फाइल तस्बिर
काठमाडौं–राष्ट्रिय प्रजातन्त्र पार्टीले पार्टी हितविपरीतका गतिविधिमा संलग्नलाई २४ घण्टाभित्र लिखित स्पष्टीकरण सोध्ने र अनुशासन समितिलाई कारबाहीका लागि सिफारिस गर्ने निर्णय गरेको छ।
बुधबार बसेको पार्टीका पदाधिकारी र कार्यसम्पादन समितिका सदस्यहरुको बैठकले पार्टीको वृहत्तर हित र एकतामा आँच आउने गरी केही व्यक्तिले पार्टीको नाम दुरुपयोग,भेला र छलफल गरेको विषयलाई गम्भीर रुपमा लिएको जनाएको छ।
अनुशासनहीन गतिविधिलाई कुनै पनि हालतमा छुट नदिने उल्लेख गर्दै बैठकपछि जारी विज्ञप्तिमा भनिएको छ, ‘पार्टीहित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रसारण गर्ने, गराउने कार्यमा संलग्न भएकालाई २४ घण्टाभित्र स्पष्टीकरण सोध्ने र अनुशासन समितिलाई कारबाहीका लागि सिफारिस गर्ने निर्णय गरिएको छ।’
पार्टीको केन्द्रीय सचिवालयले उक्त गतिविधिमा संलग्न भएको भन्दै दिलनाथ गिरी, दिलविकास राजभण्डारी, श्यामप्रसाद तिमल्सिना र राजाराम श्रेष्ठलाई स्पष्टीकरण सोध्ने निर्णय गरेको हो।
प्रेस विज्ञप्ति
राप्रपाका अध्यक्ष राजेन्द्र लिङ्देनको अध्यक्षतामा पार्टीको केन्द्रीय कार्यसम्पादन समितिको बैठक आज केन्द्रीय कार्यालय धुम्बाराहीमा बसेको छ । बैठकमा पार्टीका पूर्व अध्यक्ष डा.प्रकाशचन्द्र लोहनी, वरिष्ठ नेता दिपक बोहरा, पार्टीका पदाधिकारीहरु, कार्यसम्पादन समितिका सदस्यहरुको उपस्थिति रहेको थियो ।
बैठकका निर्णयहरु यसप्रकार रहेको छ ।
१. राप्रपाको बृहत्तर हित र एकतामा आँच आउने गरि केही व्यक्तिले पार्टीको नाम दुरुपयोग गर्दै भेला, छलफल र बैठक गरेको विषयलाई पार्टीले गम्भीर रुपमा लिएको छ । अनुशासनहिन गतिविधिलाई पार्टीले कुनै हालतमा छुट दिने छैन । पार्टीको हित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रशारण गर्ने, गराउने कार्यमा संलग्न भएकालाई २४ घण्टा भित्र लिखित स्पष्टीकरण सोध्ने र अनुशासन समितिलाई कारबाहीको लागि सिफारिस गर्ने निर्णय गरिएको छ । पार्टीको केन्द्रीय सचिवालयले उक्त गतिविधिमा संलग्न भएकाहरु दिलनाथ गिरी, दिलविकास राजभण्डारी, श्याम प्रसाद तिमल्सिना र राजाराम श्रेष्ठलाई आज नै स्पष्टीकरण सोध्ने निर्णय गरिएको छ ।
२. राप्रपाको नेतृत्व पंक्तिमा आन्तरिक विवाद भएको भन्दै विभिन्न सञ्चारमाध्यम र सामाजिक सञ्जालमा श्रृङखलाबद्ध तरिकाले प्रचारप्रसार भइरहेको विषयमा राप्रपाको गम्भीर ध्यानाकर्षण भएको छ । पार्टीको नेतृत्व पंक्ति पूर्ण रुपले एकताबद्ध रहेको प्रष्ट पार्दछौं । पार्टीको हित विपरीत एवं नेतृत्व पंक्तिको मानमर्दन हुने गरि कुनै किसिमको गतिविधि र सामाजिक सञ्जालमा जथाभावी प्रचार नगर्न नगराउन पार्टीका सबै तहलाई बैठकले आग्रह गरेको छ । यस्तो गतिविधिमा संलग्न भएको पाइएमा कडा कारबाही गर्ने निर्णय गरिएको छ ।
३. यही असार २६ गते राप्रपा सम्बद्ध राष्ट्रिय प्रजातान्त्रिक महिला संगठन सम्बद्ध महिलाहरूका बिच उत्पन्न विवाद र उक्त विवादमा पार्टीका महामन्त्रीद्वय कुन्तिकुमारी शाही र राजेन्द्र गुरुङसमेतको नाम जोडेर विभिन्न संचार माध्यम तथा सामाजिक सञ्जालमा विशेष गरी महामन्त्री कुन्तिकुमारी शाहीको चरित्र हत्या हुने गरी आएको समाचारप्रति राप्रपाको ध्यानाकर्षण भएको छ । गलत समाचारहरूबाट भ्रममा नपर्न र यसप्रकारका क्रियाकलापमा सामेल नहुन समेत पार्टीका सबै तहका नेता कार्यकर्तामा राप्रपा आग्रह गर्दछ ।
मोहनकुमार श्रेष्ठ
प्रवक्ता एवं प्रचार विभाग प्रमुख, राप्रपा ।
२९ असार, २०७९
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
