काठमाडौं– कांग्रेसका नेता मीनबहादुर विश्वकर्माले रिक्त रहेको उपसभामुख पद कांग्रेसले पाउने बताएका छन्। केन्द्रीय कार्यसमिति बैठकमा सहभागी हुन पार्टी कार्यालय सानेपा पुगेका उनले पत्रकारहरुसँग कुरा गर्दै गठबन्धनबाट एक जना मात्रै उम्मेदवार बन्ने बताए।
‘गठबन्धनबाट एकभन्दा बढी उम्मेदवार नहुने देखिन्छ। त्यसैले व्यक्तिका बारेमा, को व्यक्ति हुनुहुन्छ भनेर निष्कर्ष निस्किसकेको छैन। तर गठबन्धनबाट नै सभामुख बन्नुहुन्छ’, उनले भने।
विश्वकर्माले व्यक्तिको बारेमा गठबन्धनमा प्रारम्भिक छलफल भएको बताए। ‘स्वभाविक रुपमा कांग्रेस हकदार हो। कांग्रेसले प्रस्ताव गरिसकेपछि अरु दलको पनि सहमति चाहिने भएकाले केही कुरामा टुंगोमा पुग्न बाँकी छ’, उनले भने।
कांग्रेसबाट उपसभामुखको उम्मेदवार पुष्पा भुसाल हुने चर्चा गरिएको छ। तर, व्यक्तिको नाम निश्चित भइनसकेको विश्वकर्माले बताए।
तत्कालीन उपसभामुख शिवमाया तुम्बाहाङ्फेले २०७६ माघ ६ गते राजीनामा दिएपछि उपसभामुख पद रिक्त रहँदै आएको थियो। त्यसपछि एउटै दलले सभामुख र उपसभामुख नपाउने भएपछि तत्कालीन नेकपाले उपसभामुख निर्वाचनलाई बेवास्ता गर्दै आएको थियो।
अघिल्लो वर्ष शेरबहादुर देउवाको नेतृत्वमा सरकार बनेपछि पनि यो विषय ओझेल पर्दै आएको थियो। नेकपाले उपसभामुखको निर्वाचनलाई बेवास्ता गरेपछि कांग्रेस सचेतक भुसाल लगायतले प्रतिनिधि सभामा यो विषय पटक–पटक उठाउँदै आएका थिए।
यसैबीच, बुधबार उपसभामुख निर्वाचनको कार्यतालिका सार्वजनिक भएको छ। जसअनुसार, उपसभामुखको निर्वाचन शुक्रबार दिउँसो १ बजे हुनेछ। त्यसअघि बिहीबार बिहान ११ बजेदेखि दिउँसो १ बजेसम्म मनोनयन दर्ताको समय तोकिएको छ।
त्यस्तै, बिहीबार १ः३० बजे दर्ता भएका उम्मेदवारिको सूचनाको दर्ता क्रमानुसार सूची प्रकाशन गरिनेछ। शुक्रबार दिउँसो ३ बजे प्रारम्भ हुने प्रतिनिधि सभाको बैठकमा ुप्रतिनिधि सभाको बैठकमा उपसभामुख पदमा निर्वाचित गरियोस् भनी प्रस्तावकले प्रस्ताव गर्ने र समर्थकले समर्थन गर्ने, उम्मेदवारीको सूचनामाथि सामूहिक रुपमा छलफल हुने र दर्ता क्रमानुसार निर्णयार्थ प्रस्तुत गर्नेु कार्यसूची छ।
संविधानअनुसार सभामुख र उपसभामुखमध्ये एक जना महिला हुनुपर्ने र फरकफरक दलको हुनुपर्ने संवैधानिक प्रावधान छ। सभामुख अग्निप्रसाद सापकोटा माओवादी केन्द्रबाट निर्वाचित भएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765273665.jpg)
-1763721444.png)
