काठमाडौं– नेपाली कांग्रेसले एक चीन नीतिप्रति आफ्नो स्पष्ट धारणा रहेको बताएको छ। मंगलबार कांग्रेस महामन्त्री गगनकुमार थापाले एक विज्ञप्ति जारी गर्दै चीन प्रतिको नेपाली कांग्रेसको धारणा र दृष्टिकोण चुनावी परिणाम वा सरकारमा कांग्रेसको उस्थितिको बनोटबाट निर्देशित नहुने स्पष्ट पारेका छन्।
विज्ञप्ति जारी गर्दै महामन्त्री थापाले भनेका छन्, ‘चीनप्रतिको नेपाली कांग्रेसको धारणा र दृष्टिकोण चुनावी परिणाम वा सरकारमा नेपाली कांग्रेसको उपस्थितिको बनोटबाट निर्देशित हुँदैन।’
सोमबार चिनियाँ कम्युनिष्ट पार्टीका विदेश विभाग प्रमुख लिउ चियान छाओसँगको भेटमा भएको छलफलबारे जानकारी दिँदै नेता थापाले यस्तो बताएका हुन्। उनले भेटमा दुवै देशको विशिष्ट सम्बन्धका आयामबारे छलफल भएको जानकारी दिएका छन्।
महामन्त्री थापाले नेपाली कांग्रेस एक चीन नीतिप्रति प्रतिबद्ध रहेको बताएका छन्। उनले जारी गरेको विज्ञप्तिमा भनिएको छ, ‘नेपाली कांग्रेस एक चीन नीतिमा प्रतिबद्ध छ। नेपाली भूभाग छिमेकी मित्र राष्ट्रका विरुद्धमा प्रयोग हुन नदिने कुरामा प्रस्ट, संवेदनशील र सचेत छ।’
साथै भेटमा चीन लगायत शक्ति राष्ट्रसँग नेपाली कांग्रेसले सम्मानपूर्ण सम्बन्ध राख्ने तथा शक्ति राष्ट्रबीच कुनै पनि रणनीतिक, सामरिक, सैन्य गठबन्धन वा अन्य प्रकारको प्रतिस्पर्धामा सहभागी नहुने कुरा जानकारी गराएको थापाले उल्लेख गरेका छन्।
उनले नेपालको हितका लागि कुनै पनि मित्रराष्ट्रबाट प्राप्त हुने सहयोग नेपालको राष्ट्रिय हित अनुकूल लिने कुरामा स्पष्ट रहेको लिउलाई जानकारी गराएको बताएका छन्।
‘नेपाली कांग्रेस नेपालमा विद्यमान विकासको आवश्यकता, उत्कट चाहना र त्यसका लागि आवश्यक स्रोतको अभाव र अन्तरलाई परिपूर्ति गर्न सबै छिमेकी तथा मित्र राष्ट्रहरूबाट नेपालको राष्ट्रिय हित अनुकूल सहयोग र सहायता लिनुपर्छ भन्ने ठान्दछ। नेपालको आफ्नो राष्ट्रिय हितमा हुनेगरी सबै मित्र राष्ट्रहरूबाट विकास सहयता लिनुपर्छ भन्ने नेपाली कांग्रेसको धारणा हो। नेपालको विद्यमान आर्थिक अवस्था र विकासको जुन चरणमा नेपाल आज उभिएको छ त्यस चरणबाट अघि बढ्न सबै मित्र राष्ट्रहरूबाट प्राप्त हुने स्रोतको व्यवस्थापन आवश्यक रहेको छ’, विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
