काठमाडौं– नेपाल भ्रमणमा रहेका चिनियाँ कम्युनिस्ट पार्टीका विदेश विभाग प्रमुख लिउ जियानचाओले मंगलबार नेकपा एमालेका अध्यक्ष केपी शर्मा ओलीसँग भेटवार्ता गरेका छन्। भक्तपुरको बालकोटस्थित ओली निवासमा भएको भेटवार्तामा दुई नेताबीच दुई देशबीचको आपसी हित र विकास साझेदारीबारे कुराकानी भएको बताइएको छ।
भेटमा सहभागी नेकपा एमालेका विदेश विभाग प्रमुख राजन भट्टराईले लिउ र ओलीबीच दुई मुलुकको आपसी हितको बारेमा छलफल भएको बताए।
भट्टराईका अनुसार लिउले चीन र नेपालको सम्बन्धबारे चर्चा गरेका थिए। चीन र नेपालबीच धेरै अगाडिबाट राम्रो र सुमधुर सम्बन्ध रहेकोले आजको बदलिँदो परिवेशमा पनि दुई मुलुकबीच जुन आधारमा सम्बन्ध रहेको थियो त्यहि अनुसार अघि बढ्नु पर्नेमा लिउले जोड दिएका थिए।
लिउले चीनका लागि नेपाल महत्त्वपूर्ण छिमेकी राष्ट्र रहेको उल्लेख गर्दै चीन र नेपालबीच हुँदै आएको विकास तथा साझेदारीलाई निरन्तर बढाउन चाहेको ओलीसमक्ष बताएका छन्।
‘नेपाल अत्यन्त मैत्रीपूर्ण छिमेकी मुलुक र विकासको साझेदार भएकोले चीनले त्यसलाई निरन्तर बढाउन चाहेको छ।’ लिउको भनाइ उद्धृत गर्दै भट्टराईले नेपाल लाइभसँग भने।
भट्टराईका अनुसार लिउले नेपालले एक चीन नीति प्रति देखाएको प्रतिबद्धताप्रति पनि चासो व्यक्त गरको थिए।
जवाफमा ओलीले नेपाल एक चीन नीतिप्रती प्रतिबद्ध रहेको र कुनै पनि छिमेकीविरुद्ध नेपाली भूभाग प्रयोग हुन नदिने बताएका भट्टराईको भनाइ छ।
ओलीलाई उद्धृत गर्दै भट्टराईले भने, ‘नेपाल एक चीन नीतिमा प्रतिबद्ध छ, साथै नेपाली भूभाग चीनियाँ वा कुनै पनि छिमेकी मुलुकका विरुद्ध प्रयोग हुन निदेनेमा विश्वास दिलाउँछौँ।’
चर्चामा रहेको वाम एकतामा भने चीनको चासोका सम्बन्धमा लिउको कुनै पनि धारणा नरहेको भट्टराईले बताए।
भट्टराईका अनुसार लिउले नेपालको आन्तरिक मामिलामा कुनै पनि हस्तक्षेप नगर्ने चीनको नीति रहेको उल्लेख गरेका छन्।
‘लिउले तपाईंहरू विचार मिल्ने एक ठाउँ आउन सक्नु हुन्छ, त्यो तपाईहरूको कुरा हो भन्नुभयो’, भट्टराईले भने।
तत्कालीन अवस्थामा नेकपा एमाले र नेकपा माओवादी केन्द्रबीच एकीकरण भएर नेपाल कम्युनिस्ट पार्टी (नेकपा) बन्दा चीनको भूमिका रहेको चर्चा हुने गरेको थियो। यस्तै, नेकपाभित्र देखिएको विवाद समाधानमा पनि चिनियाँहरुले मध्यस्थताको भूमिका निर्वाह गर्ने गरेको विषय पनि चर्चामा आउने गरेको थियो।
तर, चिनियाँ कम्युनिस्ट पार्टीका विदेश विभाग प्रमुख लिउले भने प्रत्यक्ष रुपमा वाम एकताको कुरा नगरेको एमाले विदेश विभाग प्रमुख भट्टराईको भनाइ छ।
लिउले ओलीलाई भेट्नुभन्दा अघिल्लो दिन सोमबार नेकपा माओवादी केन्द्रका अध्यक्ष पुष्पकमल दाहाल प्रचण्डसँग कुराकानी गरेका थिए। प्रचण्डसँगको कुराकानीमा पनि लिउले विकास साझेदारी, एक चीन नीतिप्रति नेपालको प्रतिबद्धता र अन्तर्राष्ट्रिय राजनीतिका विषयमा कुराकानी भएको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
