काठमाडौं– नेकपा माओवादी केन्द्रले १२ बुँदे व्याख्यात्मक घोषणाबारे अमेरिकाको धारणा माग्दै सरकारले पत्र लेख्नुपर्ने निर्णय गरेको छ। गत फागुनमा एमसीसी सम्झौता प्रतिनिधि सभाबाट अनुमोदन हुँदा १२ बुँदे व्याख्यात्मक घोषणा पनि पारित गरिएको थियो।
माओवादी केन्द्रको असार १९–२३ गते काठमाडौंमा बसेको केन्द्रीय समितिको बैठकले एमसीसी र एसपीपीबारे गरेको निर्णय आइतबार नेता नारायणकाजी श्रेष्ठले सार्वजनिक गरेका छन्।
‘नेपालको संघीय संसदबाट एमसीसी सम्झौता अनुमोदन गर्दा १२ बुँदे व्याख्यात्मक घोषणा सहित गरिएको थियो र उक्त घोषणा अमेरिकाले स्विकार नगरेको खण्डमा एमसीसी सम्झौता स्वतस् खारेज हुने व्याख्या संसद्मा नै गरिएको थियो। तर एमसीसी अमेरिकाले अहिलेसम्म १२ बुँदे घोषणाका बारेमा कुनै प्रतिक्रिया दिएको देखिएको छैन। तसर्थ नेपाल सरकारले यथाशीघ्र एमसीसी अमेरिकासँग १२ बुँदे घोषणाको सम्बन्धमा उसको धारणा स्पष्ट गर्न माग गर्दै पत्र लेख्नुपर्छ’, निर्णयमा भनिएको छ।
त्यस्तै, एसपीपीलाई सरकारले अघि नबढाउने निर्णय गरेको भन्दै राष्ट्रिय सार्वभमिकता एवं हितका सम्बन्धमा सही निर्णय गरेको माओवादी केन्द्रको ठहर छ। ‘यस सम्बन्धमा सरकारले तत्काल अमेरिकी सरकारलाई पत्र लेखी औपचारिक जानकारी गराइहाल्नु पर्दछ’, निर्णयमा भनिएको छ।
यस्तो छ माओवादी केन्द्रका नाराणकाजी श्रेष्ठले सामाजिक सञ्जालमा केन्द्रीय कमिटी बैठकबारे दिएको जानकारी
हाम्रो पार्टी नेकपा ( माओवादी केन्द्र )को केन्द्रीय समितिको हालै २०७९ आषाढ १९-२३ गते काठमाडौंमा सम्पन्न केन्द्रीय समितिको बैठकले एम सि सि परियोजना र एस पि पि का बारेमा निम्न निर्णय गरेको छ।
१ :नेपालको संघीय संसदबाट एम सि सि संझौता अनुमोदन गर्दा १२ बुँदे ब्याख्यात्मक घोषणा सहित गरिएको थियो र उक्त घोषणा अमेरिकाले स्विकार नगरेको खण्डमा एम सि सि सँझौता स्वत: खारेज हुने ब्याख्या संसदमा नै गरिएको थियो ।तर एम सि सि अमेरिकाले अहिले सम्म १२ बुँदे घोषणाका बारेमा कुनै प्रतिकृया दिएको देखिएको छैन। तसर्थ नेपाल सरकारले यथाशिघ्र एम सि सिसि अमेरिका संग १२ बुँदे घोषणाको सम्बन्धमा उसको धारणा स्पष्ट गर्न माग गर्दै पत्र लेख्नु पर्छ।
२ :अमेरिकासँगको सैन्य गठबन्धनको चरित्र अन्तर्निहित एस पि पि सम्झौता नेपालको राष्ट्रिय सार्बभौमिकता ,स्वतन्त्र एवं असँलग्न परराष्ट्र नीति र राष्ट्रिय हित बिपरित भएकाले त्यसलाई दृढतापुर्बक अस्विकार गर्नुपर्दछ भनेर हामो पार्टी, सम्पुर्ण देशभक्त शक्तिहरु र जनताले सशक्त आवाज उठाएपछि सरकारले त्यसलाई अघि नबढाउने निर्णय गरेको छ। राष्ट्रिय सार्वभमिकता एवं हितका सम्बन्धमा यो सहि निर्णय हो ।यस सम्बन्धमा सरकारले तत्काल अमेरिकी सरकारलाई पत्र लेखी औपचारिक जानकारी गराइहाल्नु पर्दछ।
यसका साथै भुराजनितिक एवं सामरिक गठबन्धनमा नेपाललाई सामेल गराउने उदेश्यकासाथ यस प्रकारका राष्ट्रिय सार्वभौमिकता र हित बिपरितका सम्झौताको प्रयत्न भबिष्यमा पनि हुन सक्ने खतरा प्रति सचेत हुँदै हाम्रो पार्टी यसप्रति निरन्तर खवरदारी गरिरहने प्रतिबध्दता ब्यक्त गर्दछ र सरकार ,सम्पुर्ण देशभक्त शक्तिहरु र आम जनसमुदायमा समेत यसनिम्ति हार्दिक अपिल गर्दछ।
३ : अमेरिकाको एम सि सि सँग नेपाल सरकारले हस्ताक्षर गरेको र सँसदले अनुमोदन गरेको एम सि सि कम्प्याक्ट सँझौताका बारेमा हाम्रो पार्टी भित्र रहेको मतभेदका सम्बन्धमा दोस्रो केन्द्रीय समितिको बैठकले स्थानीय निर्वाचन २०७९ सम्पन्न भए पश्चात् पार्टी भित्र बहस (फोरम) सञ्चालन गरी निष्कर्षमा पुग्ने निर्णय गरेकोमा अहिलेको परिस्थितिमा आसन्न संघीय संसद र प्रदेश सभाको निर्वाचन सम्पन्न भएपछि उक्त निर्धारित फोरम सञ्चालन गर्ने निर्णय गरिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
