चितवन पुगेर शेखरले भने– कांग्रेसलाई कम क्षति हुनेगरी गठबन्धनमा जानुपर्छ

राजनीति

रासस शनिबार, असार ३२, २०७९ १५:३३

फाइल तस्बिर।

चितवन– नेपाली कांग्रेसका केन्द्रीय सदस्य डा शेखर कोइरालाले संघीय र प्रादेशिक निर्वाचनमा कांग्रेसलाई कम क्षति हुनेगरी गठबन्धनमा जानुपर्ने बताएका छन्।

नेपाल प्रेस युनियनले शनिबार चितवनमा आयोजना गरेको पत्रकार सम्मेलनमा उनले गठबन्धनमा कसरी जाने भन्ने विषयमा छलफल जारी रहेको बताए।

'गठबन्धनमा कसरी जाने भन्ने विषयमा छलफल भइरहेको छ। गठबन्धन गर्दै गर्दा कांग्रेसलाई कमभन्दा कम क्षति हुने गरी जानुपर्छ', कोइरालाले भने।

स्थानीय तहको निर्वाचनमा आफ्ना कार्यकर्ताभन्दा पनि मतदाता कति हुन् भन्ने बुझ्न कठिन भएको उनले बताए। उनले भने, 'स्थानीय निर्वाचनमा हामीले रुखमा, हसिया हथौडामा, कलममा, छातामा मतदान गर्न भन्यौँ, तर आफ्ना मतदाता कति हुन् भन्ने बुझ्न सकिएन।'

फरक प्रसंगमा उनले नेपाली कांग्रेस कुनै समूहको पार्टी नभएको बताए। कांग्रेस विधिविधान अनुसार हिँड्नुपर्ने उनको भनाइ छ।

पार्टी सभापति शेरबहादुर देउवाले सबैलाई मिलाएर हिँडाउन् भन्ने आफ्नो चाहना रहेको उनले बताए। आफू भागबण्डाका पक्षमा नरहेको जनाउँदै कोइरालाले पार्टी वैधानिकरुपमा चलोस् भन्ने रहेको जिकिर गरे।

कांग्रेस कम्युनिस्ट प्रवृत्तिबाट जान नहुने भन्दै उनले सरकार र सभापतिले गरेका नकारात्मक कुराको खण्डन गर्दै पार्टी बलियो बनाएर लैजानुपर्ने बताए। कांग्रेसको नेतृत्वमा सरकार छ भन्दैमा सरकारले गरेका गलत कामको खण्डन गर्नु हुँदैन भन्ने नरहेको उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।