काठमाडौं– पार्टी सभापति शेरबहादुर देउवा एकलौटी रुपमा अगाडि बढेको भन्दै असन्तुष्ट नेपाली कांग्रेसको डा शेखर कोइराला समूहले विधान पालना नभएका विषयमा केन्द्रीय कार्यसमितिको बैठकमा गम्भीर रुपमा छलफल गर्ने भएको छ।
नेता कोइरालाको महाराजगञ्जस्थित सचिवालयमा भएको संस्थापन इतर समूहको बैठकले यस्तो निष्कर्ष निकालेको हो।बैठकमा केन्द्रीय समितिको गठनदेखि भातृ संस्थाको गठन गर्दासम्म परामर्श नभएको विषयमा नेताहरुले धारणा राखेका थिए।
‘स्थानीय तहको निर्वाचन लगायतका विषयमा समीक्षा हुने नै भयो। ६ महिनाभित्र विधान पालना किन भएन? केन्द्रीय कार्यसमिति गठनदेखि भातृ संस्थाको गठनसम्म आइपुग्दा परामर्श किन भएन भन्ने विषयमा छलफल भएको छ,’ नेता गुरूराज घिमिरेले भने, ‘६ महिनाभित्र विधान अनुसार गठन हुने भनिएको विभाग किन भएन भन्ने विषय पनि उठेको छ।’
भातृसंस्था गठनमा भएको ढिलाइका विषयमा पनि संस्थापन इतर समूहले छलफल गरेको हो। ‘सभापति एकलौटी हिसाबले अघि बढेको भन्दै केन्द्रीय कार्यसमितिको बैठकमा गम्भीर रूपमा कुरा उठाउने निष्कर्ष निकालिएको छ,’ अर्का एक नेताले भने, ‘नेतृत्व मनोमानी हिसाबले अघि बढ्दा समस्या हुन्छ। त्यसै हिसाबले प्रस्तुत हुने भनिएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
