर यो देशभक्तिपूर्ण आन्दोलनलाई सही दिशातिर अगाडि बढाउनुपर्छ र राष्ट्रिय स्वाधिनताको रक्षा गर्नुपर्छ।'
श्रेष्ठले अहिले वामपन्थी शक्तिहरु एकअर्कालाई सिध्याउने प्रवृत्तिमा लागेको बताए। उनले यस्तो प्रवृत्तिले सबै सिद्धिने दिशातिर गइरहेका त छैनौँ? भन्ने प्रश्न गरे।
एकले अर्कालाई सिध्याउँदा सिध्याउँदै वामपन्थी कम्युनिस्ट आन्दोलन सिध्याउने काम भइरहेको उनको भनाइ छ। 'सबै विसर्जित हुने र त्यो दिशातिर जाने? त्यसबाट बच्नुपर्यो', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
