बाजुरा– बाजुराको बुढीगंगा नगरपालिकामा दाेहाेर्याएर भएकाे निर्वाचनमा पहिलेकाेभन्दा कम मत खसेकाे छ। धाँधली निर्क्याेलपछि बैशाख ३० गते भएकाे निर्वाचन रद्द गर्दै निर्वाचन आयोगले बिहीबार पुन: निर्वाचन गराएकाे थियाे।
गएकाे निर्वाचनमा थुमा मावि केन्द्रमा मात्रै ९९ प्रतिशतभन्दा बढी मत खसेकाे थियाे। साेही मतदान केन्द्रमा अहिले ७० प्रतिशत मत खसेकाे छ। त्यसैगरी अन्य चार मतदान केन्द्रमा ९० प्रतिशतभन्दा बढी मत खसाइएकाे थियाे।
साेही कारणले निर्वाचनमा धाँधली भएकाे निष्कर्ष आयोगले निकालेका थियाे। बिहीबार सुरक्षाकाबीच निर्वाचन गरिएकाे छ। सबै मतदान केन्द्रमा बिहान ७ बजेबाट सुरु भएर पाँच बजेसम्म मतदान सम्पन्न भएको मुख्य निर्वाचन कार्यालय बाजुराले जनाएको छ।
बुढीगंगा नगरपालिकामा १३ हजार ६ सय ५९ कूल मतदाता रहेकाेमा ६६.७५ प्रतिशत मत खसेको जिल्ला निर्वाचन अधिकारी नवराज अवस्थीले जानकारी दिए।
बैशाख ३० गते भएको चुनावमा भने ७५.५८ प्रतिशत मत खसेको थियो। नगरपालिकाको वडा नम्बर ९ स्थित त्रिशक्ति मतदान केन्द्रमा सामान्य विवादपछि प्रहरीले थप झड्प हुन नदिन हवाइ फायर गरेको थियो।
अन्य ठाउँमा भने कुनै पनि विवाद नभएको जिल्ला प्रशासन कार्यलय बाजुराले जनाएको छ। त्रिशक्ति मतदान केन्द्रमा पनि ३५ मिनेट जति मतदान रोकिएर पुनः मतदान भएको प्रमुख जिल्ला अधिकारी प्रकाशचन्द अधिकारीले बताए।
बुढीगंगा नगरपालिकामा रहेका १० वटा मतदान स्थलमा नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान गरी एउटा स्थलमा एक सयभन्दा बढी सुरक्षाकर्मी परिचालन भएका थिए। मतदान स्थलको सुरक्षा नेतृत्व नेपाल प्रहरी, सशस्त्र प्रहरीका अधिकृतले गरेका थिए।
१० वटा मतदानस्थल र १९ वटा मतदान केन्द्र रहेको जिल्ला निर्वाचन कार्यलय बाजुराले जनाएको छ। नगरप्रमुखमा नेपाली कांग्रेसबाट रंगबहादुर खाति र नेकपा एमालेबाट रामबहादुर बानियाँ उम्मेदवार रहेका छन्। कांग्रेसका उम्मेदवार खातिलाई गठबन्धनकोसमेत समर्थन रहेको छ।
बैशाख ३० मै निर्वाचन भएको बुढीगंगा नगरपालिकामा विवादका कारण पुनः मतदान गर्ने निर्वाचन आयोगले निर्णय गरेको थियो। बैशाख ३० मा भएको चुनावमा बुढीगंगाका १० वडामध्ये ६ वटामा विवाद भएको थियो।
वडा २, ३, ४, ५, ७ र ९ का केन्द्रमा मतदान स्वतन्त्र हुन नसकेको स्थानीयको भनाइ छ। २, ३, ५ र ९ वडाका मतदानस्थल एमालेका कार्यकर्ताले नियन्त्रणमा लिएका थिए भने वडा ४ र ७ मा कांग्रेस कार्यकर्ताले नियन्त्रणमा लिएर आफू अनुकूल मतदान गरेका थिए। यी ६ वटै वडाका मतदानस्थलमा झडप, उम्मेदवारमाथि कुटपिट र मतदाता लखेटिएका थिए।
नगरपालिकाको वडा नम्बर ४ मा बुथ कब्जा गरेर ९९ दशमलव ४१ प्रतिशतसम्म मत खसाइएको थियो। एमालेले कब्जा गरेका भनिएका २, ३, ५ र ९ मा प्रहरी मतेपटिका मतदान केन्द्रमै छाडेर हिँडेका थिए। तर, काँग्रेसले कब्जा गरेको भनिएका ७ र ९ मा प्रहरीले संरक्षण गरिरहेको थियो।
बुढीगंगाको विवाद अध्ययन गर्न निर्वाचन आयुक्त सगुनशमशेर जबरासहितको टोलीले स्थलगत अध्ययन गरेर फिर्ता गएको थियो। निर्वाचन आयोगले नगरपालिकाको चुनाव स्थित गरेर पुन निर्वाचन गर्ने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
